Read Karbi ZEKARIAH 11 Bible Online

ZEKARIAH 11 - Karbi bible

ZEKARIAH 11

¹Nang inghap-heihei chingpunon, O Lebanon, Nang kedar athengpi me kechothekji aphan!

²Hang charbunon, O Saipras athengpi, pima kedar kreptang-lo, pima ahir-asang kedo athengpi-heihei virtang-lo! Hang charbunon, O Bashan adet aphongrong an pima nampi krepjap-lo!

³Arjunon, biresak kevi atum kehang-charbu, pima halatum adak-atur virtang-lo! Arjunon, hingho atum kangrong, pima Jordan anampi donodak-lo.

⁴Lasonsi HEMPHU ne Arnam pulo: “Kethatji abiresak ahur kevi abang plangnon.

⁵La kenam atum thuji bonta ado phophedet pen damlongpo; lapen kejor atum pu, HEMPHU ahirjume atheng, pima ne plang-olo,” lapen halatum amethang kevi atum halatum aphan jinsosedet-lo.

⁶Pima ne non pen apara det asor aphan jinsoselo, pusi HEMPHU pulo. “Langtha, Nesi abangphutin amethang kevi abang arideng lapen arecho arideng hodaipo; lapen halatum pirthe phangnopo lapen halatum arideng pen Ne la pajokjedetpo.”

⁷Lasonsi Ne kethatji abiresak ahur, keduk abiresak ahur atum kevi abang plang-lo. Lapen Ne chin hongni ensi, ehong abang kangjinso pu amen irlo, ehong abang ke chelongpet pusi irlo. Lapen Ne biresak lang-lo.

⁸Chiklo ejon angbong Ne bangkethom biresak kevi atum pavirlo. Pima ne halatum aphan chepaningding un-edet-lo, lapen halatum Nephan hijimlo.

⁹Lasi Ne pulo, “Ne nangtum aphan kevi abang kalilo. Kethinangji abang pathinang, kevirnangji abang pavirnang; lapen ahin atum abangphutin lahin lahin a-ok pachechoseroi nang.”

¹⁰Lapen Ne nangkangjinso achin che-enlo, lapen bengpet-lo. Ne pen rat atum angbong kepathiktang kechejok aloh phrilo.

¹¹Lasi halabangso arni amat phridak-lo, lapen Nephan kecholangding keduk abiresak ahur atum la HEMPHU alam pu chinilo.

¹²Ansi ne halatum aphan pulo, “La jongsi nangmek angden kengset pulote, Nephan anam nangpinangji; bonta jongsi kali pulote padonang.” Lapen halatum Nephan anam rup angkleng 30 linlo.

¹³Ansi HEMPHU neliphan pulo, “La khipuru arlo thapnon” la the-o anam Nephan halatum pen ajok Nepilo. Lasi neli rup angkleng 30 ponsi lapen lahei HEMPHU ahem akhipuru arlo thap-lo.

¹⁴Lapen Ne pangrumpet achin bengpet-lo, lasonsi Judah lapen Israel atum angbong korte kechekam phridak-lo.

¹⁵Ansi HEMPHU neliphan pulo, “Non ephong inut ningjoino akevi abang cheplangnon.

¹⁶Pima langtha, laso adet angbong inut kevirjilang aphan ke-orare abang mate kepratsei atum aphan kerire mate areng amek kedo atum aphan kepamemedet mate mesenlang atum aphan lananedet abang bonta athu kedo abang a-ok chosi, akeng chimi anta ingsekpo.

¹⁷Pei, pei, ningjoino abiresak kevi abangphan ningpaduk-nang, la biresak o-et abang! Alangliri lapen amek ar-e nokjir paronang. Alangliri pakrenghak nang, alangli mek ar-e paselok nang!”