Read Karbi MATHIU 17 Bible Online

MATHIU 17 - Karbi bible

MATHIU 17

¹Nithrok aphi Jisu Pitor, Jems lapen akorte Jon aphan ha monit kavedet adim, kangtuiving Anglong athak japonlo.

²Alangli latum angno arje kaprek chepharlolo. Alangli mahang ke arni ason tur-ang-lo, lapen alangli pe ke kethe-ang ason thakthak lok kling cheplang-lo.

³Lapen la bangkethom asangho atum Moses lapen Elijah Jisu pen lam kechingki thek long-lo.

⁴Lasi Pitor Jisu aphan pulo, “Hemphu, etum ladak kedo ke me-olo! Nang jongsi nangning hangte ne ladak hem-pharla humthom kimpo; ehum ke nangphan, ehum ke Moses aphan lapen ehum abang ke Elijah aphan.”

⁵Alangli keningjebom ahut, chini iktha, kethe-angdang anghun ephar vangsi latum aphan binthip-lo, lapen inghun pen ase pulo, “Labangso abang ke ne kechinghon a-Sopolo; ne laphan ning dok olo; alangli lam arju non.”

⁶Sangho atum la arjulongsi pherepik-lo, lasi latum longle athak domkhrup-lo.

⁷Bonta Jisu latum adung vangsi, lapen latum aphan otsi pulo, “Thurnon, phere nangne!”

⁸Latum angsong anatthu langsi Jisu aphan apar badu aphanta thek longledet-lo.

⁹Lapen latum inglong pen nangkehir ahut Jisu latum aphan hukum pisi pulo, “Monit a-Sopo kethi pen thurthetik-ke nangtum labangso aning arjan alam badu aphanta thanri.”

¹⁰Asangho atum alangliphan arjusi pulo, “Tangte aron thekser atum pisi aphrangsi Elijah vangji pu puloma?”

¹¹Alangli thaksi pulo, “Ahok-lo, Elijah aphrangsi vangpo,” lapen alangli kadokave sik pamepo.

¹²Bonta ne nangtum aphan nangpulang, Elijah vang-et-tang-lo, bonta monit atum alangliphan chininedet-lo; lapen halatum aning kehang alingsi alang-liphan klemlo. Lapusonthotsi halatum Monit a-Sopo aphanta pasungpo.

¹³Ansi asangho atum la Jon Baptist alamjirsi alangtum aphan pulo pu chinilo.

¹⁴Latum armu atum along nangke-chevoithu ahut, inut amonit Jisu along vangsi, alangli ingno akengphu patongruisi

¹⁵pulo, “Hemphu, neli sopo aphan ingjinsotha, pima la klibup akeso pen ajok dukparlo; lapen abatai batai la me lapen lang alongta klilo.

¹⁶Neli nangli sangho atum alongta laphan ponlo, bonta latum pame un-edet-lo.”

¹⁷Jisu thaksi pulo, “O kekroi kave, lapen kechingkino a-ove! Ne nangtum along kopu-an ajir keding donang jilangma? La nedungle vannon!”

¹⁸Ansi Jisu la hi-i aphan ingchek-lo lapen oso along pen la damjuilo. Halabangso ahut pen mamat kesota medet-lo.

¹⁹Ansi asangho atum Jisu along vangjoisi pulo, “Kopi apotsi netum la phlung un-edet-loma?”

²⁰Alangli latum aphan pulo, “Lake nangtum kekroi kekom apot-lo. Chenamsi ne nangtum aphan nangpulang, nangtum akekroi jongsi hanjang emu anbak-le dote labangso aphan ‘Ladak pen hadak chetereknon!’ pusi nangtum pudetji apot-lo; lapen la cheterek po. Nangtum thangnatta ake-un-e avedetji apot-lo.”

²¹Bonta lapuson aphan ke Arnam kardom lapen an kehum pensi phlung unchotji; ason kaprek pen ke un-e.

²²Asangho atum an ha Galili kechepangrum ahut, Jisu latum aphan pulo, “Monit a-Sopo aphan monit atum arideng hodai vekji,

²³lapen halatum alangliphan pathivekji, lapen nithom arni alangli thurthuvekji.” Asangho atum aning duk parpik-lo.

²⁴Jisu lapen alangli sangho atum Kapernaum nangledet aphi kardom hemthepi amidu kerung atum Pitor along vangsi pulo, “Nangtum athanbang kardomhemthepi amidu pima?”

²⁵Alangli thaksi pulo, “Pi,” Alangli hem kechevoi ahut Jisu alangliphan arjuphit-lo. “Simon, nang kematha kopuson? Pirthe arecho atum komat mat along pensi midu, kalite khajona rung-loma? Amethang arat aso atum penma, mate adet akaprek atum along penlo?”

²⁶Pitor pulo, “Akaprek adet atum along pen.” Jisu arju longsi alangliphan pulo, “Tangte hala amethang arat aso atum ke jokphlot-lo.

²⁷Tebonta etum latum aphan aning kepa-oi-edetji aphan nangtum ha talo along damra ok parhi damnon. Lapen nang kelongcheng a-ok ennon, lapen la angho along nang sika kethom longji. Nang la ennon lapen halatum aphan etum bang hini apharman pi damnon.”