Read Karbi MARK 15 Bible Online

MARK 15 - Karbi bible

MARK 15

¹Adap kangthang pen mamat kurusar kethe atum hala akesar atum, aron thekser atum lapen kangsai Ameipi amonit atum aphan chetongdamsi chingvailo, lapen alam parailo. Halatum Jisu aphan kokponsi Pilat arideng hodailo.

²Pilat alangliphan arjulo, “Nangli Jihudi atum arechoma?” Jisu thakdunsi pulo, “Nanglisi pulo.”

³Kurusar kethe atum alangliphan adai tin-olo.

⁴Lasi Pilat alangliphan arjuthulo, “Nangli thangta chethakdun movema? Halatum nangliphan ko-an adai tinloma, lale chemathatha!”

⁵Bonta Jisu thangta chethak-dun-dedet-lo. Lasi Pilatke manghuhak-lo.

⁶Kejok Achojun a-Meipi ahuttin rat atum kehang aling phatek kejang atum angbong pen inut aphan Pilat pajokbom.

⁷Ansi Barabbas pu inut amonit hala recho abekethur atum pen pen phatek jang-lo. Halatum recho abekethur ahut monit apran enlo.

⁸Armu atum vangsi Pilat kai keklembom ateng keklemji aphan choningrilo.

⁹Bonta Pilat thakdunsi pulo, “Neli nanglitum aphan Jihudi atum arecho nangpajokpi nangjima? Nanglitum aning kehang laheloma?”

¹⁰Pima kurusar kethe atum kelang un-e apotsi Jisu aphan alangli rideng hodailo pu alangli chinipamelo.

¹¹Bonta Jisu alar Barabbas aphan kepalophlotji aphan Pilat aphan kepa-choningrijisi kurusar kethe atum rat atum aphan chorung-lo.

¹²Pilat puthot armu atum aphan pulo, “Tangte nanglitum Jihudi atum arecho pu kepu abang aphan neli kopi inghoi nangpoma?”

¹³Halatum puthot hangjosi pulo, “Alangliphan thengparpan athak saknon!”

¹⁴Pilat halatum aphan pulo, “Kopi apot-lo? Alangli kopi akehingnosi keklemlo?” Bonta halatum ansose kehang ase pathethumuchotsi pulo, “Alangliphan thengparpan athak saknon!”

¹⁵Ansi Pilat armu atum aning kepangsamji aning hangsi halatum aphan Barabbas pajokpilo; lapen champre abu pen Jisu aphan pachoksi thengparpan athak kepasakji aphan hodaidet-lo.

¹⁶Chedanbang atum Jisu aphan govornor ahem atikup arlo ponlo, lapen chedanbang amokha isi an aphan chehangsi pangrumpet-lo.

¹⁷Halatum alangliphan hepi arje ape pindeng-lo, lapen ingsu aro pen phu avaikang selamsi alangli phu athak kup-lo.

¹⁸Lapen, “Kardom, Jihudi atum arecho!” pusi halatum alang-liphan kepalemlem pen kardom kepiji pangcheng-lo.

¹⁹Lapen halatum arpik ehong pen alangli phu athak theng-lo, lapen abang athak ingthok-lo, lapen akengphu patongruisi alangliphan palem lem pen ardomlo.

²⁰Halatum alangliphan ingnekchoidet aphi hala hepi arje ape phlok-lo lapen ape methang pindengthulo. Anke halatum alangliphan theng parpan athak kesakji aphan ingtan ponlo.

²¹Ansi Simon pu abang havar pen kevang un ahut tovar chetongsi chedanbang atum alangliphan toi bor-isi Jisu athengparpan paponlo. Alangli ke Alekjendar lapen Raphas apolo, lapen Sairen arongsopi asorlo.

²²Halatum Jisu aphan Golgotha, atheke “Phubongkok” pu adim ponlo.

²³Halatum alangliphan Mirh pu araki kedo abap keho pen kepang-vuitang adrakha ahorlang pilo, bonta Jisu la junjedet-lo.

²⁴Ansi halatum alangliphan thengparpan athak sak-lo; lapen komat abang kopi longjima, la kepatiniji aphan halatum khadot pathusi alangli pe chethak-lo.

²⁵Halatum alangliphan thengparpan athak kesak ahut apor adap baji sirkep-lo.

²⁶Alangliphan adai ketin alamthe kepachini ke, “JIHUDI ATUM ARECHO,” puhelo.

²⁷Halatum Jisu along akaprek bang hini aphanta thengparpan athak sakdunlo. Inut abang aphan Jisu ar-e anat lapen akaprek inut aphan ke Jisu arvi anat sak-lo.

²⁸Lapen hastro along ketok, “Alangliphanta hala adai kedo atum aphan pen pen lakha ponrap-pet-lo,” pu alam chekokpet-lo.

²⁹Tovar kevang-kedam atum aphu chehejuksi lapen alangliphan ingnekchoisi pulo, “Ai! Kardomhemthepi kephrira nithom angbong kekimthuthek abang!

³⁰Nonke thengparpan pen nanghirra nangmethangle chepajoktha!”

³¹Lasonthak thaksi kurusar kethe atum lapen aron thekser atumta Jisu aphan ingnekchoisi lahin lahin chepulo, “Alangli bang aphan ke pajokthek, bonta amethang ke chepajok thekthe!

³²Ilitum kethek-longra alangliphan kekroithekji aphan la Khristo, atheke Israel atum arecho nonke theng parpan pen nangpahirnang.” Lapen alangli long thengparpan athak kesak dun atumta alangliphan putot-lo.

³³Nerlo chitim ahut pen arni kangsam baji kethom ahut an det adang ingtingkuk cheplang-lo.

³⁴Arni kangsam baji kethom apor Jisu ase ke-the pen hangsersi pulo, “Eloi, Eloi lama sabakthani?” Labangso alam atheke, “Ne Arnam, ne Arnam! Nang nephan kopisi ne-obup loma?” puhelo.

³⁵Hadak karjapphrong manene atum la arjulongsi pulo, “Arjutha, alangli Elijah aphansi kehang.”

³⁶Ansi halatum angbong inut abang katvirsi sponj isi drakha ahorlang kethor along nimlo lapen arpik ehong pen la krongsi la alangli ingtur along bat-lo lapen pulo, “Thaho! Alangliphan thengparpan pen kepahirji aphan Elijah vangjima, vangvema, lale langdun sinangho!”

³⁷Ansi Jisu Jasemet hangsersi thilot-lo.

³⁸Kardomhemthepi arlo kangthir angdeng angno anat kehing ape, athak pen aber anta chingseksorlo.

³⁹Hadak alangli ingno karjapther, chedanbang bang pharo ahemphu abang Jisu lapuson kethi thek-longsi pulo, “Ahok-lo, labangso abang Arnam a-Sopo binong-lo!”

⁴⁰Hadak achar pen kelangdun arlosomar atumta dolo. Halatum angbong Megdala asor a-Meri, Jems akebi lapen Joseph apei Meri, lapen Salomita dolo.

⁴¹Jisu Galili adet kedo ahut latum alangli long dunlo, lapen alangliphan ru-thailo. Alangli pen pen Jerusalem kedam rap rap akaprek ake-ongpi arlosomar atumta hadak dolo.

⁴²Arni ingsamlo, lapen lake Kesik Kedang arni, atheke Sabbath Arni pen aphrang arnilo apotsi,

⁴³Arimathea asor a-Joseph angthin chepathesi Pilat along damlo, lapen Jisu abang arpum kepon longji aphan choningrilo. Alangli ke kangsai amei amonit atum angbong inut aman kedo abang-lo, lapen alangli methangta Arnam a-Rat aphan inghongding-lo.

⁴⁴Bonta Jisu thitang-lo pu arjulongsi Pilatke manghuhak-lo. Lasi alangli chedanbang bang pharo ahemphu aphan hangsi Jisu thi-ettang-loma pusi arjulo.

⁴⁵Lapen Chedanbang bang pharo ahemphu pen Jisu thi-ettang-lo pu chinisi alangli Joseph aphan Jisu abang arpum paponlong-lo.

⁴⁶Joseph linen ape keme epak namlo, lapen abang arpum pasunsi la pen perhetsi arlong kehongtang atipit along bidamlo. Ansi alangli atipit amangho along arlong pakong-long thip-lo.

⁴⁷Megdala asor a-Meri, lapen Joseph apei a-Meri atum langdun pamesi Jisu abang arpum kebidam adim thek-long pamelo.