Read Karbi MATHIU 16 Bible Online

MATHIU 16 - Karbi bible

MATHIU 16

¹Pharisi lapen Saduki atum Jisu along vang-lo. Latum Jisu aphan asat kelangjisi sining pen angthek kepaklangji aphan choningrilo.

²Bonta alangli thaksi latum aphan pulo, “Arni kangsam ahut nanglitum pupo, ‘Botor mesenji; pima sining erhang-lo.’

³Lapen adapprang ahut nangtum pupo, ‘pini botor hingnoji; pima sining ingting-olo.’ Nanglitum sining angthek ke chini lapen thanthek, bonta labangso akai angthek ke thangnatta pu thekthe.

⁴Kehingnodak lapen adur kave a-ove atum ke angthek ribomlo, bonta Jonah angthek pen apar ke pipedetpo.” Ansi alangli latum aphan otekangsi damjuilo.

⁵Asangho atum ha parai nangledet aphi latum him van tengnedet pu thek long-lo.

⁶Jisu latum aphan pulo, “Pharisi lapen Saduki atum athap aphan lang pamera cherenon.”

⁷Latum angbong chethanseisi pulo, “Etum him vanvedet-lo.”

⁸Bonta Jisu la chinisi pulo, “Nangtum him kavedet apot-le kopisi chethansei loma? O kekroi kekom atum!

⁹Nangtum chinine langma? Hala him plangpho pen bang suri pho aphan kepi alam chematha-thuthema? Lapen nangtum ton ko-an pangrumthu loma?

¹⁰Kalite hala him plang throksi pen bang suri phli aphan pidet aphi nangtum ton ko-an pangrumthu loma, la nangtum chematha-damdema?

¹¹Tangte ne nangtum aphan him alamjirle kepudam kali pu nangtum kopusi kechininedet-loma? Pharisi lapen Saduki atum athap aphanle cherenon.”

¹²Ansi latum him athap aphanle kepacheretoi kali, bonta Pharisi lapen Saduki atum kethan alam pensi kepacheretoilo pu chinilo.

¹³Ansi Jisu Kaisaria Philipi alongri vangsi asangho atum aphan arjulo, “Monit atum, ‘Monit a-Sopo’ aphan komat pusi pudamma?”

¹⁴Lapen latum thaksi pulo, “Manene atum pulo, Jon Baptist, manene atum pulo, Elijah; lapen akaprek atum pulo, Jeremiah, kalite Arnam amontri atum angbong inut abang.”

¹⁵“Tangte nangtum ke?” alangli latum aphan pulo. “Ne komat abang pusi nangtum mathalo?”

¹⁶Simon Pitor thaksi pulo, “Nang ke Khristo, kerengver Arnam a-Sopolo.”

¹⁷Ansi Jisu alangliphan pulo, “Ahok-lo, Jona asopo Simon! Pima ok lapen vi pen kali, bonta sining athak kedo ne-Posi nangphan la paklang-lo.

¹⁸Lapen ne nangphan nangpulang, nang ke Pitor, labangso a-arlong athaksi ne nemondoli kimpo lapen chom ajakongta laphan hai un-e detji.

¹⁹Ne sining athak aphlok nangphan nangpiji, lapen pirthe athak nang kekok aling sining athakta la kokji, lapen pirthe athak nang kephlok aling sining athakta la phlokdetji.”

²⁰Lapen alangli helo Khristolo pu alam badu aphanta thanri pusi asangho atum aphan sodak ahukum pilo.

²¹Halabangso ahut pen anke Jisu Jerusalem dam nangji lapen akesar atum, kurusar kethe atum lapen aron thekser atum arideng kesung chechakpik nangji, thi nangji lapen nithom arni alangliphan pathurji pusi alangli asangho atum aphan kepaklangji pangcheng-lo.

²²Ansi Pitor alangliphan elong adim ponsi alangliphan kangchekji pangchengsi pulo, “Arnam la pakhang nang, Hemphu! Lapuson nangphan paplangplevek-nang.”

²³Bonta alangli chetevarsi Pitor aphan pulo, “Nemek angden pen damnon, Soitan! Nang ne kedamji atovar kekhang abang-lo; pima la nang akematha ke Arnam penle kevang kali, bonta monit pensi vang-lo.”

²⁴Ansi Jisu asangho atum aphan pulo, “Mane abang jongsi ne phi phi kedunji aning hang-lo tangte, alangli amethang aphan pachetengnedet-ra, lapen amethang athengparpan cheponra ne phi phi padunkrinang.

²⁵Pima badutame amethang apran kechepajokji aning kehang abang aling ke la pangbodetji, bonta badutame ne pen apot apran kechepangbodet abang ke la longthuji.

²⁶Pima mane abang pirthe adang longpet setta amethang akai pavirdet lote alangli kopi ale doma? Kalite inut amonit apran kopi pensi amethang achethe namthu unjima?

²⁷Pima Monit a-Sopo amethang a-Po adak atur lapen ame-thang apherangke atum pen vangji dokdok-lo, lapen halabangso ahut alangli anut-tin aphan amethang akam atengsi anam piji.

²⁸Chenamsi ne nangtum aphan nangpulang, ladak karjapphrong atum angbong manene atum Monit a-Sopo amethang arat pen kevang thek longle tik ke thithejilang.”