Read Karbi MATHIU 10 Bible Online

MATHIU 10 - Karbi bible

MATHIU 10

¹Jisu amethang asangho bang krehini atum aphan amethang adung chehangsi kangthirthe ahi-i atum aphan kephlungji, ason ason akeso lapen ajakong kekomdet akeso hei hei kepameji ajakong pilo.

²Ketoitang bang krehini atum amen lahelo: aphrangsi ke Pitor pu abang, Simon lapen akorte Andriu; Jebedi asopo Jems lapen akorte Jon;

³Philip lapen Bartholomeu, Thomas lapen midu kerung abang Mathiu; Alpheus asopo Jems lapen Thadeus;

⁴det-chinghon a-Simon lapen Judas Iskariot, Jisu aphan hotur arideng kehodai abang.

⁵Jisu la bang krehini atum aphan hukum pisi pulo, “Jihudi kalidet atum angbong damri, lapen Samaria atum arongsopi lutdamri,

⁶bonta la alar Israel akhei kangbotang abiresak atum along le damnon.

⁷Lapen nangtum kedam ahut pachethang ra punon, ‘Sining arat tebok-het-lo.’

⁸Nangtum keso atum aphan pamenon, kethitang atum aphan ingthurnon, si-i kelong atum aphan pangthirnon, lapen hi-i atum aphan phlungnon. Akejoisi nangtum long-lo, akejoile pinon.

⁹Nangtum nang methang methang ajamborong along ser, rup, kalite tam thap ponri,

¹⁰lapen tovar aphan jamborong, choi asele, keng-op lapen chin ponri. Pima kam keklem abang kecho longji a-ot do.

¹¹“Nangtum mo rongsopi, rongsoso lutdam lote nangtum aphan ning kangsam pen nangkechak abang ahemle lutdamnon, lapen nangtum hadak pen barbetik ke alangli hem le donon.

¹²Labangso ahem kelutdam ahut kardom chepinon.

¹³Lapen labangso ahem amonit atum jongsi nangtum aphan chak-lo tangte la aphuthak nangtum aning kangsam padonang, bonta nangtum aphan chakche tangte nangtum aning kangsam nangtum along pachevoi-thunang.

¹⁴Lapen nangtum aphan chakche, kalite nangtum alam arjuje tangte nangtum labangso ahem pen tame, mate arongsopi pen tame kebar ahut nangtum akeng alongle aduk cheho tekangnon.

¹⁵Chenamsi ne nangtum aphan nangpulang, mo kangsai arni labangso arongsopi aphan apar Sodom lapen Gomorrah alongri atum aphan ingjinso mu-chotji.

¹⁶“Chini tha! Ne nangtum aphan mahar ahur angbong biresak atum asonsi nangtoilo. Tangte nangtum pherui asonthot kere, lapen vothung asonle asotdut cheplangnon.

¹⁷Bonta monit atum aphan cherenon, pima halatum nangtum aphan arong arong amei arideng nang hodaiji, lapen Sinagog hei hei along nangtum areng pasoji,

¹⁸lapen nangtum halatum lapen Jihudi kalidet atum angno haki kepijisi nangtum aphan det ahemphu lapen recho atum angno nangponji.

¹⁹Bonta halatum nangtum aphan kehodai ahut nangtum kopusonsi, mate kopisi ningje nangjima, lake ning biri. Pima halabangso apor mamat nangtum keningje nangji alam nangtum aphan nangpidetji,

²⁰pima nangtumle keningje nangji kali, bonta nangtum a-Po a-Karjongsi nangtum pen ajok ningjepo.

²¹“Kepathijisi akorte abang akorte aphan, lapen apo abang aso aphan hodaiji; lapen asomar atum api-apo ahotur cheplangsi halatum aphan pathiji.

²²Lapen ne men pen apot kadokave atum nangtum aphan hijimpetji, bonta kejut anta keche-chakthip abang jokji.

²³Nangtum aphan elong arongsopi nangkechenek ahut arongsopi kaprek-le katnon; lapen chenamsi ne nangtum aphan nang-pulang, nangtum Israel arongsopi an damtupte ako Monit a-Sopo vangji.

²⁴“Athanbang apar asangho themu, kalite ahemphu apar aban themu, lapu kali.

²⁵Lahelo asangho abang athanbang ason thakthak lapen aban abang ahemphu ason thakthak plangthek lote latum aphan chok-lo. Jongsi latum hem ahemphu aphan Beelzebul pusi hang-lo tangte hem asangho atum aphan la apar kopu-an akehingno alam pudetji.

²⁶“Tangte monit atum aphan phereri, pima non kepaklangkle-detsi kedipthip amar an mo thek long petji, lapen kepachininedet, akepatu amar anta chini petji.

²⁷Ne nangtum aphan nangkethanjoi alam kethe-ang angbong punon, lapen nangtum ano pen karjulongjoi alam hem asarnung pen pachethangnon.

²⁸Lapen abang arpum pathithek, bonta karjong aphan kepathi thekthe abang aphan phereri, la alar abang arpum lapen akarjong aphanta Chom arlo kepavirthek a-Bang aphanle pherenon.

²⁹Sok puru avo jonni poisa isi ador pen jorlo, kalima? Tebonta nangtum a-Po aning hanghete latum angbong ejon natta longle athak klokledetji.

³⁰Nangtum aphan ke nangtum aphu achu ajeng anta lakhapet tang-lo.

³¹Tangte, phereri, sok puru avo ake-ongpi apar nangtum ador somu.

³²“Lahelo badutame monit atum angno nephan Hemphu pu kehang abangphutin aphan neta sining athak kedo ne-Po angno ne pusi hangji;

³³bonta badutame monit atum angno nephan Hemphu pu hanghedet tangte, neta sining athak kedo ne-Po angno labangso abang aphan ne pu hanghedetji.

³⁴“Ne pirthe athak ning kangsam kevanji aphansi vang-lo puke mathari; ning kangsam kevanji aphanle ne kevang kali, bonta nokjirsi vanlo.

³⁵Pima apo ahotur asopo, lapen apei ahotur asopi, lapen anipi ahotur amunpi kepaplangjisi ne vang-lo,

³⁶lapen monit ahotur amethang asangho atum helo kecheplangji.

³⁷“Nephan apar api apo aphan kechinghon munak abang ke ne sangho plang un-e.

³⁸Lapen badutame amethang athengparpan cheponra nephi phi kedunde abang ke nesangho plang un-e.

³⁹Badutame amethang apran kecheraiji kebor-i abang ke la pangbodetji, lapen ne pen apot amethang apran kepangbodet abang ke la longji.

⁴⁰“Badutame nangtum aphan kechak abang ke nephan chak-lo, lapen nephan kechak abang ke nephan nangketoi abang aphan chak-lo.

⁴¹Montri pu mathasi montri aphan kechak abang ke montri anam longji, lapen dhoromi pu mathasi dhoromi abang aphan kechak abang ke dhoromi anam longji.

⁴²Lapen badutame la kebinei atum angbong inut abang aphan Jisu asangho pu mathara lang kangsam harlung isi kepi abang ke, jonghe setta anam longledetji, lapu kali.”