Read Karbi MARK 10 Bible Online

MARK 10 - Karbi bible

MARK 10

¹Ansi Jisu halabangso adim otekangsi Judia alongri damlo, lapen Jordan hapu parai kap-lo. Armu atum puthot alangli long chingrumdunpet-lo, lapen alangli kai kethan asonthotsi halatum aphan lam thanlo.

²Manene a-Pharisi atum Jisu along vangsi alangliphan adai kenepji abidi rilo. Lasi halatum alangliphan arjulo, “Inut amonit apiso chetilongma?”

³Jisu halatum aphan thakdunsi pulo, “Moses nangtum aphan kopi ahukumsi pilo?”

⁴Halatum thakdunsi pulo, “Kecheti aloh tok-ra pachetinang pusi Moses pulo.”

⁵Bonta Jisu halatum aphan pulo, “Nangtum aning kangtang-ong apotsi alangli nangtum aphan labangso aron tok-lo.

⁶Bonta Arnam pirthe kepinchongcheng ahut penta pinso-arlo pinchong-lo.

⁷Labangso apotsi pinso abang api apo che-osi apiso pen dorap-rapji,

⁸lapen latum banghini inutpet plangji. Lasi hala pen apara latum ke banghini dojilang, lapu kali, bonta inutpetpo.

⁹Tangte Arnam kepachortang aling monit la pachekak nangnelo.”

¹⁰Halatum hem arlo chelutdamthudet aphi sangho atum Jisu aphan labangso alam arjuthulo.

¹¹Alangli halatum aphan pulo, “Badutame, apiso chetira akaprek arloso enthulo tangte, alangli ke aphrang apiso abethursi beisa klemtang-lo.

¹²Lapen badutame, apenan chetira akaprek apinso aphan penan dothulo tangte, labangpi ke beisa klemtang-lo.”

¹³Jisu kepa-otjisi manene amonit atum alangli long osomar vanlo. Bonta Jisu asangho atum halabangso amonit atum aphan ingchek-lo.

¹⁴Jisu la thek-longsi aning thi-lo, lapen halatum aphan pulo, “Osomar atum aphan nedung pavanglongnon; latum aphan khangri. Pima Arnam a-Rat ke lapuson atum arat-lo.

¹⁵Ne nangtum aphan ahok alamsi nangpupo, badutame, oso asonthot-le Arnam a-Rat dengde tangte alangli jonghe setta labangso arlo lutdun longledetji.”

¹⁶Ansi alangli osomar atum aphan arbak-lo, lapen halatum athak ari batsi ahirjume pilo.

¹⁷Ansi Jisu puthot kedamthujisi hadak pen kebar ahut inut amonit nangkatvirsi Jisu along vang-lo, lapen alangli ingno akengphu patongruisi alangliphan arjulo, “Kuru, nanglike inut mesen amonit-lo; kejut un-e achethe kelongji aphan ne kopi klem nangjima?”

¹⁸Jisu alangliphan pulo, “Nangli neliphan kopisi mesen pu puloma? Arnam inut apar ke baduta mesen kali.

¹⁹Pran enri, beisa klemri, chonghuri, chobei ahaki piri, pachereiri, nangpi nangpo anong pathenon pu hei hei ahukum an nangli chinipet-lo.”

²⁰Ansi alangli Jisu aphan pulo, “Kuru, neli oso chedap ahut penta lahei hei kadokave ahukum kroipet-lo.”

²¹Bonta Jisu alangliphan langding-lo, lapen alangliphan ingjinsosi pulo, “Nangli eson keklem nangji dolang. Damra nangli mar do-an jorra atangka keduk kelak atum aphan pinon, anke sining athak nangli khi dopo, lapen vang-ra neli long nangdunnon.”

²²Bonta alangli labangso alam arjulongsi amahang jang-ik-lo, lapen aning duksi damjuilo; pima alangli akhi do-olo.

²³Jisu amethang asangho atum aphan talavir langsi pulo, “Akhi kedo-o atum Arnam a-Rat kelutdun ko-an akesung!”

²⁴Sangho atum alangli lam pen apot manghuphrong-lo. Bonta Jisu halatum aphan puthot pulo, “Osomar atum! Arnam a-Rat kelutdun ko-an akesung!

²⁵Ka-ut ingprim arme kelut akesung apar keplang-o abang Arnam a-Rat kelutdun sungmu.”

²⁶Bonta sangho atum manghudetsi lahin lahin charjulo, “Tangte komatsi jok unjima?”

²⁷Jisu halatum aphan langdingsi pulo, “Monit atum ke la un-e tema, bonta Arnam ke un. Arnam ke kadoka-veta klem un.”

²⁸Ansi Pitor pulo, “Mathatha, netum kadokave che-o-etsi nang long nangdunlo.”

²⁹Jisu pulo, “Ne nangtum aphan ahok alamsi nangpupo, badutame, ne pen apot lapen birta keme pen apot, ahem, kalite akorte, kalite angjirmar atum aphan, kalite api-apo, kalite asomar, kalite arit hei hei keche-otekang abang ke la apar kelong ongthu muchotji.

³⁰Alangli labangso akai angbongta aphrang apar phan pharo ahem, lapen akorte, lapen angjirmar, lapen apei, lapen asomar lapen arit longthuji, lapen alangli la hei hei pen pen kechenekta phoji; lapen mo kevangji akai ahut alangli kejut un-e achethe longji.

³¹Bonta non kepaphrang penang atum paphiji, lapen non kepaphi penang atum paphrangji.”

³²Jisu lapen asangho atum Jerusalem kedamjisi tovar dambomlo, lapen Jisu ke halatum aphrang aphrang damlo. Jisu asangho atum manghuphrong-lo, lapen aphi aphi kedun amonit atum ke pherelo. Alangli puthot asangho bangkrehini atum aphan cheponsi amethang aphan keplangji dok dok alam halatum aphan thanlo.

³³Alangli halatum aphan pulo, “Ili Jerusalem arludampo, lapen Monit a-Sopo aphan kurusar kethe atum lapen aron thekser atum arideng hodaidetpo. Halatum alangliphan ado padosi kepathiji ahukum pipo, lapen alangliphan Jihudi kalidet atum arideng hodaipo.

³⁴Halatum alangliphan pinremji, abang athak ingthokji, champre abu pen sapji lapen pathilotji; bonta nithom aphi alangli rengthusi thurji.”

³⁵Ansi Jebedi asopo Jems lapen Jon Jisu adung vangsi pulo, “Kuru, netum nang pen kehang aling nang netum aphan nekepijisi netum ning hang-lo.”

³⁶Alangli halatum aphan pulo, “Ne nangtum aphan kopisi nangklempi nangjima?”

³⁷Halatum alangphan pulo, “Nang nangmethang adak-atur a-Rat angbong recho anghoi athak kangniji ahut, nang netum aphan nang ar-e anat inut lapen nang arvi anat inut nekepangnilongjisi netum ning hang-lo.”

³⁸Bonta Jisu halatum aphan pulo, “Nangtum kopisi kehang, lake nangtum chinine. Ne kejun aharlung pen nangtum jun unjima? Kalite ne ke-en abaptisom asonthot abaptisom nangtum en-unjima?”

³⁹Halatum pulo, “Netum un.” Jisu halatum aphan pulo, “Ne kejun aharlung pen nangtum junji, lapen ne ke-en abaptisom asonthot abaptisom nangtum enji,

⁴⁰bonta neke ne ar-e kalite ne arvi anat kepangniji aphan kangvaiji ajakong ave; kesikpitang atum aphansi Arnam labangso adim hei hei pidetji.”

⁴¹Hala akaprek sangho bangkep atum la arjulongsi Jems lapen Jon aphan aning jangjedung-dang-lo.

⁴²Lasi Jisu halatum kadokave aphan amethang adung hangpetsi pulo, “Honghari atum aphan kepangri atum ke halatum aphuthak ajakong do, lapen keja atum hukum kepiji ajakong do pame, lake nangtum chinilo.

⁴³Bonta nangtum angbong ke lapuson kalidet nangji. Nangtum angbong badutame hukum kepiji ajakong kedo abang keplangji aning hang-lo tangte, alangli ke nangtum aban plangvek nangji.

⁴⁴Lapen badutame nangtum angbong aphrangsi abang keplangji aning hang-lo tangte, alangli ke kadokave atum aban plangvek nangji.

⁴⁵Chenamsi, Monit a-Sopota bang arideng pen keru kethai kelongjile kevang kali, bonta keru kethaiji, lapen ake-ongpi atum aphan kepajokjisi amethang apran kechepiji aphan vang-lo.”

⁴⁶Ansi halatum Jeriko arongsopi nanglelo. Jisu amethang asangho atum lapen armu ake-ongpi atum pen pen Jeriko arongsopi pen nangkebar ahut Timaeus asopo Bartimais pu inut hilolo amek kave lapen kechohang chorek abang tovar akung ingnilunsi dolo.

⁴⁷Alangli lake Najareth asor a-Jisulo pu arjulongsi ase kethe pen hangsi kepuji pangcheng-lo, “O David asopo, Jisu! Nephan ne-ingjinsotha!”

⁴⁸Ake-ongpi atum alangliphan dojoinon pusi ingchek-lo. Bonta alangli aphrang apar kehang ase pathemuchotsi pulo, “O David asopo, Jisu! Nephan ne ingjinsotha!”

⁴⁹Jisu chingtonkoksi pulo, “Alangliphan ladak vannon.” Lasi alangliphan hangsi pulo, “Ning cheparongnon, lapen thurnon, alangli nangliphan nangkehang-lo.”

⁵⁰Ansi labangso amonit achoidingpo chevar-tekangphitsi lapen thurjetsi Jisu adung vang-lo.

⁵¹Jisu labangso abang aphan arjusi pulo, “Neli nangliphan kopisi klem nangjima?” Amek kave abang thakdunsi pulo, “Kuru, neli nelimek kechecharjisi ning hang-lo.”

⁵²Jisu alangliphan pulo, “Damnon, nangli methang akekroisi nangliphan pametang-lo.” Lapen hala mamat alangli mek checharlo, lapen alangli Jisu along tovar dunlo.