Read Karbi MATHIU 7 Bible Online

MATHIU 7 - Karbi bible

MATHIU 7

¹“Nangtum aphan nangkangsai sedetji aphan nangtum bang aphan ingsairi.

²Pima nangtum kangsai atengthotsi nangtum aphanta nang ingsaiji, lapen nangtum keteng asonthotsi nangtum aphanta nang-tengthudetji.

³Lapen nang kopi apotsi nang methang amek arlo kedo athengpi achet chemathathedet-ra nang korte amekber langrong loma?

⁴Kalite nangmethang amek along thengpi achet dokok ta ‘Nangmekber nanghek-lang’ pu nang nang korte aphan kopusi puthek-loma?

⁵Angthin ke-ik abang! Aphrangke nangmethang amek arlo kedo athengpi achet chehekdet-tha; anke nang korte amekber kehekji aphan nang chechar pamepo.

⁶“Methan atum aphan mar kangthir piri, pima latum chetevarsi nangkor-rakpo. Lapen phak atum angno mukut-abor varri-pima latum la akeng pen dongthipji.

⁷“Hangnon, lapen nangtum aphan nangpidetji; rinon, lapen nangtum longji; pachengnon, lapen nangtum aphan nang ingpudetji.

⁸Pima kehang abangphutin longrepji, keri abang aling thek longji lapen kepacheng abang aling aphan ingpudetji.

⁹Kalite nanglitum angbong komane abang, asopo jongsi alangliphan him hang-lote laphan arlong pithurongjima?

¹⁰Mate la lang a-ok hang-lote pheruisi pithurongjima?

¹¹Nangtum hingno setta nangtum methang asomar aphan dan akeme chepithek lote, la apar sining athak kedo nangtum a-Po ke alangli long kehang atum aphan koson an akeme ahormu pipoma!

¹²“Nangtum aphan monit atum kopi nangkeklempisi nangtum aning kehangma, lasonthot-le, nangtumta halatum aphan klempivernon; pima Moses aron lapen montri atum kethan alam acho la helo.

¹³“Anghap angho kebi anat-le lut damnon, pima kevirdetji anat kedam anghap angho the-o, atovar ajamta thedung lapen la anat kelutdam atum ongdung;

¹⁴bonta kereng-iji achethe anat kedam anghap angho ke bihek, atovar ta chingkinret lapen la kethek long atum ong-e.

¹⁵“Kechobei amontri atum aphan cherehurnon. Halatum biresak arje cheparjansi nangtum along vang, bonta aning arlo ke halatum bang amar kethipon amahar atumlo.

¹⁶Athe pen nangtum halatum aphan chiniji. Ingsu arong ke drakha athe pathethe, kalite ingsuso arong ke thebo athe pathethe.

¹⁷Lasonsi thengpi keme arongtin ke athe keme pathe, bonta akeningjoino athengpi arong anke akehingno athesi pathe.

¹⁸Thengpi keme along akehingno athe pathethe, lapen ningjoino athengpi along athe keme pathe thekthe.

¹⁹Athe keme kepathethe athengpi arong an pipetsi me phrindutji.

²⁰Lasi athe pensi nangtum halatum aphan chiniji.

²¹“Nephan Hemphu, Hemphu pu kepu abangphutinle sining a-Rat lutdun longji, lapu kali; bonta sining athak kedo ne-Po aning kehang ateng keklem abang alingsi lutdun longji.

²²Halabangso arni ake-ongpi atum nephan ‘Hemphu, Hemphu! Nangmen pen netum montrilo, lapen nangmen pen hi-i atum aphan phlung-lo, lapen nangmen pen kemanghu meme akam ake-ongpi klemlo’ pusi puji.

²³Ansi ne halatum aphan thandakpo, ‘Ne nangtum aphan chinine pinlang, nedung pen damnon, kehingno keklem atum.’

²⁴“Tangte nelam hei hei karju lapen lapusonsi keklem abangphutin aphan ke abidi kedo amonit pen pangbardetpo. Atheke halabangso abang arlong athak ahem kimlo.

²⁵Lapen arve jang-lo, chala vang-lo, tomon vang-lo lapen la kadokave halabangso ahem pholo, bonta la krepkrelo. Pima la arlong athaksi kimdet-lo.

²⁶Lapen la nelam hei hei karju, bonsetta lapusonsi keklemkle abangphutin aphan ke akelupik amonit pen pangbardetpo. Atheke halabangso abang sangti athak ahem kimlo.

²⁷Lapen arve jang-lo, chala vang-lo, tomon vang-lo, lapen la kadokave halabangso ahem pholo, lapen la krep-railo.”

²⁸Jisu labangso alam hei hei ningje tangdet anke armu atum alangli kethan alam pen apot thirik-hurlo.

²⁹Alangli ke hala aron thekser atum ason kali, bonta ajakong kedo abang ason thak-thaksi halatum aphan thanlo.