Read Karbi ZEKARIAH 3 Bible Online

ZEKARIAH 3 - Karbi bible

ZEKARIAH 3

¹Ansi alangli neliphan Joshua kuru-sarpo, HEMPHU apherangke angno karjapding nepaklang-lo, lapen Soitan alangliphan ahok-he alam kethanjisi ari ar-e arjapding-lo.

²Lapen HEMPHU apherangke Soitan aphan pulo, “HEMPHU nang pangchek nang, O Soitan! Jerusalem aphan kangvaitang a-HEMPHU nangphan pangcheknang! Laso abang me akar pen kesanphit athengchum ason kalima?”

³Joshua kesa-ur ape chingchoisi pherangke angno arjapding-lo.

⁴Lapen hadak karjaphrong atum aphan pherangke pulo, “Kesa-ur ape alangli pen phloknon.” Lapen Alangli alangliphan pulo, Chini iktha, Ne nangpap nang pen pahelo tang-lo, lapen adorkeso ape pensi nang pangchoipo.

⁵Lapen neli pulo, “Halatum alangli phu athak poho kangthir epak paphungnang.” Lasi halatum alangli phu athak poho kangthir epak phung-lo lapen pe-ri kemi-heihei pangchoilo; lapen HEMPHU apherangke ke adungsi arjap-lo.

⁶Lapen HEMPHU apherangke Joshua aphan paresi pulo:

⁷Nang jongsi ne tovar-heihei ateng kengkam chejor lote lapen ne kepu aling klemlote, nang nehem aphuthak chepahemphu longpo lapen ne tikup-heihei lang longpo, lapen dak karjapsar angbong pen nangphan kelut long ajakong nangpidetpo.

⁸Non arjutha, O Joshua kurusarpo, nang lapen nang ingno kangni nangjirpo atum an, pima halatum mesen angthek-lo, chininon, Ne neban aro pu abangphan vanpo.

⁹Pima, Joshua angno ne kebitang arlong isi lep throksi do. Ne laso aphuthak tokpo pusi muluk a-HEMPHU pulo, lapen arnisi angbong labangso adet adai an ne pakakdetpo.

¹⁰Muluk a-HEMPHU pulo, halabangso arni nangtum bangphutin methang arikang lapen thebo arong arum tebok abang aphan phapo.