Read Karbi MALAKI 2 Bible Online

MALAKI 2 - Karbi bible

MALAKI 2

¹Lapen non, O kurusar atum, labangso alamtoi ke nangtum aphanlo.

²Nangtum jongsi arjuje, jongsi Nemen anong kepathejile nangtum mathathe pulote, Muluk a-HEMPHU-si kepulo, Ne nangtum aphan ahirjuno nangtoipo lapen kepitang ahirjume-heihei aputhak pahirjunopo; chenamsi Ne halatum aphan pahirjunotang-lo, pima nangtum nangning arlo la chebibedet-lo.

³Chininon, nangtum achili aphan Ne ingchek po, lapen nangtum karkliji aphan kevan api-heihei ahi pen nangtum amahang hi thippo, lapen Ne ingno pen nangtum aphan la along pondet po. Lapen Ne nangtum aphan bangso ahukum pilo pu nangtum chinipo.

⁴Lapen Ne nangtum aphan bangso ahukum pilo pu nangtum chinipo. Pima Ne Kechejok aloh Levi pen pathiktang ason doverpo, pusi muluk a-HEMPHU pulo.

⁵Ne alangli pen Kechejok aloh ke chethe lapen ningkangsam lapen halatum Nephan kephere thekjisi Ne alangliphan lahei pilo; lapen alangli Ne men aphan man pipo.

⁶Ahok akethan alangli angho along dolo lapen alangli ingho pen ahok-he ason barbelo. Alangli ningkangsam lapen athikpetsi nelipen kengkam chejorlo, lapen ongdung atum kehingno keklem pen khang-lo.

⁷Pima kurusar angho kechinithek donangji, lapen monit atum alangli angho pen akethan ri nangji, pima alangli ke muluk a-HEMPHU apherangke lo.

⁸Bonta nangtum bangso atovar pen suitang-lo; nangtum akethan pen ajok ongdung atum aphan pap paklemlo; nangtum Levi kechejok aloh ingditang-lo pusi muluk a-HEMPHU pulo.

⁹Lasi Ne ta nangtum aphan pahijimlo lapen kadokave angno pabitang-lo, atheke nangtum Ne tovar-heihei rimredet-lo bonta nangtum akethan along kepaprek chepaklang-lo.

¹⁰Ilitum apo inutnat kalima? Inutpet Arnamsi etum aphan epinchong-lo kalima? Tangte etum pi athesi lahin lahin akekroi avedet-loma, lapen etum ephusar atum kechejok aloh hijimlo!

¹¹Judah atum akekroi avedet-lo, lapen Israel atum lapen Jerusalem asor kehijim meme akam klemtang-lo, pima Judah HEMPHU kechinghon kangthir adim pahijimtang-lo, lapen bang adet a-arnam asopi aphan piso pangritang-lo.

¹²Bangso akam keklem abang mate muluk a-HEMPHU along dan kevan abangphutin aphan HEMPHU, Jakob pe ahem pen pavir nang.

¹³Lapen nangtum la ta klemtang-lo. Nangtum amek-kri pen kechiru lapen kar-em-heihei pensi HEMPHU adovan dip-phlup-lo, pima Alangli dan-heihei langle mate jinso si nangtum arideng pen dan dengdelo.

¹⁴Nangtum pulo, “Kopi athesi alangli dengdeloma?” Athe HEMPHU-si nang lapen nangriso ahut kepangri apiso angbong kechejok ahakilo; lapen bangpi aphan kechechak ateng nangli akekroi chepavedet-lo, tebonseta kechejok aloh pen ajok labangpi nangli pen dorapver lapen nangli pisolo.

¹⁵Inut pet a-Arnamle kepinchongpet lapen karjong achethe ephan epareng-lo kalima? Lapen Alangli kopisi ninghang-loma? Ahokpet Arnam asomar. Lasi nanglitum methang aphanle chematharep non, lapen baduta riso ahut pen apara kedolang apiso aphan akekroi chepavedet-rinon.

¹⁶Pima Ne piso kechiti hijim-lo, la Israel atum a-Arnam HEMPHU-si kepulo, lapen kephangno akam amethang ape pen dipthip-lo pusi muluk a-HEMPHU pulo. Lasi nangtum methang aphanle chematharep non lapen akekroi chepavedet-rinon.

¹⁷Nangtum alam pen nangtum HEMPHU aphan palak-lo. Tebonseta nangtum pulo, “Netum kopusonsi Alangliphan palak-loma?” “Badutame kehingno akam keklem lake HEMPHU amek angden mesen lapen Alangli lahei aning arong-lo,” pu kepu pen ajok mate “Kodaksi ahokpet a-Arnam kedolo?” pu kepu pen ajok.