Read Karbi MARK 11 Bible Online

MARK 11 - Karbi bible

MARK 11

¹Halatum Jerusalem arongsopi leji dok dok ahut, atheke Bethphage lapen Bethani arongsopi adung nanglesi Oliv anglong ari ri vang-lo.

²Jisu amethang asangho bang hini aphan toisi pulo, “Hala nangtum kepangno arongle damnon, lapen haladak kelut dam pen mamat baduta kardondepinlang agadha aso ejon kekokdong nangtum thek-longpo. Nangtum la phlok-ra ladak vannon.

³Lapen komane abang jongsi nangtum aphan, kopi apotsi nangtum la klemloma pule nang arjulote, Hemphu la nangji tangho, lapen prapjin pen nang-chethonthudetji pule thakdunnon.”

⁴Lasi halatum damlo, lapen hem athengno tovar along ejon agadha aso kekokdong thek-long-lo, lapen halatum la phlok-lo.

⁵Ansi hadak karjapphrong atum angbong pen manene atum halatum aphan pulo, “Nangtum kopi apotsi labangso agadha aso phlok-loma?”

⁶Jisu halatum aphan kethan asonthotsi halatum thakdunlo, lapen halatum aphan la paponlong-lo.

⁷Halatum labangso agadha aso Jisu along vansi amethang methang ape labangso agadha athak limlo, lapen Jisu la athak ardonlo.

⁸Ake-ongpi atum ke amethang methang ape tovar athak bisi sangjirlo.

⁹Jisu aphrang lapen aphi kedun atum hangjo josi pulo, “Hosana! Hemphu amen pen kevang abang ke ahirjume atheng-lo.

¹⁰Ephusar David Recho kevangji arat ke ahirjume atheng-lo! Hosana kangtuinei adim!”

¹¹Jisu Jerusalem nanglesi Kardom-hemthepi arlo damlo, lapen kadokave amar aphan talavir lang-lo. Bonta arni thihek-lo apotsi alangli amethang asangho atum pen pen Bethani arongsopi damjuilo.

¹²Puthot arni halatum Bethani arongsopi kevang un ahut Jisu an ingchirlo.

¹³Alangli achar pen arvo kedo-o athebo arong thek-long-lo; lapen la athe dojibon pusi langdamlo. Bonta Alangli adung lesi arvo apar thangta thek-longle-det-lo pima lake thebo athe kepathe abotor kalilo.

¹⁴Ansi Jisu labangso athebo arong aphan pulo, “Non pen apara baduta nangthe kaiketa chochedetji.” Asangho atum labangso alam arjudun long-lo.

¹⁵Ansi halatum Jerusalem nanglelo. Jisu ke Kardomhemthepi arlo damsi hadak kejor-kenam atum aphan hadak pen kephlungji pangcheng-lo. Alangli tangka kelar atum atebul hei hei lapen vothung kejor atum anghoi hei hei tharlepi-et-lo,

¹⁶lapen badu aphanta Kardomhemthepi angbong thangnat amarta papon longledet-lo.

¹⁷Alangli halatum aphan thansi pulo, “Nehemke kadokave adet amonit atum akardom ahem pusi puji pu hastro along tok-lo, kalima? Bonta nangtum lake dokait atum kechepatu alongku pinchongtang-lo.”

¹⁸Kurusar kethe atum lapen aron thekser atum labangso alam arjulong-lo; lasi halatum alangliphan kepathiji abidi ribomlo, pima armu atum alangli kethan alam pen apot manghuhurlo apotsi halatum alangliphan pherelo.

¹⁹Arni ingsamtang-lo apotsi halatum rongsopi pen damjuilo.

²⁰Puthot adap halatum tovar kedam un ahut halabangso athebo arong angkur penta kethikhrai thek-long-lo.

²¹Pitor hala keplangtang alam chemathathusi pulo, “Kuru, langtha! Nang ahirjuno kepitekang athebo arong ke thikhraitang-lo.”

²²Jisu halatum aphan thakdunsi pulo, “Arnam aphan kroinon.

²³Che-namsi ne nangtum aphan nangpulang, labangso anglong aphan, ‘Cherungkok-ra talo along chevardam-chuinon,’ pu kepu abang aling aning bibera alangli kepu alam plangvekji pule kroilote, lake alangliphan klempidetji.

²⁴La apotsi ne nangtum aphan nangpulang, nangtum kechoningri pen kopine amar kechohang ahut, nangtum la longtang-lo pule kroinon; anke la nangtum aphan nangpidetji.

²⁵Lapen nangtum Arnam kardomjisi karjap ahut sining athak kedo nangtum apota nangtum akelet hei hei kediyajile, nangtum komane aputhak abekethur kopine alam do tangte, alangliphan diyanon.

²⁶Nangtum jongsi anut kaprek atum aphan diyaje tangte, sining athak kedo nangtum a-Po ta nangtum akelet hei hei diyajedetji.”

²⁷Halatum Jerusalem vangthulo. Jisu Kardomhemthepi arlo kehelatvoi ahut kurusar kethe atum lapen aron thekser atum lapen akesar atum alangli long vangsi,

²⁸arjulo, “Nangli lahei hei keklemji aphan kopi ahukum long-loma? Komatsi nangliphan la keklemji ajakong nangpi loma?”

²⁹Jisu halatum aphan pulo, “Neli nanglitum aphan eson alam nang-arjulang. Nangtum jongsi neliphan la nethanlo tangte, nelita, neli lahei hei keklemji aphan kopi ahukum long-loma, la nangtum aphan nangthanpo.

³⁰Jon baptisom kepiji ajakong konat pensi long-loma? Sining pen ma, mate monit penma?”

³¹Ansi halatum angbong lam chedanseisi pulo, “Etum kopisi pu apot-loma! Etum jongsi, ‘Sining pen,’ pule pulote alangli pupo, ‘Tangte nangtum kopi apotsi alangliphan kroikredet-loma?’

³²Bonta ilitum jongsi ‘Monit pen, pule pulo tangte...’” (Halatum armu atum aphan pherelo, pima kadokave atumta Jon ke inut Arnam ahok amontrilo pusi mathalo.)

³³Lasi halatum Jisu aphan thakdunsi pulo, “Nelitum chinine.” Jisu halatum aphan pulo, “Tangte neli kopi ahukum longsi lahei hei klemloma, lake nelita nanglitum aphan thanthelo.”