Read Karbi MATHIU 4 Bible Online

MATHIU 4 - Karbi bible

MATHIU 4

¹Ansi Jisu aphan Hi-i Sarpo asat kepalangjisi Karjong Jisu aphan kejejangtang ajo pondet-lo.

²Lapen jo phlikep niphlikep an humdetsi alangli an ingchirlo.

³Ansi asat kelang abang alangli dung vangsi alangliphan pulo, “Nangli jongsi Arnam a-Sopo tangte him cheplangnon pura la arlong hei hei aphan punon.”

⁴Bonta alangli thaksi pulo, “La hastro along tok tang-lo, ‘Monit him pen lok-le kereng-iji kali, bonta Arnam angho pen nang kebar alam athetin pensi reng-iji.’ ”

⁵Ansi Hi-i Sarpo alangliphan Jeru-salem arongsopi kangthir along ponsi Kardomhemthepi angsong achele along paparjapsi pulo.

⁶“Nangli jongsi Arnam a-Sopo tangte ladak pen chingthubup non, pima hastro along toktang-lo. ‘Arnam nangli pen apot apherangke atum aphan hukum piji, lapen nangli kaiketa nangli keng kopine arlong along kepatekungke detjisi, halatum amethang ari pen nangliphan nangli rung ponphomji.’ ”

⁷Jisu alangliphan thaksi pulo, “Hastro along labangso alamta toktang-lo. ‘Nangli Hemphu, atheke, nangli Arnam aphan asat lang nangne.’ ”

⁸Puthot Hi-i Sarpo Jisu aphan kang-tuipik anglong along ponsi pirthe adang arat an lapen la adak atur an alangliphan paklang-lo,

⁹lapen alangliphan pulo, “Nangli jongsi nangli kengphu patongruira neliphan ardom lote neli la kadokave nangliphan nangpiji.”

¹⁰Ansi Jisu alangliphan pulo, “Damnon, Soitan! Pima la hastro along toktang-lo, ‘Hemphu, atheke nang Arnam aphan helo nang kangduk-kardom nangji, lapen alangliphansi ingdukchot nangji!’”

¹¹Ansi Hi-i Sarpo alangliphan o-tekang-lo, lapen chini iktha, sining apherangke atum vangsi alangliphan ru-thaibomlo.

¹²Ansi Jon Baptist aphan phatek thaptang-lo pu arjulongsi Jisu Galili adet damjuilo.

¹³Alangli Nazareth dodedetsi ha Kapernaum, Galili atalo akung arongsopi damsi ha Zebulun lapen Naphtali alongri do damlo.

¹⁴Isaiah montri keputang alam kepachekokjisi la plang-lo, atheke alangli pulo,

¹⁵“Zebulun alongri lapen Naphtali alongri, talo anat kedam atovar along, ha Jordan parai, Jihudi kalidet atum alongri, a-Galili!

¹⁶Kangting angbong kedo atum kethe-ang akethepi thek longji. Kethi abin adet kedo atum aphuthak, akethe-ang tur-angji.”

¹⁷Halabangso ahut pen Jisu pache-thang pangchengsi pulo, “Nangtum ning chiruinon, pima sining a-Rat tebok-het-lo.”

¹⁸Jisu Galili atalo akung kung kedam un ahut korte banghini aphan, atheke Pitor pu abang a-Simon, lapen alangli korte Andriu aphan thek-long-lo. Latum alanvar talo along varlo, pima latum ke ok kebeng atumlo.

¹⁹Lapen alangli latum aphan pulo, “Ne phi phi nangdunnon, ne nangtum aphan monit kebeng atum nangpinchongpo.”

²⁰Ansi latum hala mamat alan hei hei che-otekangsi alangli phi phi dunlo.

²¹Alangli asap damthusi akaprek banghini akorte atum aphan thekdamlo; latum ke Jebedi asopo Jems, lapen akorte Jon lo. Latum apo Jebedi pen pen telong arlo lan bu bomsi dolo. Jisu halatum aphan hang-lo,

²²lapen hala mamat latum telong lapen apo aphan otekangsi alangli phi phi dunlo.

²³Jisu Sinagog hei hei arlo lam thanponbomsi Sining a-Rat alamjir abirta keme pachethang-ponbomsi, lapen rat atum angbong akaprek kaprek akeso lapen aphu keso an pamesi Galili adet adang an damtup-lo.

²⁴Anke alangli nong Siria adet alongri an chethangpet-lo, lapen halatum alangli long ason kaprek kaprek akeso kepho atum, keklibup akeso kepho atum, hi-i kepholok atum, lapen thi-klak akeso kepho atum an aphan vanpet-lo, lapen alangli latum aphan pamepet-lo.

²⁵Lapen Galili adet, Dekapolis alongri, Jerusalem pen Judia adet lapen Jordan parai pen armu ake-ongpi atum alangli phi phi dunlo.