Read Karbi MATHIU 27 Bible Online

MATHIU 27 - Karbi bible

MATHIU 27

¹Adapprang kurusar akethe atum lapen akesar atum kedo an Jisu aphan kepathiji abidi chingvailo,

²lapen latum alangliphan kok ingnangsi Pilat govornor along ponsi hodai damlo.

³Ansi Jisu aphan kepathiji ahukum pipo pu chinisi Jisu aphan hotur arideng kehodai abang, Judas aning chiruisi hala rup atangka thomkep kurusar akethe lapen akesar atum along vangthulo, lapen

⁴alangli pulo, “Ne pap klem tang-lo.” Latum alang-liphan thaksi pulo, “Nelitum la thangta chinine. Lake nangli kam methang.”

⁵Judas la rup atangka Kardomhemthepi arlo vartekang chorsi damjuilo lapen chekokthat damlo.

⁶Kurusar akethe atum la rup atangka humsi pulo, “Laso atangka Kardomhemthepi atangka apuru arlo kebiji aron ave, pima lake vi anamlo.”

⁷Ansi latum chingvaidetsi kechinine amonit atum aphan kepipji adim aphan longle ahormu kethip abang alongle labangso atangka pen namdet-lo.

⁸Lasi pini arni anta labangso alongle emo aphan “Vi alongle” pusi pulo.

⁹Ansi Jeremiah montri kethan alam chekok-lo, atheke alangli pulo, “Manene a-Israel atum inut amonit aphan anam pathik-lo, halabangso kepathiktang anam,

¹⁰rup atangka thomkep ensi halatum neli Hemphu nephan hukum nekepi asonthotsi longle ahormu kethip abang alongle anam pidamlo.”

¹¹Govornor angno Jisu arjaptherlo, lapen alangli Jisu aphan arjusi pulo, “Jihudi atum arecho pu nangli heloma?” Jisu thaksi pulo, “Nangli la putang-lo.”

¹²Lapen kurusar akethe atum lapen akesar atum alangliphan adai ketin ahut alangli thangta chethak dundedet-lo.

¹³Ansi Pilat alangliphan pulo, “Latum nangliphan lapu-an adai tinlo setta nangli thangta arjulongledetma?”

¹⁴Bonta Jisu ethenatta thak dundedet-lo, lasi govornor ke manghuhak-lo.

¹⁵Kejok Achojun a-Meipi aphong-tinta armu atum aning kehang aling phatek kedo atum angbong pen inut aphan kepajokji aron do.

¹⁶Halabangso ahut inut kehingnopik, amen keklangdong abang do; alangli menke Jisu Barabbas puhelo.

¹⁷Ansi armu atum kechingrumpet ahut Pilat halatum aphan pulo, “Neli nanglitum aphan komat abang aphansi pajok nangjima? Jisu Barabbas aphanma, mate Jisu Khristo pu abang aphanma?”

¹⁸Pima Jihudi atum angbong keja atum alangliphan kelang un-e pensi hodailo pu alangli chini pamelo.

¹⁹Pilat kangsai anghoi kangni ahut apiso alangliphan birta losi pulo, “La dhoromi abang aphan nang thangta klemri, pima alangli pen apot tove nemang along ne sungpik-lo.”

²⁰Bonta Barabbas aphan pajok nangji lapen Jisu aphan pathi nangji pu kepahangjojisi kurusar akethe atum lapen akesar atum armu atum aphan chorung-lo.

²¹Ansi Pilat armu atum aphan arjulo, “La bang hini angbong ne komat abang aphansi pajok nangjima? Nanglitum aning kehang komat abangma?” Latum thaksi pulo, “Barabbas.”

²²Pilat halatum aphan arjulo, “Tangte Khristo pu a-Jisu aphan ne kopisi klem nangpo?” Latum kadokave thaksi pulo, “Alangliphan thengparpan athak pathinon.”

²³Ansi Pilat thaksi pulo, “Kopi akehingno akamsi alangli klem tang-loma?” Anke latum an sose ase kethe pen hangjosi pulo, “Thengparpan athak pathinon.”

²⁴Pilat la thangnat ale thek longle detsi, bonta la alar ansose kehuriseiji angring thek longsi alangli armu atum angno lang ensi, ari chersamsi pulo, “Labangso amonit avi kepabu apot ke neli dai thangta ave! Lake nanglitum akamlo.”

²⁵Kedo an arat atum thaksi pulo, “La alangli vi adai nelitum lapen nelitum asomar atum aphuthak padonang.”

²⁶Ansi alangli halatum aphan ajok Barabbas aphan lophlot-lo, lapen Jisu aphan champre abu pen pachoksi thengparpan athak kepathiji aphan latum aphan hodailo.

²⁷Ansi Pilat aron-aso atum Jisu aphan govornor ahem arlo ponlo lapen asong isi aron-aso alangli dung do dunlo.

²⁸Latum alangli pe phloksi ake-er ape pindeng-lo.

²⁹Ingsu avaikang arhetsi alangli phu athak kup-lo, lapen ari ar-e pri achin pa-otsi, alangli ingno akengphu patongruisi alangliphan pinremlo, lapen hangjosi pulo, “Kardom, Jihudi atum arecho!”

³⁰Latum alangliphan ingthok-lo lapen hala achin pensi aphu along thengbomlo.

³¹Latum alangliphan pinremdetsi, hala ake-er ape phloksi amethang ape pindeng-lo, lapen thengparpan athak kepathijisi alangliphan ponlo.

³²Latum tovar kedambom ahut Kireni arongsopi amonit, Simon pu abang aphan chetong-lo, lapen latum alangliphan Jisu athengparpan kepa-ponji aphan sodak ahukum pilo.

³³Ansi latum ha Golgotha, atheke “Phu bongkok adim” nanglelo, lapen

³⁴latum Jisu aphan akehodak ason pen kepangvui adrakha ahorlang kepajunjisi alangliphan pilo, bonta Jisu la chomatsi junjedet-lo.

³⁵Latum alangliphan thengparpan athak sak-lo, lapen khadot pathusi alangli pe chethak-lo.

³⁶Labangso tangdet aphi latum hadak ingniphrongsi alangliphan honding-lo.

³⁷Alangliphan adai ketin alamthe, atheke “LABANGSO ABANG KE JISU, JIHUDI ATUM ARECHO,” pu alamthe toksi ha angsong, alangli athak tardong-lo.

³⁸Banghini akanghupi atum aphan Jisu ar-e anat inut lapen arvi anat inut aphan thengparpan athak sak-lo.

³⁹Tovar kevang kedam atum aphu chehejuksi alangliphan pinremsi pulo,

⁴⁰“O Kardom ahem kephrira nithom angbong kekim kepatangthek abang, nangli jongsi Arnam a-Sopo tangte nangli methang chepajok-ra thengparpan pen nanghirnon.”

⁴¹Lapuson thak-thaksi kurusar akethe atum, aron thekser atum lapen akesar atum do-anta alangliphan pinremsi pulo,

⁴²“Alangli bang kaprek atum aphan ke pajokthek bonta amethang ke chepajok thekthe! Israel a-Recho alangli helo, kalima? Alangli jongsi non amat thengparpan pen nanghir asonte nelitum alangliphan kroiji apot-lo.

⁴³Alangli Arnam aphan chikilo lapen Arnam a-Sopo pusi chekrong-lo. Tangte ili lang lonang, non alangliphan Arnam pajokjima, pajokjema!”

⁴⁴Alangli penpen thengparpan athak kesak rap-rap akanghu atumta lasonthotsi alangliphan pinremlo.

⁴⁵Nerlo chitim pen ha baji kethom apor an det adang ingtingkuk-lo.

⁴⁶Lapen baji kethom anbak ahut Jisu ase kethe pen hangsersi pulo, “Eli, Eli lama sabakthani,” atheke, “Ne Arnam, ne Arnam, kopi athesi nang nephan obup-loma?”

⁴⁷Hadak karjapphrong, manene atum la arjulongsi pulo, “Labangso abang Elijah aphansi kehang-lo.”

⁴⁸Lapen hala mamat halatum angbong pen inut abang katvirsi tula endamlo lapen la drakha ahor akethor along nimsi, lapen arpik ehong pen krongdongsi alangliphan kepajunjisi pilo.

⁴⁹Bonta akaprek atum pulo, “Thalang, inghongsinang, alangliphan kepajokji aphan Elijah vangjine vangvene, lale langdun sinang!”

⁵⁰Jisu puthot ase kethe pen hangsersi achethe chevung-lo.

⁵¹Chini iktha, kardomhemthepi along kebeng ape athak pen ha aber an chingsekdak-lo, lapen arlonghei-heita inghang-lo,

⁵²lapen tipit hei hei ta chingpudang-lo, lapen kethitang akangthir atum ake-ongpita thursi reng-lo,

⁵³lapen latum tipit che-olo, lapen Jisu kethi pen thurdet aphi latum Rongsopi Kangthir angbong lutdamsi ake-ongpi atum aphan cheklangdamlo.

⁵⁴Chedanbang bang pharo ahemphu lapen Jisu along kehondun atum chikli kevang lapen keplangtang akam hei hei thek-longsi jasemet pherelo lapen pulo, “Chenamlo, labangso abang ke Arnam a-Sopolo!”

⁵⁵Hadak achar pen kelangdun arlosomar atum ake-ong pi dolo. Halatum Jisu aphan keru kethaijisi Galili adet pen alangli phi phi dunlo.

⁵⁶Halatum angbong Megdala arong a-Meri, Jems lapen Joseph apei Meri lapen Jebedi asopo atum apeita dolo.

⁵⁷Arni kangsam apor Arimathea asor Joseph pu inut keplang-o abang vang-lo. Alanglita inut Jisu asangholo.

⁵⁸Alangli Pilat along damsi Jisu abang arpum hangdamlo. Ansi Pilat Joseph aphan hukum pilo.

⁵⁹Joseph la abang arpum ensi linen ape akemirak pen perlo.

⁶⁰Lapen alangli methang keroktang atipit kemi along pa-i-damlo, lapen tipit amahang along arlong akethe pakong-long tekangthipsi alangli damjuilo.

⁶¹Hadak Megdala a-Meri lapen akaprek a-Meri abang ingniphrongsi thiri anat langphrong-lo.

⁶²Puthot arni, lake kesang arnilo. Kurusar akethe atum lapen Pharisi atum Pilat along damsi pulo,

⁶³“Hemphu, labangso kechobei abang kereng ahut keningjetekang, atheke ‘Ne nithom aphi thurthuji’ pu alam nelitum chemathadam-thulo.

⁶⁴Tangte nithom arni anta athikpet-le tipit kehonji ahukum pitha. Lapu kalite asangho atum vangsi alangli bang arpum inghu pondetji, lapen alangli kethitang atum angbong pen thurtang-lo pusi rat atum aphan thanji tahai. Lapulote aphrang apar la hingno muchotpo.”

⁶⁵Pilat halatum aphan pulo, “Keton atum aphan ponnon, Damra latum paton damnon.”

⁶⁶Latum damlo, lapen tipit kepathirjisi arlong along asap theng-lo, lapen keton atum aphan pahonlo.