Read Karbi MATHIU 19 Bible Online

MATHIU 19 - Karbi bible

MATHIU 19

¹Jisu lahei hei alam ningje tangdet aphi alangli Galili adet che-osi ha Jordan alangroi parai, Judia alongri damlo.

²Armu ake-ongpi atum alangli phi phi dunlo, lapen hadak alangli latum akeso pamelo.

³Manene a-Pharisi atum alangliphan asat kelangjisi alangli long vang-lo, lapen pulo, “Ajat adai apot tame, mane abang jongsi apiso kecheti aning hang lote, kechetiji aron doma?”

⁴Alangli thaksi pulo, “Kecheng ahut penta kepinchong abang latum aphan pinso lapen arloso pinchong-lo,

⁵lapen pulo, ‘La apotsi pinso abang api apo che-osi apiso pen do rap-rappo, lapen latum bang hini a-ok isinat cheplangpo;’ lake nanglitum porhehe pin langma?

⁶Lahelo latum halabangso ahut pen bang hini kali, bonta a-ok isinat-lo. Tangte Arnam kepachortang, monit la pachekakke nang.”

⁷Latum alangliphan pulo, “Tangte kopi apotsi kecheti aloh pira pacheti nang pu Moses hukum piloma?”

⁸Jisu thaksi latum aphan pulo, “Nanglitum aning kangtang ong apotsi Moses nanglitum aphan piso kechetiji ahukum pilo, bonta kecheng penke lapu kali.

⁹Lapen neli nanglitum aphan nangpulang, badu tame beisa pen apot apar amethang apiso chetira akaprek pen chepangri lote, alangli beisa klem tang-lo.”

¹⁰Asangho atum alangliphan pulo, “Lapuson jongsi pinso lapen arloso angbong alam dokok-lo tangte, piso en-edet abang memu.”

¹¹Alangli latum aphan pulo, “Kadokave atum labangso alam kroithek lapu kali. Arnam pen labangso adan kelong atum ansi la kroithekchotji.

¹²Pima monit atum kopi apotsi piso en-edetma, lake ason do-o: manene atum ke pirthe kehache ahut penta lapuson keman do; akaprek atum ke monit-le kepinchongta do, lapen manene atum ke sining Arat aphan ajok piso en-edetta do. Mane abang laso kethan alam deng un tangte padengnang.”

¹³Jisu ari kebat-ra Arnam kardompiji aphan manene atum alangli long osomar vanlo. Bonta asangho atum rat atum aphan ingchek-lo.

¹⁴Lasi Jisu pulo, “Osomar atum nedung pavang longnon, latum aphan khangri, pima sining arat ke lapuson thakthak atum arat-lo.”

¹⁵Alangli latum aphuthak ari batsi damjuilo.

¹⁶Lapen chini iktha, inut amonit alangli long vangsi pulo, “Thanbang, neli kejut un-e achethe kelongji aphan kopi akam kemesi klem nangjima?”

¹⁷Jisu alangliphan pulo, “Nangli neliphan kopi athesi akeme alamjir ne arjuloma? Akeme abang ke inutnat. Nangli jongsi kejut un-e achethe kelongji nangli ning hang tangte hukum hei hei kroinon.”

¹⁸Alangli alangliphan arjulo, “Kopi ahukum?” Jisu pulo, “Nang bang apran enri, nang beisa klemri, nang chonghuri, chobei ahaki piri,

¹⁹nangpi nangpo anong pathenon, lapen nangmethang aphan asonthot-le tebok abang aphan chinghonnon.”

²⁰Riso abang alangliphan thak-lo, “La kadokave neli kroipet-lo, neli keklem nangjilang kopi dolangma?”

²¹Jisu alangliphan pulo, “Nangli kechokpetji nangli ning hang tangte damra nangli khi do an jor-et-ra keduk kelak atum aphan pinon, Anke sining athak nangli khi dopo, lapen vang-ra neli phi phi nangdun non.”

²²Bonta halabangso ariso labangso alam arjulongsi aning aduk pen damjuilo, pima alangli akhi do-o.

²³Jisu asangho atum aphan pulo, “Chenamsi ne nangtum aphan nangpulang, keplang-o abang sining arat kelut dunji akesung do.

²⁴Lapen puthot ne nangtum aphan nangpulang, keplang-o abang Arnam arat kelut dun apar ka-ut ingprim arme kelutdam joimu.”

²⁵Asangho atum la arjulongsi, manghu phrongsi pulo, “Tangte matsi jokthekpoma?”

²⁶Jisu latum aphan langdingsi pulo, “Monit atum ke la un-e tema, bonta Arnam penke la kadokave unpetji.”

²⁷Ansi Pitor alangliphan pulo, “Langtha, netum kadokave che-o tekangsi nang phi phi nangduntang-lo, tangte netum kopisi long poma?”

²⁸Jisu latum aphan pulo, “Chenamsi ne nangtum aphan nangpulang, mo kai kemi ahut, Monit a-Sopo amethang adak atur anghoi athak kangni ahut nangtum, atheke ne phi phi nang kedun atumta hala inghoi krehini athak ingniji, lapen Israel kur kre hini atum aphan kangsai atum plangji.

²⁹Lapen abangphutinta ne pen apot amethang ahem arit, kalite akorte atum, angjirmar atum, kalite api apo, asomar atum lapen alongle-phelang keche-o tekang abang ke phan pharo longji, lapen kejut un-e achethe chepahemphuji.

³⁰Bonta non kepaphrang atum paphiji lapen kepaphi atum paphrangji.