Read Karbi ZEKARIAH 12 Bible Online

ZEKARIAH 12 - Karbi bible

ZEKARIAH 12

¹Israel aphan HEMPHU alam: Sining-heihei kesang abang lapen pirthe ahemthur kekim abang lapen monit abang arlo akarjong kepinchong abang HEMPHU lasonsi pulo:

²“Chininon, Jerusalem kekomchen arat atum aphan kehijuk-i aharlung Ne paplangpo; Jerusalem aphan ketengkhengji kethur ahut Judah aphanta abethurpo.

³Halabangso arni Ne kadokave arat atum aphan Jerusalem ke kardik-o a-arleng paplang-po; la kerung atum an amethang methangsi thedung amek dopo, lapen pirthe adang akhei kedo-an atum la abe thursi vangpetpo.

⁴HEMPHU pulo, halabangso arni Ne losei ajontin areng pasosi papherepo lapen la kardon abangphutin pangchamjampo. Bonta arat atum alosei ajontin aphan amek paselok pen areng kepaso ahut Ne Judah akhei aphan Nemek chingpusi langpo.

⁵Ansi Judah akhei aro-heihei atum amethang aphan chepupo, ‘Muluk a-HEMPHU halatum a-Arnam pen Jerusalem kedo atum jakong long-lo.’ ”

⁶Halabangso arni Judah aro-heihei aphan thengpi ajo turbong aphule ason lapen sok apeng angbong kar-ang athengtom ben ason paplangpo, lapen Jerusalem methang kedo adim, Jerusalem chedobom un ahut halatum ar-e pen arvi kedo-an komchen arat aphan cho-etpo.

⁷“Lapen David akhei adak-atur Judah adet apar themuchot-chedetji aphan HEMPHU aphrangsi Judah apehem aphan pahaipo.

⁸Halabangso arni HEMPHU Jerusalem kedo atum an aphuthak chong isi bipo, losei halatum angbong kemaranei abangta halabangso arni David asonpo, lapen David akhei ke Arnam asonpo, halatum aphu HEMPHU apherangke asonpo.

⁹Lapen halabangso arni Jerusalem abekethurji kevang adet do-an aphan Ne kepavirjisi ripo.”

¹⁰Lapen David akhei lapen Jerusa-lem kedo atum aphuthak isi kangjinso akarjong lapen kechoningri-thek aning dungji, lasi latum kejorboptang atum aphan lang-lote halatum asopo po epumpet kethi aphu thak ningkeduk ason thak thaksi la aphan ningdukpo; lapen inut pen inut asopo akleng aphuthak kechiru-charnap ason thak thaksi chiru-charnappo.

¹¹Halabangso arni Jerusalem along aning keduk ke Megiddo athoi ajo kedo Hadad-Rimmon aphan ason thak thaksi jasemet ningdukpo.

¹²Det adang ningdukpo, adontin amethang pen ajok David akhei arota amethang pen ajok, lapen halatum apiso atum amethang pen ajok; Nathan akhei arota amethang pen ajok, lapen halatum apiso atum amethang pen ajok;

¹³Levi akheita amethang pen ajok, lapen halatum apiso atum amethang pen ajok, Shimei akhei arota amethang pen ajok, lapen halatum apiso atum amethang pen ajok;

¹⁴lapen ahin kedo adon an, anut-tin amethang pen ajok lapen halatum apiso atum amethang pen ajok ningdukpo.