Read Karbi MATHIU 18 Bible Online

MATHIU 18 - Karbi bible

MATHIU 18

¹Halabangso ahut asangho atum Jisu along vangsi pulo, “Sining arat komat theneilo?”

²Ansi Jisu inut a-oso aphan ame-thang adung hangsi latum angbong parjaptherlo,

³lapen pulo, “Chenamsi ne nangtum aphan nangpulang, nang-tum chelarlera osomar atum ason thakthak cheplangplete jonghe setta nangtum sining arat lutdun longledetji.

⁴Badutame, labangso a-oso ason thakthak kechepabihek abang helo sining arat angbong akethenei abang-lo.

⁵Lapen badutame ne men pen apot lason a-oso inut aphan kechak abang aling, lake nephan chak-lo.”

⁶“Badutame la bihek a-osomar atum angbong inut abang aphan nephan akekroi pavirra pap paklem lote, labangso abang aphan him kekoi-i a-arlong akethepi achethok along vek-ra talo akarnukpi along pajangchok, la alangliphan memu.

⁷Pirthe, monit atum aphan pap hei hei kepaklem apot nang ko-an akepherememe akesung pho nangpo! Lapuson ke kaita doji, tebonta pap hei hei kepaklem abang ko-an akesung pho nangpo!

⁸“Jongsi nangmethang ari, kalite akeng nangphan pap paklemlo tangte, nang la thanpet-ra varchornon! Nangri hongni, kalite nangkeng hongni pen nang hala kemep mepin ame along keklodam apar nangri ehong, kalite nangkeng ehong pen nang kejut un-e achethe angbong kelutdun nangphan memu.

⁹Lapen nangmek jongsi nangphan pap paklem lote, nang la hekjok-ra varchornon. Nangmek hilolo pen nangphan Chom ame angkang along nangkevar-chorji apar nangmek isivet pen nang kejut un-e achethe angkang kelutdun, nangphan memu.

¹⁰“Lahelo la kebinei atum angbong inutnat aphanta kehijimjedetjile cherenon; pima ne nangtum aphan nangpulang, sining athak kedo halatum aphan kerai apherangke atum kaiketa sining athak kedo ne-Po angnosi do.

¹¹Kangbotang atum aphan kepajokjisi Monit a-Sopo ke kevang.

¹²Nangtum kopisi mathama? Inut amonit jongsi jon pharo isi abiresak ahur dolote lapen labangso angbong pen ejon abang ingbodet lote alangli la jon throksirkep ra sirkep aphan inglong athak otekangsi laphan ridamji, kalima?

¹³Alangli la longdam lote, chenamsi ne nangtum aphan nangpulang, alangli la jon throksirkep ra sirkep kedo pen apot apar hala ejon pen apot chehok muchotji, kalima?

¹⁴Lasonthotsi sining athak kedo nang-tum a-Pota la kebinei atum angbong inut nat aphanta kepavirdetji aning hanghe.

¹⁵“Nang korte jongsi nangphan pap klemlote, nangli alangli long damra alangli akechokche ason paklang damnon. Alangli jongsi nanglam arjulo tangte, nang korte chelongthu tang-lo.

¹⁶Bonta alangli jongsi nanglam arjujete bang hini kethom ahaki angno alam athetin kepathirji aphan nanglong inut, kalite bang hini nangri cheponnon.

¹⁷Alangli jongsi halatum alamta arjuje tangte mondoli aphan thannon. Lapen alangli jongsi mondoli alamta arjuje tangte, alangli nang ingno adet kaprek abang, kalite midu kerung abang ason thakthak paplangnang.”

¹⁸Chenamsi ne nangtum aphan nangpulang, nangtum pirthe athak kekok aling sining athakta kokdetji, lapen nangtum pirthe athak kephlok aling, lake sining athakta phlokdetji.

¹⁹“Puthot ne nangtum aphan nang-pulang, pirthe athak nangtum bang hini ning isipet pen kopine chohang lote, sining athak kedo ne-Po nangtum aphan la nangklem piji.

²⁰Pima ne men pen bang hini kethom atum kechepangrum aling hadak ne latum angbong dodunji.”

²¹Ansi Pitor Jisu along vangsi pulo, “Hemphu, ne korte nephan pap klemlote ne alangphan batai ko-an diya nangjima? Batai throksima”?

²²Jisu alangliphan pulo, “Kali, batai throksi anchot kali,” bonta batai throksi kep ra batai throksi.

²³Pima sining arat ke lapuson helo: Ahut isi inut arecho amethang aban atum apreng alakha kelangji aning hang-lo.

²⁴Alangli la keklem kepangcheng ahut alangli long suri kep atangka ketu nangji abang aphan vandet-lo.

²⁵Bonta aban abang apreng chetu movedet-lo. Lasi apreng kechetuji aphan recho alangliphan alangli methang amar, apiso, asomar aphan lapen akhi do-an kechejorji ahukum pilo.

²⁶Anke labangso abang domkhrupsi alangliphan choningrisi pulo, “Hemphu, nangli ning chepaningding ik chottha; neli nangliphan la kadokave tupetji.”

²⁷Recho alangliphan kangjinso pen ajok alangliphan lophlot-lo, lapen aprengta diyadet-lo.

²⁸“Bonta labangso abang damsi alangli ban hijan inut abang aphan chetong-lo. Labangso abang alangliphan pharo isi atangka apreng ketu nangji dolang. Alangli laphan otthipsi, achethok tumkaksi pulo, ‘Nangpreng nangchetunon.’

²⁹Alangli domkhrupsi alangli ban hijan aphan choningrisi pulo, ‘Nangning chepa-ningding ik chottha; ne nangphan la tuvekji.’

³⁰Bonta alangli la arjujedet-lo, lapen apreng tutetik-ke alangliphan phatek bengthot-lo.

³¹Akaprek aban atum la keplangtang akam thek longsi aning dukpik-lo, lapen recho angno damsi lahei hei kadokave alam thandamlo.

³²Ansi alangli la aban aphan hangdetsi pulo, ‘O nang kehingno aban! Nang nephan choningrisi nangpreng kedo anta ne diyadet-lo;

³³lapen ne nangphan nangkangjinso asonthot nangta nangban hijan aphan ingjinso nangji apot-lo, kalima?’

³⁴Recho aning thipik-lo, lapen apreng do-an chetupetpetik ke alangliphan aduk kanghoijisi phatek arlo papondet-lo.

³⁵“Lasonthotsi nangtum abangphu-tinta nangning aklong pen nangkorte aphan diyajedette, sining athak kedo ne-Pota lapusonsi nangtum aphan klemji.”