Read Karbi ZEKARIAH 9 Bible Online

ZEKARIAH 9 - Karbi bible

ZEKARIAH 9

¹HEMPHU abirta Hadrak adet abe thursi vang-lo, lapen Damaskas aputhak la sa-lo. Athe Arnam arongsopi an Alanglilo, lapen Israel akhei ta.

²Lapen ahoi adung adet Hamath arongsopita, Tair lapen Sidon latum kethek-kere doseta.

³Tair ke arpongkethe chebuitang-lo, lapen ser-rup tovar along aduk ason paplang-lo.

⁴Bonta chininon, la kedo-an HEMPHU si thipon-etpo lapen akhi talo varchuipo, lapen me laphan pachopo.

⁵Ashkelon ta thek-longpo lapen pherepo; Lapen Gaza aphanta adukpi po; Ekron jokta, athe ningthenak-lo. Lapen Gaza arecho virdetpo; Ashkelon asor apakta avedetpo.

⁶Isi kechingvui arat atum Ashdod dopo; lapen Philistia kechepindak pajutdetpo.

⁷Ne laso angho pen avi enpo, lapen aso adak pen la kehijim amar enpo; Lata etum a-Arnam aphan ahim plangpo; la Judah akur isi plangpo, lapen Ekron Jebusi abang ason plangpo.

⁸Ansi Ne Nehem Nemukam chekimchen po kehon abang ason, lapen baduta hatput longledetpo; Kechenek abang puthot la angbong dam longledetpo, pima non ne Nemethang amek pen thek-long-lo.

⁹Jasemet ning arongnon, O Zaion arongsopi! Asepathera hangnon, O Jerusalem arongsopi, Langtha, nang recho nanglong vang-lo, kehai aning karong, lapen Alangli haitang-lo, Chepabihek lapen gadha athak ardonlo, gadha aloso athak ardonlo.

¹⁰Neli Ephraim pen ron alosei ahemkonglong lapen ron athai pavedetpo lapen alangli det-heihei aphan ningkangsam alam toipo. Alangli talo pen talo an lapen langroi pen ha pirthe kejut anta recho chopo.

¹¹Nangphan ke, nangpen Ne Kechejok Aloh avi pen apot Ne nangtum angbong pen kepontang ban atum aphan lang kave ahilik pen lo-etpo.

¹²Paisong anat chiruithunon, O ningkethe keneptang atum; Pini nangtum aphan phanni nangkepithujisi pachethang-lo.

¹³Pima Judah aphan Ne thai asonsi pangkang-lo; Ephraim aphan ning parungji, O Zaion nangsomar aphuthak, O Grik, lapen ron kechedan-i anokjir ason paplangpo.

¹⁴Ansi HEMPHU halatum aphan cheklangpo, lapen Alangli thai aso sining kebirlak ason dampo; HEMPHU Arnamsi pong-ut arki padopo, lapen nitur alongri amongve ason nangbarpo.

¹⁵Muluk a-HEMPHU si halatum aphan raipo, lapen halatum phamri ke-ot atum aphan chopo lapen donglam-lampo; lapen halatum latum avi drakha alang ason junpo, lapen harlung ason plengsetpo, lapen se-karkli adovan ano ason thak thakpo.

¹⁶Halabangso arni halatum a-Arnam HEMPHU si halatum aphan pajokpo pima halatum Alangli rat ahurlo; lapen recho aphuthak bor ason thak thakpo halatum Alangli longle athak turbongpo.

¹⁷Kalang, la ko-an akeme lapen ko-an aning kedok! Sok-sang risomar atum lapen drakha alang kemi okarjang atum pa-ongpo.