Read Karbi MATHIU 25 Bible Online

MATHIU 25 - Karbi bible

MATHIU 25

¹“Ansi sining Arat ke bangkep animsopimar atum amethang methang athengtom cheponrepsi piso kechepangriji apinso aphan kangthumjisi kedam atum ason plangji.

²Halatum bangpho ke kelu lapen bangpho ke abidi kedo atumlo.

³Kelu atum ke amethang methang athengtom kechepon ahut akaprek ajangthu cheponpedet-lo.

⁴Bonta abidi kedo atum ke amethang methang athengtom along jangthu paplengsetsi damlo.

⁵Bonta hala kechepangri apinso abang kevang padersi halatum kadokave ta amek jangklip-lo.

⁶“Ansi jirlo apor kehon abang hangsi pulo, ‘Langtha, piso kechepangriji apinso nangletang-lo! Alangliphan kangthumjile nangbarra vanghurnon.’

⁷Ansi halabangso animsopimar atum thurpetsi amethang methang athengtom chesik-lo.

⁸Ansi kelu atum abidi kedo atum aphan pulo, ‘Nangtum ajangthu netum aphan asap nepitha, pima netum athengtom mepji dokdok-lo.’

⁹Bonta abidi kedo atum thaksi pulo, ‘Pi thekthe, pima netum lapen nangtum aphan ke la dordedetji. La alar nangtum ha kejor atum along damra nangtum methang methang aphan chenam damnon.’

¹⁰Halatum kenamdam ahut piso kechepangriji apinso abang vang-lo, lapen kechesiktang atum alangli pen pen piso kepangri akechopi adim lutdun rap-rap-lo, lapen inghap inghap-het-lo.

¹¹“Aphisi halabangso animsopimar atum vangsi pulo, ‘Hemphu, Hemphu! Nelitum aphan inghap nang ingputha.’

¹²Bonta alangli thaksi pulo, ‘Chenamsi neli nanglitum aphan nangpulang, neli nanglitum aphan nangchinine.’

¹³“Lahelo nangtum no kechepang-ar penle donon, pima nangtum halabangso arni, kalite apor chinine.

¹⁴“Halabangso ahut sining Arat keplangji lapuson helo. Ephong inut amonit adet kaprek damji dokdok-lo. Ansi alangli aban atum aphan hangpetsi alangli khi kedo-an latum arideng hodai tekang-lo.

¹⁵Alangli abangphutin aphanta amethang methang ajakong ateng pensi pilo: inut abang aphan ser atangka suri pho pilo, akaprek abang aphan suri hini, lapen anut kaprek abang aphan suri isi atangka pilo. Ansi alangli adet kaprek damjuilo.

¹⁶Hala mamat suri pho atangka kelong abang damsi la pen bepar klemlo, lapen akaprek suri pho ale long-lo.

¹⁷Lapusonthotsi suri hini kelong abangta akaprek suri hini ale long-lo.

¹⁸Bonta suri isi kelong abang ke damsi longle along hilik tuksi ahemphu aser patujoilo.

¹⁹“Ajir dingklui aphi labangso aban atum ahemphu vang-lo, lapen latum pen chelakha rep-lo.

²⁰Hala suri pho atangka kelong aban alangli long vangsi ansose suri pho atangka alangli ingno vansi pulo, ‘Hemphu, nangli neliphan suri pho atangka nepi tekang-lo. Langtha neli ansose suri pho atangka longtang-lo.’

²¹Ahemphu alangliphan pulo, ‘Me-ongchot-lo, keme lapen kekroithirklong aban.’ Nangli asapnat atangka pen klem-ipamelo. Neli nangliphan ake-ongpi amar ahemphu nangbatpo. Nangli nangli hemphu pen chehok rap-raptha.

²²“Lapen suri hini atangka kelong abangta alangli long vangsi pulo, ‘Hemphu, nangli neliphan suri hini atangka tekang-lo. Langtha, neli ansose suri hini atangka longtang-lo!”

²³Ahemphu alangliphan pulo, ‘Me-ongchot-lo, keme lapen kekroithirklong aban. Nangli asapnat atangka penta klem-ipamelo. Neli ake-ongpi amar ahemphu nangbatpo. Nangli nangli hemphu pen chehok rap-raptha.’

²⁴“Lapen suri isi kelong abangta alangli long vangsi pulo, ‘Hemphu, neli chinilo, nanglike ning ingtangrak abang-lo, atheke nanglike sok ke-e-e adimsi sok kerot lapen chili kerik-re adimsi sok kepangrum abang-lo.

²⁵Neli la pherelo, lasi neli damsi suri isi atangka longle arlosi patudamjoilo. Langnon, lahelo nangli tangka-lo.

²⁶“Bonta ahemphu abang thaksi alangliphan pulo, ‘O nang kehingno lapen keselet aban! Neli ke sok ke-e-e adimsi sok ke rot lapen kerik-re adimsi sok pangrumlo, lake nang chiniloma?

²⁷Tangte nangli neli tangka tangka-apuru alongle bidamkok asonte neli kevangthu ahut la neli tangka lapen aleta longji apot-lo.

²⁸Ansi alangli long pen atangka endetsi hala suri kep atangka kedo abang aphansi la pithudet-lo.

²⁹Pima akhi kedo abang aphan pithuji, lasi alangli akhi do-oji, bonta thangta kavedet abang along pen kedo-anta thi pondetji.

³⁰La keningjoino aban aphan ingtan akangtingkuk adimle varphitnon; hadak chiru charnapsi aso chardengji.’

³¹“Bonta Monit a-Sopo adak atur pen lapen apherangke atum do-an pen kevangji ahut, alangli adak atur kethe anghoi along ingniji.

³²Lapen kadokave arat atum aphan alangli ingno pangrumpetji lapen biresak kevi abangle bi lapen biresak ahur aphan kepaprek asonthotsi alanglita inut pen anut kaprek aphan paprekji.

³³Alangli dhoromi atum an aphan ke alangli ar-e anat chebiji lapen akaprek atum aphan ke arvi anatsi biji.

³⁴Anke Recho alangli ar-e anat kedo atum aphan pupo, ‘Vangnon, ne-Po ahirjume kelong atum, pirthe kepinchong ahut pen nangtum aphan nang kesikpi arat chepahemphu non;

³⁵pima ne an kangchir ahut nangtum nephan an nepilo, ne lang kang-it ahut nangtum nephan lang ne pajunlo, nephan chininedet setta nangtum nephan chak-lo;

³⁶ne reng angse ahut nangtum nephan pe-ri nepindeng-lo, ne sodet ahut nangtum nephan nelanalo; nephan phatek kebeng ahut nangtum nelong vang-lo.’

³⁷“Ansi dhoromi atum alangliphan thaksi pupo, ‘Hemphu, mantusi netum nangphan an kangchir thek-longsi an nangpacho loma? Kalite lang kang-it ahut lang nangpajun loma?

³⁸Lapen mantusi netum kechinine abang aphan, atheke la nangphan alohi chak-loma? Kalite nangreng angse ahut nangphan pe-ri nangpindeng loma?

³⁹Lapen netum mantusi nang kesodet, kalite phatek kejang ahut nangphan langdam loma?’

⁴⁰Ansi Recho halatum aphan thaksi puji, ‘Chenamsi ne nangtum aphan nangpulang, la ne korte akebinei abang aphan setta la son keklem abang aling ke nephansi klemlo.’

⁴¹“Anke alangli arvi anat kedo atum aphan pupo, ‘Nedung pen damnon, ahirjuno kelongtang atum; Hi-i Sarpo lapen apherangke atum aphan kesikpitang, kejut un-e ame along damnon.

⁴²Pima ne an ingchirlo setta nangtum an nepachochelo, ne lang ing-it-lo setta nangtum lang nepajunjelo;

⁴³ne alohi kedoji aphan vang-lo setta nangtum nephan chakchedet-lo; ne reng angselo setta nangtum nephan pe-ri nepindengde-det-lo, lapen ne sodet-lo lapen phatek jang-lo setta nangtum nelong vangvedet-lo.’

⁴⁴“Ansi halatum alangliphan thaksi pulo, ‘Hemphu, netum mantusi nang an kangchir, kalite lang kang-it kalite alohi kedoji aphan kevang, kalite reng angse, kalite kesodet, kalite phatek kejang thek longsi nangphan ru-thaithedet-loma?’

⁴⁵Ansi alangli halatum aphan thaksi pupo, ‘Chenamsi ne nangtum aphan nangpulang, la kebinei abang aphan setta keklemkledet aling ke nephanta klemkledet-lo.’

⁴⁶Ansi latum kejut un-epin akesung angbong lutdamji, bonta dhoromi atum kejut un-e achethe angbong lutdamji.”