Read Karbi ZEKARIAH 6 Bible Online

ZEKARIAH 6 - Karbi bible

ZEKARIAH 6

¹Lapen puthot ingphun chingthursi neli thek-long-lo, lapen chininon, inglong kangtui hini angbong pen ron kechedan-i losei ahemkonglong humni nangbarlo; lapen la inglong kangtui hini angbong, lake bitoi anglong.

²Aphrangsi ahemkonglong ke losei ke-ang, lapen hini ahemkonglong ke losei morok hei hei.

³Kethom abang ke losei kelok ahemkonglong, lapen phli abang ke atokbor kedo alosei ahemkonglong,

⁴Ansi neli pen kechingki apherangke aphan arju-lo, “Akehai, lahei ron-ahemkonglong ke kopi aphan lo.

⁵Lapen pherangke nephan thaksi pulo, lake pirthe adang a-HEMPHU angno arjapsi sining atomon phli anat damlo.

⁶Losei ke-ik ahemkonglong ke Nirep adet anat dampo, lapen losei kelok ahemkonglong ke Nijang adet anat lapen losei morok ahemkonglong ke Nitur adet anat si dampo.”

⁷Losei ke-ang ahemkonglong nangkebar ahut, halatum pirthe kelang damjisi dothekthedet-lo. Lapen Alangli pulo, “Damnon, pirthe lang damnon.” Ansi halatum pirthe langdamlo.

⁸Ansi Alangli neliphan hangserlo, chininon, hala Nirep adet anat kedam atum Ne karjong Nirep adet anat pasanglong-lo.

⁹Lapen HEMPHU alam nelilong vang-lo:

¹⁰“Ban kepontang atum angbong pen Heldai, Tobijah lapen Jedaiah, latum Bebilon pen nangkeletang atumlo, lapen latum aphan ponra halabangso arni amat Jephaniah asopo Josiah ahem damra,

¹¹halatum pen ser-rup enra lapen Recho aphutup selamra Jehozadak asopo Joshua kurusarpo aphuthak la kupnon;”

¹²lapen alangliphan punon, “Lasonsi muluk a-HEMPHU pulo, ‘Chininon, bangso abang amen Aro: Pima alangli methang adim pen chingjokji, lapen alangli HEMPHU kardomhemthepi kimthupo.

¹³Alangli helo HEMPHU kardomhemthepi kekimthuji abang-lo lapen recho aman dopo, lapen recho anghoi chingnisi recho chopo. Lapen alangli recho anghoi adung inut akurusar dopo lapen halatum banghini angbong ningkangsam kechechini-thek dopo.’”

¹⁴Lapen recho aphuthak ke HEMPHU kardomhemthepi arlo dosi Heldai, Tobijah lapen Jephaniah asopo Josiah atum aphan isi pachekimo angthek-lo.

¹⁵Lapen kehelo kedo atum HEMPHU kardomhemthepi kekim kerapjisi vangpo; lapen muluk a-HEMPHU si nangtum along netoilo pu nangtum chinipo. Lapen nangtum jongsi ning aklong pen nang Arnam HEMPHU alam kroipame lote la plangvekji.