Read Karbi MATHIU 3 Bible Online

MATHIU 3 - Karbi bible

MATHIU 3

¹Halabangso ahut Jon Baptist Judia adet kejejangtang ajo cheklangsi pachethangsi pulo,

²“Nangtum aning chiruinon, pima sining arat tebok-het-lo.”

³Pima Isaiah montri alangli lamjirsi pudamlo, atheke alangli pulo. “Komane abang kejejangtang ajo hangkongsi pulo, ‘Nangtum Hemphu atovar sikpinon; alangli kedamji aphan tovar ban anta pakengpinon!’ ”

⁴Jon ape ke ka-ut angmi pensi thak-lo, lapen ok-reng pensi avam chekok-lo, lapen alangli kecho ahormu ke longvur lapen nampi apijo alang helo.

⁵Ansi Jerusalem lapen Judia adet adang an lapen Jordan akung arei kedo atum an alangli long damlo,

⁶lapen amethang methang apap hei hei chekobirbomsi alangli rideng pen Jordan alangroi along baptisom enlo.

⁷Bonta Pharisi lapen Saduki ake-ongpi atum baptisom ke-enji aphan alangli dung kevang thek longsi Jon halatum aphan pulo, “O pherui akhei, kevangji dokdok Arnam aning kethi pen kekatji aphan matsi nangtum aphan nangpareloma?

⁸Athikpet aning kecherui a-ot athe pathenon,

⁹lapen nangtum methang kejokji aphan ‘Abraham ke netum apolo’ puke nangtum matharinon; pima ne nangtum aphan nangpulang, Arnam labangso a-arlong hei hei aphan Abraham asomar pinchongthek.

¹⁰Lapen non mamat thengpi hei hei akeng-risi acho bitekang-lo, lapen athe keme kepathethe athengpi an pivekpo lapen me phrindutpo.

¹¹Ahok-lo, ning kecherui angthek aphan ne nangtum aphan lang pen baptisom pibomlo, bonta nephi kevangji abang ke nepar ajakong themulo. Alangli keng-op keponpiji anta ne-ot ave. Labangso abang nangtum aphan Karjong Kangthir lapen me pensi baptisom nangpiji.

¹²Alangli aso hongthrok akongvek otdongsido, lapen alangli methang ajimtim pangthei-etpo, lapen sok ke puru along chethappo, bonta aphe-e ke kemepmepin ame along phrindutpo.”

¹³Ansi Jisu Jon Baptist arideng baptisom ke-enjisi Galili adet pen ha Jordan alangroi along damsi alangli long vang-lo.

¹⁴Bonta Jon alangliphan kekhangji mathasi pulo, “Ne ke nang ridengsi baptisom ke-en nangji abangle, pisi nelong vang-loma?”

¹⁵Bonta Jisu thaksi alangliphan pulo, “Non ke lapusonle paplangnang. Pima dhoromi ason an kepaplengji aphan ili lapuson ke athikpet akamlo.” Ansi Jon ta alam kroidunlo.

¹⁶Lapen Jisu baptisom endet pen mamat lang along pen kora arlu damphit-lo. Lapen chini iktha, sining chingpudang-lo, lapen Arnam a-Karjong vothung ason nanghirlo, lapen alangli phuthak kanghu chethek long-lo.

¹⁷Lapen chini iktha, sining pen ase vangsi pulo, “La ke ne-Sopo, ne kechinghon abang-lo. Laphan ne ning dok-lo.”