Read Karbi MATHIU 2 Bible Online

MATHIU 2 - Karbi bible

MATHIU 2

¹Herod recho arni ahut Judia adet Bethlehem arongsopisi Jisu pirthe hachelo. Lapen nihang anat pen kethek kere atum Jerusalem vangsi pulo,

²“Pirthe kehachemi, Jihudi atum arecho kodaksi doma? Pima nelitum alangli chiklolongso keklangcheng thek-long-lo, lapen alangliphan kangdukjisi nelitum vang-lo.”

³Herod recho labangso alam arjulongsi alangli lapen alanglilong Jerusalem asor anta aning siksakkoilo.

⁴Alangli det adang kurusar kethe lapen aron thekser atum aphan pangrumpetsi arjulo, “Khristo pirthe kehacheji adim kodakma?”

⁵Latum alangliphan thaksi pulo, “Ha Judia adet, Bethlehem arongsopi along. Pima ha montri ketok tekang lapuson helo;

⁶‘Judia adet a-Bethlehem, nanglike Judia adet kedo arongsopi kethe hei hei angbong akebineilo, lapu kali; pima nangli pen keja abang vangji, alangli ne rat, Israel aphan pangriji.’ ”

⁷Ansi Herod kethek kere atum aphan hangjoisi halabangso achiklo-longso keklangcheng ahut alamjir arju pamelo.

⁸Lapen latum aphan ha Bethlehem toisi pulo, “Damra labangso a-oso aphan ridam pamenon. Lapen nanglitum la thekdam long-lote neli jokta damsi kardomkhrup thekji aphan neli long chevoira nethan thunon.”

⁹Latum recho alam arjudetsi damlo, lapen latum la keklangcheng ahut kethek-long achiklolongso latum aphrang aphrang damthusi hala oso kedo adim angdenchit an kele pen sangkok ketik ke dambomlo.

¹⁰Halatum chiklolongso thek-longsi aning arong parpik-lo.

¹¹Latum hem lut damsi oso lapen apei Meri aphan thek-long-lo, lapen latum akengphu patongruisi alangliphan ardomlo. Ansi latum akhi atelup chepursi alangliphan ning keme pen ser, hijung aphik lapen kenempru ajangthu adan hei hei pilo.

¹²Lapen Herod along damthuri pu Arnam ahukum amang pen longthusi latum atovar kaprek pen amethang adet chevoijuilo.

¹³Latum chevoidet pen mamat Hemphu apherangke Joseph aphan amang pen cheklangsi pulo, “Thurra oso lapen apei aphan cheponra ha Ijip adet katnon, lapen neli nangliphan pupetik ke hadak-le donon; pima Herod ke kepavirjisi oso aphan riji dokdok-lo.”

¹⁴Alangli thursi ajo amat oso lapen apei aphan cheponsi Ijip adet kat-lo,

¹⁵lapen Herod thithetik an latum hadaksi dobomlo. Lake Hemphu pen ajok ha montri kepu tekang, “Neli neli sopo aphan Ijip adet pen hang-lo,” pu alam kechekokji aphanlo.

¹⁶Ansi kethek kere atum alangliphan pachereitang-lo pu chinisi Herod jasemet aning thilo, lapen alangli Bethlehem lapen adung arei kedo ningkan hini arta lapen ningkan hini pen kekom arta pinso a-osomar atum aphan kepavirkoiji ahukum pilo lake alangli alangli long kevang-akethek kere atum pen chiklolongso keklang alamjir karjulong ahut ateng pensi klemlo.

¹⁷Ansi Jeremiah montri kepu alam chekok-lo, atheke alangli pulo:

¹⁸“Ha Ramah angbong ne kechiru chernap ase arjulong-lo; Rachel amethang asomar atum pen apot chiru chernap-lo; alangli aning kepliji aning hanghelo, athema halatum thikoilo.”

¹⁹Herod thilot aphi Ijip adet Hemphu apherangke Joseph aphan amang pen cheklangsi pulo.

²⁰“Thurra oso lapen apei aphan cheponra Israel adet chevoinon, pima kepathijisi oso aphan keri atum thitang-lo.”

²¹Lapen alangli thursi oso lapen apei aphan cheponsi Israel adet chevoilo.

²²Bonta Arkelaus si apo Herod adular Judia adet recho cholo pu arju longsi alangli hadak kedamji pherelo. Lasi amang pen hukum kelong atengsi Galili adet damthulo.

²³Alangli damsi Nazareth arongsopi dodamlo, atheke alangliphan “Nazareth asor pusi hangji” pu montri kepu alam ateng pachekok-lo.