Read Karbi MARK 16 Bible Online

MARK 16 - Karbi bible

MARK 16

¹Sabbath arni aphi Megdala asor a-Meri lapen Jems apei Meri lapen Salomi atum Jisu abang arpum kepatipji aphan kenemprujin amar namdamlo.

²Hithi arui kecheng arni adapprang, arni kevang pen mamat halatum thiri along damlo.

³Halatum lahin lahin chepu ponlo. “Tipit amangho pen matsi etum aphan arlong epakong-longpi poma?”

⁴Ansi halatum aphu chingthursi arlong kepakong-longtang thek-long-lo. Halabangso a-arlong thepik-lo.

⁵Halatum tipit arlo lutdamlo, lapen hadak inut ariso choi kelok chingchoisi ar-e anat kangnilun halatum thek-long-lo. Lapen halatum jasemet pherelo.

⁶Bonta alangli halatum aphan pulo, “Phereri. Ne Chinilo, hala thengparpan athak kethi Najareth asor a-Jisu aphansi nangtum rilo. Alangli thurtang-lo. Alangli ladak avelo. Langtha halatum alangliphan kebi adim lahelo.

⁷Bonta damra alangli sangho atum aphan lapen Pitor aphan labangso abirta thandamnon. Alangli nanglitum aphrang dam patenosi Galili adet dampo, lapen alangli nanglitum aphan kepu asonthotsi hadak nanglitum alangliphan thek damlongpo”.

⁸Lasi halatum thiri pen nangbarsi kekat pen damlo, pima halatum a-ok klemhurlo, lapen manghuphrong-lo. Halatum badu aphanta thangta pupedet-lo, pima halatum phereduk-lo.

⁹Jisu kethi pen thurdet aphi, hithi arui aphrangsi arni adapprang alangli Megdala asor a-Meri aphan aphrangsi cheklang-lo. Ha aphrang ahut alangli labangpi along pen hi-i bang throksi phlung-lo.

¹⁰Labangpi damsi ari asangho atum aphan thandamlo. Halabangso ahut halatum chiru chernapsi dolo.

¹¹Bonta alangli reng-lo lapen labangpi alangliphan thek-long-lo pu labangpi kethan alam halatum kroikredet-lo.

¹²Labangso aphi halatum angbong bang hini atum rong anat kedam un ahut Jisu arje prekjek pen halatum aphan cheklang-lo.

¹³Latum vangsi akaprek atum aphan labangso alam thanlo, bonta halatum latum kethan alam kroikredet-lo.

¹⁴Aphisi sangho bang kre isi atum an kecho un ahut Jisu halatum aphan cheklang-lo. Ansi halatum akekroikre lapen aning buiklui hak huk apot alangli halatum aphan ingchek-lo, pima alangli kethi pen thurdet aphi alangliphan kethek-long atum kethek-long alam halatum kroikredet-lo.

¹⁵Alangli halatum aphan pulo, “Pirthe adang damra kadokave amonit aphan birta keme thandamnon.

¹⁶Kekroira baptisom ke-en abang aling jokji, bonta kekroikre abang aling aphan ado padoji.

¹⁷Kekroi atum aphan kemanghumeme akam hei hei keklemji ajakong piji. Halatum ne men pen hi-i atum aphan phlungji, lapen halatum adet kaprek kaprek alam pen ningjeji,

¹⁸halatum pherui hei hei otji, lapen bikar alangle jun setta halatum aphan phangnonedetji, halatum kesodet atum athak ari batji lapen halatum medetji.”

¹⁹Hemphu Jisu latum aphan la pudet aphi alangliphan sining athak rungpondet-lo, lapen hadak alangli Arnam ar-e anat ingnilo.

²⁰Ansi sangho atum damsi bithe bitha pachethangdamlo. Hemphu halatum pen klem rap rap-lo, lapen kemanghumeme akam hei hei klemsi halatum kepachethang alam ahok pu aporman paklang-lo.