Read Karbi ZEKARIAH 2 Bible Online

ZEKARIAH 2 - Karbi bible

ZEKARIAH 2

¹Lapen neli ingphun chingthursi lang-lo, lapen thek-long-lo, lapen chininon, inut amonit ari along kepun-i arri do!

²Ansi neli pulo, “Nangli konatsi kedamlo?” Lapen alangli neliphan thak-lo, “Jerusalem arpan lapen arjon ko-an dingma la kepunji.”

³Lapen chini iktha, nelipen kechingki apherangke nangbarlo lapen alangliphan kechetongjisi anut kaprek apherangke vang-lo,

⁴lapen alangliphan pulo, “Kat-ra halabangso ariso aphan thannon, ‘Jerusalem apaisong kavedet arong-heihei asonsi monit atum dopo, athe ke-ongpi amuluk lapen ongdung achainong kedo apot.

⁵Pima Ne la komchen me apaisong cheplangpo pusi HEMPHU pulo, lapen Ne alangli adak atur cheplangpo.’ ”

⁶Oh rat atum! Nirep anat pen nangkat hurnon pusi HEMPHU pulo; pima, sining atomon phli ason thak thaksi Ne nangtum aphan bang adet riktang-lo, pusi HEMPHU pulo.

⁷Oh Bebilon arongsopi kedo atum Zaion anat kat-hurnon.

⁸Pima lasonsi muluk a-HEMPHU pulo, adak-atur klangdet aphi nangtum amar kethipon adet-heihei anat neliphan toilo, pima nangtum aphan ke-ot abang la Ne kechingkinonei aphansi ot-lo:

⁹Chinitha, halatum aphuthak Neri hijukji, lapen halatum ke aban atum kethipon amar cheplangpo. Lapen nangtum chinipo la muluk a-Hemphu-si nephan netoilo.

¹⁰Lunra ning cheparongnon, O Zaion arongsopi; pima chininon, Ne vang-lo lapen nangtum angbongsi Ne dopo pusi HEMPHU pulo.

¹¹Lapen ongdung adet atum halabangso arni HEMPHU arat chepangrumsi vangpo lapen Nerat plangpo; lapen Ne nangtum angbong dopo lapen nangtum chinipo la muluk a-HEMPHU si nephan netoilo.

¹²Lapen kangthir adet Alangli pharman asonsi HEMPHU, Judah adet chepahemphupo, lapen Alangli Jerusalem aphan ingvaithupo.

¹³HEMPHU angno kadokave doklip-non; pima Alangli kedo kangthir adim pen thurlo.