Read Karbi MATHIU 12 Bible Online

MATHIU 12 - Karbi bible

MATHIU 12

¹Halabangso ahut Sabbath arni Jisu sok ajo dong ponputsi damlo, lapen asangho atum an ingchirsi sok abu chongthon ponlo lapen la henotsi kechoji pangcheng-lo.

²Bonta Pharisi atum la thek-longsi alangliphan pulo, “Langnon, nangli sangho atum Sabbath arni aron kalidet akam klemlo.”

³Jisu thaksi pulo, “David lapen ari asangho atum an kangchir ahut alangli kopisi klemlo, lake nangtum porhehe pin langma?

⁴Atheke, alangli Arnam ahem lut damsi halatum Arnam aphan kepanongtang ahim hei hei cholo; lake alangli, kalite ari asangho atum cho kertang, kurusar atum ansi cholongchot.

⁵Kalite kurusar atum kardom ahem thepi arlo Sabbath arni klem kertang akam klem setta adai ave, lake nangtum aron angbong porhehepin langma?

⁶Bonta ne nangtum aphan nangpulang, kardom ahem thepi apar kopine akethemu daksi do.

⁷Hastro pulo, ‘Ne athok ajir kali, kangjinsosi ning hang-lo.’ Labangso alam athele nangtum chini asonte adai kave atum aphan adai padodedetji apot-lo.

⁸Pima Monit a-Sopo ke Sabbath arni ahemphulo.”

⁹Lapen Jisu halabangso adim che-osi Sinagog arlo lut damlo.

¹⁰Lapen chini iktha, hadak inut pinso amonit ari kekrenghak abang dolo. Halatum alangliphan adai ketinji abidi risi alangliphan arjulo, “Sabbath arni keso kepame aron doma?”

¹¹Alangli halatum aphan thaksi pulo, “Nanglitum kopisi mathalo? Jongsi ejon abiresak Sabbath arni hilik jangthot lote, ahemphu laphan hilik pen kerungredetji, lason abang nanglitum angbong komane doma?

¹²Tangte biresak apar monit ador kopu-an somu! Lahelo Sabbath arni kam klem long-lo.”

¹³Ansi alangli halabangso abang aphan pulo, “Nangri chephajeng non.” Alangli ari chephajeng-lo, lapen la ahong kaprek ason thakthak methulo.

¹⁴Bonta Pharisi atum ingtan damsi alangliphan kepathiji abidi chingvailo.

¹⁵Bonta la chinisi Jisu hadak pen katjuilo, lapen ake-ongpi atum alangli phi phi dunlo. Alangli keso atum an aphan pamethu-et-lo,

¹⁶lapen alangli lamjir thanri pusi alangli halatum aphan sodak ahukum pilo.

¹⁷Lake Isaiah montri keputang alam kepachekokji aphanlo, atheke alangli pulo,

¹⁸“Langnon, ne kangvaitang aban, ne kechinghon abang; laphan ne ning dok-lo. Alangli phuthak ne Karjong batji, lapen alangli adet kaprek kaprek atum aphan athikpet akangsai alamjir than pachethangji.

¹⁹Alangli lam chedan dundedetji, lapen hangser-sedetji, lapen baduta tovar along alangli kehang ase arjulongledetji,

²⁰alangli athikpet akangsai pahaidet detik ke, keroptang a-arpik alangli ingdipetpedetji, lapen amehi ketokmon ahonjengta pamepmedetji,

²¹lapen alangli men aphansi adet kaprek kaprek atum aning chetheji.”

²²Ansi halatum Jisu adung amek kave pen alam kave inut ahi-i kepho-lok abang aphan vanlo, lapen alangli laphan pamethulo, ansi la alam kave abang ningjelo lapen amek checharlo.

²³Armu kadokave atum manghuphrong-lo, lapen halatum puhurlo, “Lake David a-Sopo kalima?”

²⁴Bonta Pharisi atum la arju longsi pulo, “Hi-i atum arecho, Beelzebul pen ajoksi labangso abang hi-i atum aphan phlung-lo.”

²⁵Jisu halatum akematha chinisi alangli halatum aphan pulo, “Arat aling tame, amethang angbong chebohongseira chebahak lote la dorap thekthedetji,

²⁶lapen Soitan jongsi Soitan aphan phlung lote la amethangsi chebahak tang-lo. Tangte alangli rat kopusi arjap thekpoma?

²⁷Lapen ne jongsi Beelzebul pen ajok hi-i phlung-lo tangte, nangtum asomar atum komat pen ajoksi halatum aphan phlung-loma? Lahelo halatum nangtum aphan kangsai abang cheplangji.

²⁸Lapen ne jongsi Arnam ajakong pen hi-i atum aphan phlungbomlo, tangte Arnam arat nangtum angbong vangtang-lo.

²⁹Badutame, kopusonsi hala ajakong kethe abang ahem lutdamra amar kethi pon thekjima? Aphrang alangli hala ajakong kethe abang aphan ingnanghet nangji, ansi alangli hala amar alingta thipon-un ji, kalima?

³⁰Badutame, nebe kalidet abang ke ne hoturlo, lapen nelong nangkechingrum dunde abang aling ke pratseiji.

³¹La apotsi ne nangtum aphan nangpulang, monit atum kadokave apap lapen Arnam aphan kepinrem apot ke diya longji, bonta Karjong aphan kepinrem apot ke diya longledetji.

³²Lapen badutame, Monit a-Sopo abekethur ke diya longji, bonta Karjong Kangthir abekethur-ra keningje abang ke non akai, kalite mo kevangji akai setta diya longledetji.

³³“Mesen athengpike atheta mesenji, kalite athengpi jongsi hingnodakte atheta hingnodakji; pima athe pen ajoksi athengpi chiniji.

³⁴O pherui akhei! Nangtum hingnodak-le kopusi akeme alam ningje thekpoma? Pima nangtum aning arlo kedo tang alamsi nangtum angho pen ningjelo.

³⁵Kemesen amonit ke amethang akhi keme pen ason ason akeme pachon lapen akehingno amonit abang ke amethang akhi kehingno pen ason ason akehingno pachon.

³⁶Bonta ne nangtum aphan nangpulang, mo kangsai arni monit atum ale kavedet alam athetin alakha chepinangji,

³⁷pima nanglam hei hei pen ajok nangphan dhoromi pu lakhaji lapen nanglam hei hei pen ajok nangphan ado padoji.”

³⁸Ansi manene aron thekser lapen Pharisi atum alangliphan pulo, “Thanbang, nangrideng pen kopine angthek kethek longjisi netum ning hang-lo.”

³⁹Bonta alangli thaksi halatum aphan pulo, “kehingno lapen a-ot kave a-ove atumsi angthek ribom, bonta Jonah montri angthek apar laphan thangnat angthekta paklang-kledetji.

⁴⁰Pima Jonah lang a-ok thepi apok arlo jothom nithom kedo asonthotsi Monit a-Sopota jothom nithom longle arlo doji.

⁴¹Mo kangsai arni Nineveh asor labangso a-ove pen pen thursi latum aphan ado padoji, pima halatum Jonah kepachethang pen ajok aning chiruilo, lapen chini tha, Jonah apar akethemuchot daksi do.

⁴²Mo kangsai arni Nirep arechopi labangso a-ove pen pen thursi latum aphan ado padoji, pima alangli Solomon akethek-kere karjujisi pirthe ahoi an pen vang-lo, lapen chini iktha Solomon apar akethe daksi do.

⁴³“Kangthirthe ahi-i monit pen nangbardet aphi lang kavedet adim damsi Kesangji adim ridamlo, bonta la nohokta adim longledet-lo.

⁴⁴Ansi la pulo, ‘Mo ne nangkebar ahem along puthot chedam thupo.’ Lapen la vangthusi hem angse, arkok-et lapen pangthir etsi rim-bi pame thek long-lo.

⁴⁵Ansi la damsi amethang apar adur kehingno muchot ahi-i bang throksi ari chevansi hadak chelut damthupo, ladak dopo lapen aphisi labangso amonit aphrang apar hingno muchotpo. Lapusonthotsi labangso adur kehingno a-ove ta plangpo.”

⁴⁶Jisu armu atum aphan kepu bom ahut, chini iktha, alangli pei lapen amumar atum ingtan nang arjapsi alangli pen kechingkiji abidi rilo.

⁴⁷Ansi armu angbong inut abang alangliphan pulo, “Langtha, hala nangli pei lapen nangli mumar atum nangli pen kechingkiji aphan ingtan arjapphrong-lo.”

⁴⁸Bonta alangli halaphan thaksi pulo, “Neli pei komat-lo, lapen neli mumar komat-lo?”

⁴⁹Lapen asangho atum anat ari jongsi alangli pulo, “Langtha, neli pei lapen neli mumar atum lahelo!

⁵⁰Pima sining athak kedo neli Po aning kehang keklem abang aling helo neli korte, neli ingjir lapen neli pei lo.”