Read Karbi MATHIU 28 Bible Online

MATHIU 28 - Karbi bible

MATHIU 28

¹Sabbath arni aphi hithi arui aphrang arni, the-ang prinprele apor Megdala asor a-Meri lapen akaprek a-Meri ha tipit langdamlo.

²Lapen chini iktha, chikli vang-lo, lapen Hemphu apherangke sining pen nanghirsi halabangso a-arlong pakong-longsi terek-lo, lapen labangso athak ingnilunlo.

³Alangli arje sining kebirlak ason lapen ape ar-e kelok asonsi lok kling-lo.

⁴Alangliphan pheresi hadak keton atum a-ok klemhurlo, lapen latum kethitang atum asonsi cheplang-lo.

⁵Hala pherangke arlosomar atum aphan pulo, “Nangtum thangta phereri. Pima ne chinilo, hala thengparpan athak kepathitang a-Jisu aphansi nangtum rilo.

⁶Alangli ladak avelo. Keputang asonthotsi alangli thurtang-lo. Ladak vang-ra alangliphan kepa-i adim nanglangtha.

⁷Nangtum dam serak-ra alangli sangho atum aphan alangli kethitang atum angbong pen thurtang-lo, lapen alanglitum aphrang ha Galili adet dam patenolo, hadak nanglitum alangliphan thek dam longji pura thandam non.”

⁸Latum kephere pen lapen aning arongpik pen thiri pen dam serak-rak-lo, lapen katsi asangho atum aphan kethandamjisi damlo.

⁹Lapen chini iktha, Jisu latum pen chetongsi pulo, “Kardom!” Latum alanglidung an vangsi akeng otsi alangliphan ardomlo.

¹⁰Ansi Jisu latum aphan pulo, “Phereri, damra ne korte atum aphan ha Galili dam nangji pura than damnon, lapen hadak latum nephan thek longpo.”

¹¹Arlosomar atum tovar kedambom ahut thiri along keton penang aron-aso atum ha rongsopi damsi kurusar atum aphan keplangtang alamjir than damlo.

¹²Ansi kurusar akethe atum lapen akesar atum do-an chingrumsi bidi rilo, lapen rup atangka ake-ongpi ensi chedanbang atum aphan pisi pulo,

¹³“Asangho atum ajo amat vangsi netum amek kejang aphi la inghu pondet-lo pule rat atum aphan thannon.

¹⁴Labangso alam jongsi govornor arjulong-lote netum alangliphan pakroi thekpo, lapen nangtum akesung pen jokpo.”

¹⁵Ansi latum rup atangka dengsi latum kethan ateng klemlo, lapen labangso alam pini arni anta Jihudi atum angbong pachethanglang.

¹⁶Jisu latum aphan keputang asonthotsi bang kre isi asangho atum ha Galili damsi inglong arlu damlo.

¹⁷Latum alangliphan thek long-lok pen ardomkhrup-lo, bonta latum angbong mane atum ke la kroithip thedet-lo.

¹⁸Ansi Jisu latum adung vangsi latum aphan pulo, “Sining athak lapen Pirthe athak kadokave ajakong nephan nepitang-lo.

¹⁹Lahelo nangtum damra pirthe adang akhei kedo-an aphan sangho paplangra Po lapen Sopo lapen Karjong Kangthir amen pen halatum aphan baptisom pinon,

²⁰lapen Ne nangtum aphan nangkethan alam kedo-an kepakroijile halatum aphan than petnon; lapen chininon, Ne nangtum along labangso apirthe kejut anta nangdo dunverji.”