Read Karbi MATHIU 5 Bible Online

MATHIU 5 - Karbi bible

MATHIU 5

¹Jisu armu ake-ongpi atum aphan thek-longsi ha inglong arlu damsi ingnilo. Asangho atum alangli long vang-lo,

²lapen alangli halatum aphan thansi pulo:

³“Akarjongsi keduk atum rengme, pima sining a-Rat halatum arat lo!

⁴“Munduk atum rengme, pima halatum aning pliji!

⁵“Asotdut atum rengme, pima halatum pirthe chepahemphuji!

⁶“Dhoromi akam aphan kangchir lapen kang-it atum rengme, pima halatum ingkrangji!

⁷“Kangjinsothek atum rengme, pima halatum kangjinso longji!

⁸“Aning ingthir-et atum rengme, pima halatum Arnam aphan thek longji!

⁹“Aning kepangsamthek atum rengme, pima halatum aphan Arnam asomar pusi chethangji!

¹⁰“Dhoromi akam apot kechenek kepho atum rengme, pima sining arat halatum arat-lo.

¹¹“Mo ne pen apot nangtum aphan kepinrem, kechenek lapen akejoije pisi nangtum aphan kadokave akehingno alam nangkebokthap ahut nangtum rengme.

¹²Chehok-ra ning arong parpiknon, pima sining athak nangtum anong-e the-o; pima nangtum vangve ako halatum montri atum aphanta lasonsi chenek-lo.

¹³“Nangtumsi pirthe angtilo, bonta ingti jongsi lamdak-lo tangte, la kopi alongsi jokmejima? La ingtan pavar-chorra monit atum kepadongriji apar ke thangnat akamta vang-i-elo.

¹⁴“Nangtumsi pirthe akethe-ang-lo, inglong athak kekim arongsopi ke patu un-e.

¹⁵Kalite monit atum melur keisi hoton arum bibe, bonta melur archok athaksi batji lapen la hem arlo kedo atum an aphan pathe-angji.

¹⁶Lasi nangtum akethe-angta monit atum angno paturbongnon, latum nangtum akam keme hei hei pathek longnon, lapen sining athak kedo nangtum apo aphan anong pathenon.

¹⁷“Aron ban lapen montri atum kethan alam kepavirjisi ne vang-lo pura nangtum mathari. Ne la kepa-virji aphanle kevang kali, bonta la kepachokpetji aphansi vang-lo.

¹⁸Pima ne chenamsi nangtum aphan nangpulang, sining lapen pirthe avedet detik ke lapen aron alam an chekokpet petik ke aron angbong pen amek isi, kalite tokbor amuso isinatta virvedetji.

¹⁹Lahelo badu tame bangso ahukum hei hei angbong akebinei ahukum eson anle kroikrera monit atum aphan thanlote, alangli sining arat angbong akebinei abang pusi chethangji; bonta la kroira than lote labangso abang sining arat angbong akethe abang pusi chethangji.

²⁰Lasi ne nangtum aphan nangpulang, aron thekser lapen Pharisi atum apar nangtum adhoromipet akam lit munak nete nangtum jonghe setta sining arat lutdun longledetji.

²¹“Hako amonit atum aphan kepu alam nangtum arjulong-lo, atheke, ‘Nangtum bang apran enri, pima badutame bang apran enlote lake bisar adai phomeme atheng-lo.’

²²Bonta ne nangtum aphan nangpulang, badutame akorte aphan aning kethi abang aling ke bisar adai phomeme atheng-lo; lapen badutame akorte aphan junodak alam pen ington lote lake rong amei angbong adai phomeme atheng-lo, lapen badutame, ‘Nang kelu pik abang!’ pule pulote lake Chom ame angkang along keklo meme atheng-lo.

²³Lahelo nang dovan athak Arnam aphan athok ajir kepi ahut nang korte pen ning keche-oi do pu nangning chemathathu lote

²⁴dovan along nang kepi adan che-o tekang-ra aphrangsi damra nang korte pen jalangtha, lapen la aphile vangthura athok ajir pinon.

²⁵“Nangphan nang kekosor abang pen nang tovar kedam rap rap ahut-le jirpo jalang seraknon, lapu kalite nangphuthak kekosor abang nangphan kangsai abang arideng nanghodaiji, lapen nangphan chedanbang arideng nanghodaisi nangphan phatek nang-bengthotji.

²⁶Chenamsi ne nangtum aphan nangpulang, asapso adai anta nang tupetpetik-ke hadak pen nangphan nangpajokjedetji.

²⁷“Nang beisa klemri pu keputang alam nangtum arjulong-lo.

²⁸Bonta ne nangtum aphan nangpulang, beisa keklemji aning pen arloso aphan kelang abangphutin halabangso ahut pen la aning arlo labangpi pen beisa klem tang-lo.

²⁹Lapen nangmek ar-ele nangphan pap paklem lote la hekjok-ra varchornon. Pima nangmethang abang arpum pen nangphan Chom arlo kevarchor aparte nang ok ethan kevirdet abang nangphan memu.

³⁰Lapen nangri ar-e jongsi nangphan pap paklem lote la thanpet-ra varchor-non, pima nang methang abang arpum pen nangphan Chom arlo kevarchor apar nang ok ethan kevirdet abang nangphan memu.

³¹“Lapen puthot puthutang-lo, ‘Badutame, apiso chetilote alangli labangpi aphan kecheti aloh papi-nang.’

³²Bonta ne nangtum aphan nangpulang, badutame beisa pen apot apar apiso chetilo tangte alangli labangpi aphan beisapi pinchong tang-lo, lapen badutame la ketitang arloso pen chepangri lote alangli beisa klemdet-lo.

³³“Puthot hako ahut monit atum aphan kepu alam nangtum arjulong-lo, atheke, ‘Kechobei aseme tangri, bonta Hemphu aphan nang kechaktang aseme atengle klemnon.’

³⁴Bonta ne nangtum aphan nangpulang, thangnat asemeta tangri; sining penta kali, pima lake Arnam anghoilo;

³⁵lapen pirthe penta tangri, pima lake alangli kedong adimlo; lapen Jerusalem penta kali, pima lake recho kethe arongsopilo.

³⁶Lapen nangphu penta seme tangri, pima nangchu ejeng natta akelok kalite ake-ik nang pinchong thekthe.

³⁷Bonta nangtum keningje alam ‘Kalang’ tangte Kalang, ‘Kali’ tangte kali paplangnang. Pima la pen apar ke kehingno pensi vang-lo.

³⁸“Mek alar mek, so alar so pu keputang alam nangtum arjulong-lo.

³⁹Bonta ne nangtum aphan nangpu-lang, kehingno aphan khangri, lapen badu-tame nang kecheng ar-ele nang ardep lote la aphan arvi anatta chepithunon.

⁴⁰Lapen nangphuthak kekosorra nangchoi keponji aning kehang abang aphan nangchoi kedingta papon lonang.

⁴¹Lapen badutame kilomitar isi kepa-thondunjile nangphan pabor-ilo tangte laphan nang kilomitar hini thondun non.

⁴²Nanglong kechohang abang aphan pinon, lapen nanglong pen kechoramji aning kehang abang aphan pipedet cheplangri.

⁴³“Nang tebok abang aphan chinghonra nang hotur aphan lang-selet nangji pu keputang alam nangtum arjulong-lo.

⁴⁴Bonta ne nangtum aphan nangpulang, sining athak kedo nangtum a-Po asomar kecheplangji aphan nangtum ahotur atum aphan chinghonra nangtum aphan nang kechenek atum aphan Arnam angno ardom pinon,

⁴⁵pima alangli kehingno lapen keme atum aphan arni pavangver, lapen dhoromi lapen dhoromime atum aphan arve pajang bomlo.

⁴⁶Pima nangtum jongsi nangtum aphan kechinghon atum aphan chinghonchot lote kopi ale doma? Lapuson ke midu kerung atumta klemlo, kalima?

⁴⁷Lapen nangtum jongsi nangtum akorte aphan chinghonchot tangte kopi kematha thekthe akam klemloma? Kekroi-krelang atum lapusonsi klembomlo, kalima?

⁴⁸Tangte sining athak kedo nangtum Apo kechokpet asonthot-le nangtum ta chokpetnon.