Read Karbi MALAKI 3 Bible Online

MALAKI 3 - Karbi bible

MALAKI 3

¹Chininon, Nephrang tovar kesikji aphan Ne, Nepherangke toilo, lapen nangtum keribom a-HEMPHU tongsekotsi Alangli Kardomhemthepi along vangpo; lapen nangtum nangning kedok kechejok aloh apherangke ta chininon, Alangli vangbomlo pusi muluk a-HEMPHU pulo.

²Bonta komatsi Alangli kevang arni an chechakthek jima, lapen Alangli kecheklang ahut arjapthek poma? Pima Alangli rup aju kepavepin kethakji kepaso-i ame ason lapen pe kechok abang kekhornei asabon ason;

³Alangli aju kepavepin kethakji lapen rup kecham abang asonsi ingnipo, lapen Alangli Levi asomar atum an aphan pangthirpo lapen halatum HEMPHU aphan ahokpet adan kevanthekji aphan ser lapen rup kepangthir asonsi pangthirpo.

⁴Ansi hako arni lapen aphrang-phrang aningkan ason thak-thak Judah adet lapen Jerusalem adan HEMPHU aning padokpo.

⁵Lapen Ne kangsaijisi nangtum adung patebokpo; lapen paludep atum aphan, beisa atum aphan, chobei aseme kedeng atum aphan, chongdatchot lapen heme jangreng lapen bang adet amonit atum aphuthak kechenek atum aphan, lapen Nephan kepherere atum aphan Ne prapjin pen haki chopo, pusi muluk a-HEMPHU pulo.

⁶Pima Ne HEMPHU-ke chelarle, la apotsi nangtum, O Jakob asomar atum nangtum vir-et-khangjang-lo lapu kali.

⁷Nangtum aphusar arni pen nangtum Ne hukum pen suilo lapen halahei kroikretang-lo. Nelong chiruinon, lapen Neta nangtum along chiruipo, pusi muluk a-HEMPHU pulo. Bonta nangtum pulo, “Kopusonsi netum chiruithek poma?”

⁸Monit Arnam amar thisi ponpoma? Bonseta nangtum Nemar thisi pontang-lo. Bonta nangtum pulo, “Kosonsi netum Nangmar thilo?” Nangtum phankep pen ephan lapen Dan-heihei pen ajok.

⁹Nangtum isi ahirjuno pensi photang-lo, pima Nemar nangtum thibomlang, lapen bangso adet arat kedo-anta lo.

¹⁰Nehem kecho ahormu kedojile phankep pen ephan plenglim vannon; lapen ajok Nephan sat langnon pusi muluk a-HEMPHU pulo, Ne nangtum aphan sining anghap-heihei ingpu nangjima nangnema lapen nangtum rim un-eset an ahirjume nangdung nangjima nangnema?

¹¹Ne nangtum pen apot ingki ingket aphan ingchekpo, lapen la nangtum alongle thesere phangnone-detpo, lapen nangrit adrakha arikang athe pathethe pin pen dodelo pusi muluk a-HEMPHU pulo.

¹²Lapen kadokave adet atum an nangtum rengme pusi pupetpo, pima nangtum ningkedok adet cheplangpo pusi muluk a-HEMPHU pulo.

¹³Nangtum Nebethursi lam kangtang pen ningjelo pusi HEMPHU pulo. Seta nangtum pulo, “Kosonsi netum nangbethursi ningjeloma?”

¹⁴Nangtum pulo, “Arnam aphan kangduk ale ave. Alangli kepu alam kekroi mate muluk a-HEMPHU angno netum chokchelo pu chiru-charnap pen chepaklang ale kopi?

¹⁵Non netum kethek-long ke ane kechepathe atumsi rengme; kehingno keklem atum thebom lapu anchot kali bonta halatum Arnam aphan asat kelang ahut seta halatum jok-lo.”

¹⁶Ansi HEMPHU aphan kephere atum lahin lahin chepulo; lapen HEMPHU halatum aphan anochedensi arjulo, HEMPHU aphan kephere lapen Alangli men aphan kematha atum an aphan Alangli angno chekimo aloh athui along tokdet-lo.

¹⁷Ne keklemji arni halatum akenangsot akhi plangpo pusi muluk a-HEMPHU pulo, lapen apo aphan kangduk asopo aphan apo kerai ason thak thaksi Ne halatum aphan raipo.

¹⁸Ansi nangtum puthot athikpet lapen kehingno atum angbong lapen inut Arnam aphan kangduk abang pen kangdukde abang atum angbong akeprek thek-longpo.