Read Karbi ZEKARIAH 5 Bible Online

ZEKARIAH 5 - Karbi bible

ZEKARIAH 5

¹Neli puthot ingphun chingthursi lang-lo lapen chini iktha kangjar alohthui!

²Lapen neliphan alangli pulo, “Nang kopi thek-long-lo?” Neli thak-lo, “Neli kangjar alohthui thek-long-lo, la arjon ingrup 20 lapen arpan ingrup 10.”

³Ansi neliphan alangli pulo, “Lake det adang aphuthak kedam ahirjunolo, pima kechonghu abangphutin aphan la atengsi pavedetpo lapen seme chobei kedeng atum an aphanta la atengsi pavedetpo.

⁴Muluk a-HEMPHU pulo, Ne la toipo, lapen la kanghu abang ahem lapen Nemen pen seme chobei kedeng abang ahem lutsi dokokpo lapen akapat lapen arlong-heihei cho-etpo.”

⁵Ansi neliphan kechingki aphe-rangke vangsi neliphan pulo, “Nang ingphun chingthur-ra langtha, la kopisi kedamma?”

⁶Lapen neli pulo, “La kopilo?” Alangli pulo, “La kedamvoi ke kethap-i amarjong-lo.” Lapen alangli pulo, “Lake det adang an halatum apap-lo.”

⁷Lapen langtha, hi angchin adip ingpulo, lapen hadak inut arloso pe-marjong arlo kangnilun dolo!

⁸Lapen alangli pulo, “La ke kehingno akam.” Lapen alangli pe-marjong arlo dailapsi amangho along adip kardik kupthip-lo.

⁹Ansi neli ingphun chingthursi lang-lo lapen thek-long-lo, lapen chininon, banghini arloso vang-lo! Lapen halatum avengkong tomon do; halatum avengkong ke vochokang avengkong ason, lapen halatum sining pen longle adak pemarjong rungtang-lo.

¹⁰Lapen neli pen kechingki apherangke aphan neli pulo, “Halatum pe-marjong konatsi keponlo?”

¹¹Alangli neliphan pulo, “lake ha Shinar adet anatsi keponlo, ahem kekimpiji aphan, lapen la patangdetsi la hadak amethang ahemthur athak laso ape-marjong pangnidetpo.”