Read Karbi MATHIU 24 Bible Online

MATHIU 24 - Karbi bible

MATHIU 24

¹Jisu Kardomhemthepi o-tekangsi kedam bom ahut asangho atum alangliphan Kardom hemthepi kekim alon kepaklangjisi alangli long vang-lo.

²Bonta alangli latum aphan pulo, “Nangtum lahei hei thek long-lo, kalima? Chenamsi ne nangtum aphan nangpulang, ladak a-arlong isinat aphanta non adim bibedetji; kadokave aphanta varthaiji.”

³Jisu Oliv anglong athak kangni ahut asangho atum alangli long vangjoisi pulo, “Netum aphan nethantha, lahei hei komantu plangjima? Lapen nang kevangthuji lapen labangso akai kejut angthek kopima?”

⁴Jisu latum aphan thaksi pulo, “Baduta nangtum aphan kepamanghu longledetjile nangtum cherenon.

⁵Pima ake-ongpi atum ne men pen vangsi neli helo Khristo pusi chekrongji, lapen halatum ake-ongpi atum aphan pamanghuji.

⁶Lapen nangtum ron kechedan alamjir lapen ron kechedanji abirta arju longvekji. Bonta nangtum aning chepasiksak-ri; pima lahei hei plangvek nangji. Tebonta hala mamat ke kejut kalilang.

⁷Pima isi adet akaprek adet pen ron chethurji, lapen isi arat akaprek arat aphan tengkhengji, lapen adim pen adim akhim thurji lapen ke chiklita vangji.

⁸La kadokave ke arlosomar osomar pirthe kepahache ahut kecheng akesung ason thakthak-lo.

⁹“Ansi halatum nangtum aphan nepsi aduk nangkanghoiji aphan nanghodaiji, nangtum aphan nang-pathiji lapen ne men pen apot kadokave amonit atum nangtum aphan hijimpetji.

¹⁰Halabangso ahut ake-ongpi atum pap klemthurongsi lahin lahin aphan hotur arideng cheho-daiji lapen lahin lahin chehijimji.

¹¹Kechobei amontri ake-ongpi atum thurji lapen latum ake-ongpi atum aphan pamanghuji.

¹²Akehingno kelit-bom apotsi ongmuchot atum akanghon ingsamji.

¹³Bonta kejut anta kechechak abang ke jokji.

¹⁴Lapen labangso a-Rat a-Birta Keme alam pirthe adang, kadokave adet amonit aphan haki kepijisi alam pachethangpetji: labangso aphisi kejut vangji.

¹⁵“Ansi nangtum ‘kevirthek akehijim meme amar,’ Pu Daniel montri keputang ateng thek longji. La kangthir-et adimsi arjapdingji.” (keporhe abang pachini nang)

¹⁶Anke Judia adet kedo atum ha inglong pakat nang.

¹⁷Ahem asarnung athak kedo abang, alangli ahem amar nangkeche-enji aphan pahirhenang;

¹⁸lapen rit kedo abang achoi nangkeche-enji aphan pachevoivenang.

¹⁹Ai! Halabangso arni oso kechopathe, kalite mok kechu a-oso kedo asarpimar atum ko-an akepherememe akesung pho poma!

²⁰Ningkreng ahut, kalite Sabbath arni kekat nangnedetjile nangtum Arnam cho-ardom non.

²¹Pima halabangso ahut akesungpik doji; lasonthot akesung pirthe kecheng ahut pen non anta avelang, lapen ke mo aphita avedetji.

²²Lapen halabangso a-arni hei hei pakomke asonte baduta jokjedetji apot-lo, bonta kangvaitang atum pen apotsi halabangso a-arni hei hei pakomdetji.

²³“Halabangso arni jongsi komane abang nangtum aphan ‘Langtha, ladaksi Khristo do!’ Kalite, ‘Alangli hadaksi do!’, pu pulote la kroiri.

²⁴Pima kechobai a-Khristo atum lapen kechobei amontri atum thurji lapen halatum kangvaitang atum aphanta unte kepamanghujisi angthek kethepik hei hei, lapen kemanghumeme akam kethe hei heita klemji.

²⁵Chini non ne aphrang pen nangtum aphan nangthanlo.

²⁶Lahelo, halatum jongsi nangtum aphan, ‘Langtha, Alangli kejejangtang ajosi do!’ pu pulote nangtum ingtan damri; kalite halatum jongsi nangtum aphan, ‘Langtha, Alangli sirkut arlosi do!’ pule nangpu setta la kroiri.

²⁷Pima sining kebirlak-le nihang anat klangsi nichi anatta kelengphit asonthot, lason thak-thaksi Monit a-Sopo kevangta plangji.

²⁸Kethitang abang arpum kedo adim aling, hadaksi takun atum chepangrumji.

²⁹“Halabangso arni akesung jutdet aphi pen mamat arni ingtingthipji, chiklo khelanledetji, sining achiklo-longso ingjuipreji lapen sining ajakong hei hei klemhurji.

³⁰Monit a-Sopo angthek sining athak klangji, lapen pirthe athak monit akhei an chiru chernapji, lapen Monit a-Sopo aphan ajakong lapen adak atur pen inghun athak kevang thek-longji.

³¹Alangli pong-ut arki akethepi pen apherangke atum aphan toiji lapen latum kona phli adang angbong, atheke pirthe adang an pen monit pangrumpetji.

³²“Thebo arong pen lamlir charli non. Mo aro ingdukvok lapen arvo kechingjok ahut lote barla nanghirji dokdok-lo pusi nangtum chiniji.

³³Lasonthotsi nangtum la kadokave angthek thek longlote alangli inghap amahang an nangle tang-lo pura chini pamenon.

³⁴Chenamsi ne nangtum aphan nangpulang, la kadokave chekokpet petik ke labangso a-ove dobomjilang.

³⁵Sining lapen pirthe avedetji, bonta nelam hei hei kaiketa doverji.

³⁶“Bonta Po apar ke sining aphe-rangke atum tame, lapen Sopo tame, labangso arni lapen apor baduta chinine.

³⁷Pima Noah arni ahut asonthot, lason thak-thaksi Monit a-Sopo kevang ahut plangji.

³⁸Pima lang thepi vangve ako pen ha Noah telongpi kelutdam a-arni anta halatum kecho-kejun, piso ke-en lapen penan kedo akamsi klem bomlang,

³⁹lapen langthepi vangsi halatum do-an aphan kepondet ahut anta halatum kechinine asonthot; lason thak-thaksi Monit a-Sopo kevang ahut ta plangji.

⁴⁰Halabangso ahut bang hini atum ritsi doji, inut abang aphan ke pondetji lapen inut abang aphan ke otekang bupji;

⁴¹bang hini arloso atum arlong pen him koi rap-rapji, inut aphan ke pondetji lapen inut aphan ke otekangbupji.

⁴²“Tangte no kang-ar penle donon, pima kolobangso arnisi nangtum a-Hemphu kevangji, lake nangtum chinine.

⁴³Bonta kechonghu abang kolobangso apor vangji, lale hem ahemphu chini asonte, alangli inghong-dingsi hem nangpalut longledetji apot-lo, lale chininon.

⁴⁴La apotsi nangtumta chesik-etle donon, pima vangvejibon pu nangtum kematha ahutsi Monit a-Sopo vangji.

⁴⁵“Tangte kekroi kethirklong lapen giani aban komat-lo? Lake alanglitum aphan athikpet apor ahut an kepapiji aphan akaprek aban atum aphan kepalangdunji aphan ahemphu pen akam anghor kelong aban abang helo.

⁴⁶Ahemphu kevang ahut jongsi ahemphu labangso abang aphan lapuson keklembom thek long-lote, labangso aban abang ko-an akerengme!

⁴⁷Chenamsi ne nangtum aphan nangpulang, ahemphu amethang amar atar do-an kepalangji aphan labangso abang aphuthak akam hodaidetji.

⁴⁸Bonta halabangso aban jongsi hingno tangte aning arlo chepuji, ne hemphu kevang paderji,

⁴⁹lapen keklem rap-rap aban atum aphan kechok pangchengji lapen hor kangri atum pen cho rap-rap jun rap-rapji.

⁵⁰Ansi alangli vangvedet jibon pu kematha arni lapen kechininedet apor ahutsi halabangso aban ahemphu vangji,

⁵¹lapen ahemphu abang alangliphan areng pasoji lapen angthin ke-ik atum pen pado rap-rapji. Ansi hadak latum chiru chernapsi aso chardengji.