Read Karbi ZEKARIAH 8 Bible Online

ZEKARIAH 8 - Karbi bible

ZEKARIAH 8

¹Lapen muluk a-HEMPHU ase nelilong vangsi pulo,

²Muluk a-HEMPHU lasonsi pulo: Ne Zaion aphan jasemet akelang un-e pensi lang un-elo, lapen Ne laphan ningthipik pen lang un-elo.

³Lasonsi HEMPHU pulo: Ne Zaion anat chevoithupo lapen Jerusalem angbong dopo, lapen Jerusalem aphan kekroithirklong arongsopi lapen muluk a-HEMPHU Anglong, inglong kangthir pusi hangpo.

⁴Lasonsi muluk a-HEMPHU pulo: Sarpi lapen sarbura atum puthot Jerusalem atovar-heihei along ingnipo, latum kesar apot bangphutin achin chiripo.

⁵Lapen tovar-heihei along pinsomar lapen arlosomar kejuisi plengsetpo.

⁶Lasonsi muluk a-HEMPHU pulo: Jongsi halabangso arni ahin arat atum amek angden manghumemelo tangte Ne mek angden la manghumeme jima, pusi muluk a-HEMPHU pulo?

⁷Lasonsi muluk a-HEMPHU pulo: “Chininon, Ne rat atum aphan Nihang adet lapen Nijang adet penta pajokpo;

⁸lapen halatum Jerusalem angbong kepadoji aphan vanji; lapen kroithirklong lapen athikpet pen halatum Nerat plangpo lapen Ne halatum a-Arnam plangpo.”

⁹Lasonsi muluk a-HEMPHU pulo: “Muluk a-HEMPHU ahemthur kekim arni pen non ahut anta nangtum lahei alam montri atum angho pen arjulongbom, lasi kardomhemthepi kekim thekji aphan nangtum nangri-heihei chepangtang non.

¹⁰Pima halabangso arni aphrang kechongdat amonit anam ave lapen kehelat atum hotur pen kejokji thangta ave, athe Ne lahin lahin abe pathurlo.

¹¹Bonta non Ne la ahin arat aphan aphrang arni ahut asonthot klemklelo, pusi muluk a-HEMPHU pulo.

¹²Pima hadak ningkangsam pen chili rikpo; drakha arikang athe pathepo, lapen longle pen kepathe nangji ason chanpo, lapen sining pen ar-e nangklopo, lapen Ne bangso ahin arat atum la do-an pachepahemphu longpo.

¹³Lapen O Judah akhei lapen Israel akhei, aphrangke det-heihei atum hijim ahirjuno kechepi asonthotsi nangtum plang-lo, seta Ne nangpajokpo, lapen nangtum isi ahirjume plangpo. Phereri, bonta nangtum ari-heihei chepangtang non.”

¹⁴Pima lasonsi muluk a-HEMPHU pulo: “Nangtum aphusar atum Nening kepathi ahut Ne halatum aphan kehingno klempo pu Nening chesik-lo, lapen Nening chiruiredet-lo, muluk a-HEMPHU pulo,

¹⁵lasonthotsi Ne puthot bangso ahut Jerusalem aphan lapen Judah akhei aphan akeme keklemjisi nening chesik-lo; phereri.

¹⁶La-heihei helo nangtum keklem nangji ason: Lahin lahin ahok alam chepunon, nangtum anghap-heihei along akangsai ahokpet lapen ningkangsam aphanle klemnon, lahin lahin aphan ning arlo kehingno abidi mathari lapen chobei aseme ningdok-ri, athe lahei hei Ne kehijim amarlo pusi HEMPHU pulo.”

¹⁷Baduta tebok abang aphan aning arlo kehingno abidi pinchongri lapen kechobei aseme kedeng aphan ning dok-ri pima la kedo-an Ne kehijim amarlo pusi HEMPHU montrilo.

¹⁸Lapen muluk a-HEMPHU alam nelilong vangsi pulo,

¹⁹lasonsi muluk a-HEMPHU pulo: Phli achiklo an-kehum lapen pho achiklo an kehum, lapen throksi achiklo an-kehum lapen kep achiklo an-kehum la Judah akhei aphan ning arong lapen kechehok ahut lapen ningkedok akecho-kejun ahut plangpo. La apotsi nangtum ahok lapen ningkangsam aphan ningdok nangji.

²⁰Muluk a-HEMPHU lasonsi pulo: Tebonseta rat lapen ongdung arongsopi asor vangvekjilang.

²¹Lapen elong arongsopi asor along kaprek arongsopi asor along damsi pupo, “Ili non amat HEMPHU akangjinso kelongjile choningridam lonang lapen muluk a-HEMPHU aphan ridamlonang; Ne kedamlo.

²²Ongdung arat lapen ingtangrak akhei-heihei muluk a-HEMPHU kerijisi Jerusalem vangpo, lapen HEMPHU akangjinso kelongjisi choningripo.”

²³Muluk a-HEMPHU lasonsi pulo: “Halabangso arni adet adet alam keningje atum angbong bangkep amonit atum Judah abang keche-um ape-ari ot-hetsi pupo, ‘Nelitum nanglilong dunpo, pima Arnam nanglilong do pu nelitum arjulong-lo.’ ”