Read Karbi MALAKI 1 Bible Online

MALAKI 1 - Karbi bible

MALAKI 1

¹Israel aphan Malaki pen ajok HEMPHU kethak alam.

²“Ne nangtum aphan chinghonlo,” HEMPHU pulo, Bonta nangtum pulo, “Nang kosonsi nang inghonloma?” Iso lapen Jakob atum korte kalima? HEMPHU-si pulo. “Ne Jakob aphan chinghonlo,

³bonta Iso aphan hijimlo: lapen anglongta ho-or pavedet-lo, lapen kejejangtang ajo asirung atum aphansi padotoilo.”

⁴Jongsi Edom pulo, “Netum abeng saidelo bonta kevir-rang an kimthupo,” muluk a-HEMPHU-si kepulo, “Halatum kim tahai bonta Ne phri-etji, halatum kehingno alongri lo pu papulongset an, HEMPHU aningkethi bangso arat aphan doverpo.”

⁵Nangmethang amek pen la thek-longpo, lapen nangtum pupo, “Israel ahoi apar anta HEMPHU anong thepik-lo!”

⁶Asopo apo aphan man pi, lapen ban ta ahemphu aphan man pi. Jongsi Ne inut apolo tangte Ne man konat-lo? Lapen jongsi inut ahemphu tangte Nephan kephere konat? Muluk a-HEMPHU-si nangtum aphan pulo. O Nemen kelangrem akurusar atum. Nangtum pulo, “Netum kopusonsi Nangmen langrem loma?”

⁷Kangthirthe a-an Ne dovan athak kepi pen ajok. Lapen nangtum pulo, “Netum kopusonsi la pangthirthelo?” HEMPHU adovan langrem un pu kematha pen ajok.

⁸Nangtum keselok api karkliji aphan kevan ahut, la kehingno kalima? Lapen nangtum ketekok mate kesodet api kevan ahut, la kehingno kalima? Lahei nangtum a-Govornor aphanle pinon; alangli la aning dok poma mate nangphan kangjinso paklang poma? Muluk a-HEMPHU-si kepulo.

⁹Lapen non etum aphan Arnam kangjinsoji Alangli ning kepadokji aphan hangnon. Nangtum ari pen lason adan kevan, nangtum angbong mane aphan Alangli kangjinso paklangjima? Muluk a-Hemphu-si kepulo.

¹⁰Oh nangtum angbong pen inutbak nedovan athak ale kave pin pen me kekaikedet-jile (Kardomhem) anghap-heihei inghapphlup asonte me-o ji! Ne nangtum along thang ning arong ave, muluk a-Hemphu-si kepulo, lapen nangtum arideng pen kevan adan Ne dengde.

¹¹Athe Nihang pen Nichi an, khei-heihei angbong Nemen thelo, lapen alongtinta Ne men aphan mephik thorlo, lapen kangthir adan pilo; athe khei-heihei angbong Nemen thelo, pusi muluk a-HEMPHU pulo.

¹²Bonta HEMPHU adan ke ingthirthe lapen kecho ahormu hijimlo pu kepu ahut nangtum Nemen pangthirthe-det-lo.

¹³“La kopi kelak-khrup nang-loma,” pusi nangtum pulo, lapen nangtum Nenat nangnokan chebilo, pusi muluk a-HEMPHU pulo. Nangtum nethi bor-i pen mate ketekok mate kesodet, lapen la nangtum athok-ajir lo pusi nangtum vanlo! Lahei nangtum arideng pen Ne deng apot loma? HEMPHU pulo.

¹⁴Kepacherei abang aphuthak ahirjuno padonang! Atheke alangli hur angbong alo abiresak do seta chechaksi api si HEMPHU aphan karklijisi pilo; athe Ne helo kethenei arecholo, muluk a-HEMPHU si kepulo, lapen khei-heihei atum angbong Ne men aphan phere.