Read Karbi ZEKARIAH 14 Bible Online

ZEKARIAH 14 - Karbi bible

ZEKARIAH 14

¹Chininon, HEMPHU arni vangtang-lo, nangtum pen kethipontang amar nangtum angnosi chethakpo.

²Pima Jerusalem abe ron kethurjisi Ne det do-an pangrumpo, lapen rongsopi aphan haipo, lapen hem hormu-heihei thipon-etpo lapen arloso atum aphan chonep-po; rongsopi achitim amonit atum aphan nepsi bang adet pondetpo, bonta ahin atum aphan ke rongsopi pen ponpedetpo.

³Ansi HEMPHU damsi halabangso adet atum abethursi ron chedanpo, Alangli ron armu asonsi chedanpo.

⁴Halabangso arni Alangli keng Olive anglong athak arjappo, lake Jerusalem anihang anatsi kedo; lapen Olive anglong anihang anat pen nichi anat phlakdaksi arlok akethepi dopo, lapen inglong ebeng nirep anat lapen ebeng ke nitur anat cheterekpo.

⁵Lapen Ne inglong arlok hini phlakdakpo, arlok anglong la arep anat anta nanglepo, lapen Judah arecho Uzziah arni ahut nangtum chiklithepi pen kejokji kekat asonthotsi nangtum hadak katpo. Ansi HEMPHU nang Arnam vangpo, lapen Alanglilong kangthir atum an chevanpo.

⁶Halabangso arni hadak ingsamselo lapen ar-e kelokta avedetpo.

⁷Lapen hadak the-ang-dang verpo (La HEMPHU chinilo), lake anerlota kali, ajota kali, pima arnikangsam ahutta hadak the-angdangpo.

⁸Halabangso arni Jerusalem pen langkereng achitim ha nihang atalo anat lapen ebeng achitim nijang atalo anat lipo; la ningkreng-barla setame dopo.

⁹Lapen HEMPHU pirthe adang an aphuthak recho chopo; halabangso arni HEMPHU inutpetsi dopo lapen amen isinatpo.

¹⁰Det adang Geba pen Jerusalem nitur anat kedo Rimmon anta thoi plangpo. Bonta Jerusalem ingtuipo, kai ateng adim kedo atum dopo, Benjamin anghap lapen aphrang anghap adim an, ha atok anghap an, lapen Hananel ahemkangthir ha recho adrakha alang kesor adim anlo.

¹¹Lapen la do-anta do petpo, pima hadak ahirjuno avedetpo, Jerusalem jokvansi dolongpo.

¹²Lapen Jerusalem abethursi ron kechedan arat atum an aphan HEMPHU bangso avur pen pasopo, halatum karjapphrong un ahut a-ok thuvokpo, halatum amek-heihei, amek ahom-heihei along thuvokpo, lapen halatum ade-heihei halatum angho-heihei arlo thuvokpo.

¹³Lapen halabangso arni HEMPHU halatum aphan kepaphere pahangjopo, lasi abangphutinta ame-thang ari asangho ari ot-het-hatpo, lapen lahin-lahin abechethursi ari chejarpo.

¹⁴Judah jokta Jerusalem abethursi chedanpo lapen komchen adet-heihei akhi, ser-rup lapen pe-ri ake-ongpi pangrumpetpo.

¹⁵Lapen lasonthot avur losei-heihei, gadhakethe-heihei, ka-ut-heihei, gadha-heihei lapen halabangso amukam-heihei along kedo api an puthak lasonthot avursi vangpo.

¹⁶Ansi Jerusalem abe kethurra kevangpak adet atum angbong kerenglang atum abangphutin muluk a-HEMPHU aphan karchoji lapen chojun amei kerimjisi aningkan aningkanta hadak arludamverpo.

¹⁷Lapen pirthe adang angbong edonbak jongsi muluk a-HEMPHU recho aphan karchojira Jerusalem arludunde pulote halatum aphuthak hadak arve avedetpo.

¹⁸Lapen Ijip atum jongsi arlu damdera amethang cheklang damdelote HEMPHU det atum pharla akecho-kejun kerimji aphan karlu damde atum aphan kepasung avursi halatum aphuthak vangpo.

¹⁹La Ijip aphan isi aduk kepilo, lapen pharla chojun amei kerimji aphan karlu damde kedo-an adet atum aphan ta isinat aduk kepilo.

²⁰Lapen halabangso arni lek kring-kring athak “HEMPHU aphan kangthir” pu tokpo. Lapen HEMPHU ahem aphule-heihei dovan angno aharlung ason nangnakpo.

²¹Lapen Jerusalem lapen Judah along kedo aphutin aphule muluk a-HEMPHU aphan kangthir-et plangpo, anke athok kepajir atum an vangsi lapen la angbong pen phule ensi athok-ajir a-ok latum pupo. Lapen halabangso arni muluk a-HEMPHU ahem kejor-kelang abang avedetpo.