Read Karbi MARK 14 Bible Online

MARK 14 - Karbi bible

MARK 14

¹Kejok Achojun a-Meipi lapen Thap Kave a-Him Achojun Ameipi nangkeleji nini dolang. Kurusar kethe atum lapen aron thekser atum kepacherei abidi pen Jisu aphan kenepji lapen kepathiji abidi ribomlo.

²Halatum pulo, “Chojun Ameipi ahut ke ilitum la klem nangne, pima monit atum huriseiji tahai!”

³Bethani arongsopi kedo Simon pu inut si-i akeso kelong abang ahem Jisu dodamlo. Jisu an kecho kangni un ahut inut arloso kenemprujin athengpi arong pen kesor, adorsopik ajangthu nempru Alabastar pu a-arlong kelok abong pen vansi hadak vang-lo, lapen la arlong kelok abong paphukdaksi Jisu aphu athak dungjirlo.

⁴Bonta hadak kedo amonit atum angbong manene atum aning oilaksi lahin lahin chepulo, “Kopi athesi labangso ajangthu nempru thangbakbele phalangnoloma?

⁵Pima rup atangka pharo kethom sose ador pen labangso ajangthu nempru jorsi, atangka keduk-kelak atum aphan pi unji apot-lo!” Lapen halatum alangliphan jasemetsi sorsarrip-lo.

⁶Bonta Jisu pulo, “Alangliphan thangta klemri! Nanglitum alangliphan kopi athesi pasung-loma? Alangli neliphan mesen akamsi klemtang-lo.

⁷Pima keduk-kelak atum nanglitum along kaiketa doverji, lapen nanglitum aning kehang aling nanglitum halatum aphan rap unji; bonta neli ke nanglitum along dovervedetji.

⁸Labangpi ke un an klemtang-lo. Neli bang arpum kepipji aphansi alangli aphrang pen la neli bang jangthu nempru patiptang-lo.

⁹Lapen chenamsi neli nanglitum aphan nangpulang, pirthe adang birta keme kepachethang adim aling labangpi aphan kechepamathathuji aphan la alangli keklemtang akamta thanpondetji.”

¹⁰Hala sangho bangkrehini atum angbong pen Judas Iskariot pu inut abang Jisu aphan kurusar kethe atum arideng kehodaijisi halatum along damlo.

¹¹Ansi halatum la arju longsi chehok-lo, lapen alangliphan tangka kepiji chak-lo. Lasi alangli Jisu aphan halatum arideng kehodaijisi asoi keme ribomlo.

¹²Thap Kave a-Him Achojun a-Meipi aphrangsi arni, atheke Kejok Achojun a-Meipi aphan biresak aso kethu arni Jisu asangho atum Jisu aphan arjulo, “Kejok Achojun a-Meipi a-an kechoji aphan netum konatsi sikdam nangjima? Nang ning kehang kopima?”

¹³Alangli asangho bang hini atum aphan toisi pulo, “Rongsopi damnon. Hadak tebuk pen lang kepon inut amonit nangtum pen chetongji. Nang-tum alangli phi phi dunra,

¹⁴alangli kelutdam ahem ahemphu aphan punon, ‘Kuru pulo, neli neli sangho atum pen Kejok a-Mei a-an kechoji aphan alohi kedo angdeng konatma?’

¹⁵Anke alangli mamat nangtum aphan hala kesiktang lapen kenangji amar an kedo angsong akethe angdeng nangpaklangpo. Etum an kechoji aphan hadak-le sikdamnon.”

¹⁶Ansi sangho atum nangbarsi rongsopi damlo, lapen alangli halatum aphan kethan asonthotsi halatum kadokave longdamlo; lapen halatum Kejok Achojun a-Meipi a-an sikdamlo.

¹⁷Arni kangsam ahut Jisu amethang asangho bangkrehini atum pen vang-lo.

¹⁸Halatum ingnisi an kecho un ahut Jisu pulo, “Chenamsi ne nangtum aphan nangpulang, nangtum angbong inut abang, atheke ne pen an kecho rap rap abang nephan hotur arideng hodaiji.”

¹⁹Sangho atum aning aduk dolo, lapen inut pen aphi inut Jisu aphan karjuji pangcheng-lo, “Lake neli kali, kalima?”

²⁰Jisu halatum aphan thakdunsi pulo, “Alangli ke nangtum bangkrehini angbong pen inut abang-lo; atheke ne pen kasu ehong along him kenim rap rap abang helo.

²¹Hastro along ketok asonthotsi Monit a-Sopo thiji; bonta pei pei! Hala Monit a-Sopo aphan hotur arideng kehodai abang ko-an akesung pho nangpoma! Halabangso abang amahang thekthedet asonte alangliphan meparji apot-lo.!”

²²Halatum kecho un ahut Jisu him eplang ensi hirjume hang-lo, lapen la bengsi asangho atum aphan pilo, lapen pulo, “La entha, lake nebang arpumlo.”

²³Labangso aphi alangli harlung ehong enlo, lapen Arnam aphan kero pisi halatum aphan pilo; lapen halatum la junlo.

²⁴Jisu halatum aphan pulo, “Lake nevilo; ongdung atum aphan ajok kedung avilo; lake Arnam akechechak kepathir-i avilo.

²⁵Ne chenamsi nangtum aphan nangpulang, mo Arnam a-Rat angbong drakha ahorlang kemi kejunji arni nangleletik ke ne kaiketa drakha ahorlang junjelo.”

²⁶Ansi halatum kero alun lundetsi Oliv anglong along damlo.

²⁷Jisu halatum aphan pulo, “Nang-tum do-an nephan otekangsi katkoiji; pima hastro pulo, ‘Biresak kevi abang aphan Arnam pathipo, lapen biresak atum an pratseipo.’

²⁸Bonta nephan neparengthudet aphi ne nangtum aphrang ha Galili adet dampatenoji.”

²⁹Pitor thakdunsi pulo, “Kadokave atumle nangphan nang-ote-kang-et setta neke nangphan kaita nang-o-e.”

³⁰Jisu Pitor aphan pulo, “Chenamsi ne nangphan nangpulang, peningve mamat vo batai hini kuke ako nang nephan chinine pusi batai kethom puji.”

³¹Bonta alangli abatai batai ningje-thipsi pulo, “Ne nanglong nangthidun nangkokji setta ne lason kaita pupedetji.” Lapen sangho kadokave atumta lasonsi pupet-lo.

³²Halatum Gethsemane pu elong adim vang-lo, lapen Jisu amethang asangho atum aphan pulo, “Ne Arnam kardomdam ahut nangtum ladak-le ingniphrongtha.”

³³Alangli Pitor, Jems lapen Jon aphan ari cheponlo. Alangli aning oise lapen aning dukpik-lo.

³⁴Ansi alangli halatum aphan pulo, “Ne ning dukpik-lo; la pen ajok ne kethithuji anbak-lo. Dak-le dora no kang-ar pen dotha.”

³⁵Alangli asapso damchotsi longle athak domkhrup-lo, lapen unte halabangso akesung apor alangli pen kepaheloji aphan alangli Arnam cho-ardomlo.

³⁶Alangli choningrisi pulo, “O Po, O ne-Po! Nang ke kadokaveta klem un. Labangso aharlung ne long pen pahelotha. Bonta ne ning kehang kali, nangning kehangle paplengnang.”

³⁷Alangli vangsi halatum amek kejangklip thek-long-lo. Alangli Pitor aphan pulo, “Simon, nang nangmek kejangma? Nang porphai isi anta honding un-edetma?”

³⁸Lapen alangli halatum aphan pulo, “Nangtum asat keklokledetjile no kang-ar pen dora Arnam ardomvernon. Chenamsi karjong ke aning hang, bonta ok ke ajakong ave.”

³⁹Alangli damthulo, lapen aphrang alamthethot pen Arnam ardomlo.

⁴⁰Alangli puthot vang-lo, lapen sangho atum aphan amek kejangklip thek-long-lo, pima halatum kemek-i saidelo, lapen halatum alangliphan thakdun-thekthe det-lo.

⁴¹Alangli batai kethom aphong vangthusi halatum aphan pulo, “Nangtum non anta nangmek jangbomsi sangbom langma? Chok-lo! Apor nangletang-lo! Langtha, Monit a-Sopo aphan papi atum arideng hodaitang-lo!

⁴²Thurnon, ili damlonang! Langtha, nephan hotur arideng kehodaiji abang nangletang-lo!”

⁴³Jisu lam keningje un ahut Judas pu sangho bang krehini angbong pen inut abang hadak vang-lo. Kurusar kethe atum, aron thekser atum lapen akesar atum nangketoidun a-armu atumta alangli long nangdunlo. Halatum arideng nokjir lapen kaibong dolo.

⁴⁴Ansi Jisu aphan hotur arideng kehodaiji abang halatum aphan angthek paklangsi pulo, “Ne kangjupji abang aling helo, nangtum kenangji abang-lo. Alangliphan nep-ra paton pame pen ponnon.”

⁴⁵Judas nangkele pen mamat Jisu adung damsi pulo, “Kuru!” Lapen alangli Jisu aphan ingjup-lo.

⁴⁶Ansi halatum Jisu aphan nepsi ot-het-lo.

⁴⁷Bonta hadak karjapphrong atum angbong pen inut abang anokjir chesatsi kurusar kethenei aban ano ehi chorphlak-lo.

⁴⁸Lasi Jisu halatum aphan pulo, “Nanglitum neliphan kenepji aphan dokait aphan asonthak thaksi nokjir lapen kaibong vansi vang nangkok-loma?

⁴⁹Neli arnivang Kardomhemthepi arlo lam kethan ahut neli nanglitum pen dorap rap-lo, lapen nanglitum neliphan nepnedet-lo. Bonta hastro alam chekokvek nangji.”

⁵⁰Ansi asangho atum an alangliphan oprupsi katkoilo.

⁵¹Jisu aphi phi inut ariso dunlo. Alangli linen ape epaknat pindeng-lo. Halatum alangliphan kenepji bor-ilo.

⁵²Bonta alangli ape che-otekangsi areng angse kat-lo.

⁵³Ansi halatum Jisu aphan kurusar kethenei akeng-ri ponlo. Kurusar kethe atum an, akesar atum lapen aron thekser atum hadak chingrumpet-lo.

⁵⁴Pitor achar achar pen Jisu aphi aphi dunsi kurusar kethenei atikup arlo anta dunlo, lapen keton aron-aso atum pen ingni rap rapsi me chinghipdunlo.

⁵⁵Ansi kurusar kethe atum lapen kangsai Ameipi amonit atum an Jisu aphan kepathi longji aphan alangliphan adai kepado ahaki ribomlo, bonta halatum long thekthedet-lo.

⁵⁶Ake-ongpi atum alangli bethursi kechobei ahaki pilo setta halatum kepi ahaki chetontedet-lo.

⁵⁷Ansi manene atum Jisu abethursi kechobei ahaki pisi pulo,

⁵⁸“‘La monit ari pen kekim a-Kardomhemthepi parudetsi nithom angbong monit atum ari pen kekim kalidet akardom ahemthepi ne kimpo.’ pu labangso amonit kepu netum arjudun long-lo.”

⁵⁹Tebonta halatum kepi ahaki chetontedet-lo.

⁶⁰Lapen kurusar kethenei abang mei angbong arjapsi Jisu aphan arjulo, “Latum nangli bethursi kepu alam nangli kechethakdunji alam avema?”

⁶¹Bonta Jisu dojoisi thangta chethak-dundedet-lo. Puthot kurusar kethenei abang alangliphan arjulo, “Ahirjume atheng a-Arnam a-Sopo Khristo nangli heloma?”

⁶²Jisu thakdunsi pulo, “Neli helo, lapen Monit a-Sopo Jakong Kethenei a-Bang ar-e kangni, lapen sining anghun athak kevang nanglitum kadokave thek-longji!”

⁶³Kurusar Kethenei abang amethang achoi keding hei hei ching-seksi pulo, “La apar ilitum kopi ahaki nangjilangma!

⁶⁴La Arnam aphan kepinrem nanglitum arjulongtang-lo. Nanglitum kopisi kemathama?” Alangli kethi nangji a-ot do pusi halatum kadokaveta pupet-lo.

⁶⁵Lapen manene atum alangliphan kangthokji pangcheng-lo, lapen amahang dipsi, alangliphan tengsi pulo, “Nangphan nangketeng abang komatma, putha!” Lapen keton aron-aso atum alangliphan tengsi pondet-lo.

⁶⁶Aber atikup along Pitor kedo un ahut Kurusar kethenei abanpi inut vang-lo,

⁶⁷lapen Pitor aphan hadak me kechinghip thek-longsi alangliphan langdingsi pulo. “Nanglita hala Najareth asor a-Jisu along kedodun abang-lo.”

⁶⁸Bonta alangli chekrongkredetsi pulo, “Neli chinine, nangli kopisi kepu-ma, lake neli chinine,” Lapen alangli thekup anghap amahang anat damlo, lapen hala mamat vo ejon kulo.

⁶⁹Halabangso abanpi alangliphan hadak thekthu longsi hadak karjap-phrong atum aphan pulo, “Labangso amonitta halatum angbong inut-lo!”

⁷⁰Bonta Pitor puthot chekrongkredet-lo. Malomso aphi hadak karjapphrong atum Pitor aphan pulo, “Ahok-lo, nanglita halatum angbong inut-lo. Pima nanglita Galili amonit-lo.”

⁷¹Lasi Pitor semetangsi puthulo, “Neli seme tangsi pulo, neli ahok alamsi thanlo! Jongsi kali tangte Arnam neliphan aduk nepapinang. La nanglitum kepudam amonit aphan neli chinine binong.”

⁷²Ansi hala mamat vo ejon batai hini aphong kulo, lapen Jisu kepu, “Vo ejon batai hini aphong kuke ako nang nephan batai kethom aphong chinine pusi puji.” Pu alam Pitor chemathadamlo. Lapen alangli jasemet chirulo.