Read Karbi MARK 3 Bible Online

MARK 3 - Karbi bible

MARK 3

¹Jisu puthot sinagog arlo damthulo. Hadak inut ari ehong ke krenghak amonit dolo.

²Hadak kedo manene atum ke alangliphan adai ketinji abidi risi, alangli Sabbath Arni labangso amonit aphan keso pamejima pusi alangliphan langdunding-lo.

³Alangli hala ari ke krenghak abang aphan pulo, “Thurra ladak mei angbong vangnon.”

⁴Lapen alangli halatum aphan pulo, “Sabbath Arni ke keme akamsi klemlongma, mate kehingno akamsi klemlongma? Apran keraima, mate apran kepavirtong longma?” Bonta halatum doklip-lo.

⁵Alangli aning kethi pen halatum aphan talavir lang-lo; bonta halatum aning buiklui-hak-huk apotsi alangli ning dukparlo. Ansi alangli halabangso amonit aphan pulo. “Nangri chephejeng non.” Alangli ari chephejeng-lo, lapen ari medet-lo.

⁶Pharisi atum sinagog pen barsi hala mamat Herod abe atum pen chetongdamlo, lapen halatum alangliphan kepathiji abidi chingvailo.

⁷Jisu amethang asangho atum pen pen Galili atalo anat damlo, lapen armu ake-ongpi atum alangli phi phi dunlo. Latum Galili adet, Judia adet,

⁸Jerusalem arongsopi, Idumia adet, Jordan hapu parai adet, Tair lapen Sidon arongsopi adung arei ahavar hei hei pensi vang-lo, pima latum Jisu keklem akam alam arjulong-lo.

⁹Armu ongpik apotsi armu atum Jisu aphan kepet-het-hedetji aphan Jisu amethang asangho atum aphan telongso isi pathiktoilo.

¹⁰Pima alangli penang atum aphan keso pamelo. Lasi keso atum an alangliphan ke-otjisi jasemet chepetdunlo.

¹¹Lapen kangthirthe ahi-i kepho atum alangliphan thek-long-lote, halatum alangli ingno krepthorsi lapen hangsersi, “Nang ke Arnam a-Sopolo,” pu pupulo.

¹²Bonta alangli komatma, la halatum badu aphanta kethanthe-detjisi alangli hi-i atum aphan hukum pi pasodak-lo.

¹³Ansi Jisu inglong arludamlo, lapen alangli kenangji amonit atum aphan amethang adung hang-lo, lapen halatum alangli dung vang-lo.

¹⁴Alangli bang krehini aphan ingvailo, lapen latum aphan alangli ketoitang atum pusi pulo. Alangli halatum aphan pulo. “Nangtum nelong nangkedodunji lapen nangtum kepachethang-damji aphanta ne nangtum aphan nangketoijisi ne nangtum aphan ingvaitang-lo,

¹⁵lapen nangtum hi-i atum aphan kephlungji ajakong longpo.”

¹⁶Alangli kangvai bang krehini atum lahelo: Simon, (Jisu alangliphan Pitor pusi amen irlo.)

¹⁷Jebedi asopo Jems lapen Jems akorte Jon, (Jisu la banghini aphan Bonerges pusi amen irlo; Labangso alam atheke sining kangder asonthak thak amonit, puhelo.)

¹⁸Andriu lapen Philip, Bartholomeu lapen Mathiu, Thomas lapen Alpheus asopo Jems, Thadeus lapen Kanaan a-Simon,

¹⁹lapen Jisu aphan hotur arideng kehodai abang, Judas Iskariot.

²⁰Ansi Jisu ahem chedamlo. Lapen puthot armu ake-ongpi atum chingrumlo. Lasi Jisu lapen asangho atum an kechoji anta apor longledet-lo.

²¹Jisu ahem asangho atum la arjulongsi alangliphan kekhangjisi vang-lo; pima monit atum, “Alangli ke ingchamlo,” pusi Jisu aphan puhurlo.

²²Jerusalem pen kevang manene aron thekser atum pulo, “Alangli Beelzebul pu ahi-i pholok-lo; lapen alangli hi-i atum aphan kephlungji aphan hi-i atum arechosi alangliphan jakong pilo.”

²³Lasi Jisu halatum aphan amethang adung chehangsi lamlir hei hei pen pulo, “Kopusi Soitanle Soitan aphan phlung unjima?

²⁴Lapen isi arat abe abe dosi charvolote, labangso arat ke do thekthedetji.

²⁵Lapen ihum ahem amonit atum abe abe dosi halatum angbong chebohong lote, labangso ahem ke thirthedetji.

²⁶Lasi Soitanta amethang abe chethursi abe abe dolote, alangli dover thekthedetji, bonta la jutdetji.

²⁷“Jakong kangtangrak abang aphan kok paphrangphrete, la jakong kangtangrak abang ahem lut dam un-e, lapen amar atar thipon un-e; bonta alangliphan kokdet aphisi ahem kuruk pon-unji.

²⁸“Chenamsi ne nangtum aphan nangpulang, monit atum apap an lapen Arnam aphan kepinrem apot anta diyadetji,

²⁹bonta badutame, Karjong Kangthir aphan pinrem lote, alangli kaiketa diya longledetji, pima alangli kaiketa diya kelong un-epin apap klemtang-lo.”

³⁰Manene atum Jisu aphan, “Alangli kangthirthe ahi-i pholok-lo,” pu kepu apotsi Jisu labangso alam pulo.

³¹Ansi Jisu apei lapen akorte atum hadak nanglelo. Halatum hem angtan arjapphrongsi Jisu aphan pahangdamtoilo.

³²Armu atum Jisu aphan komsarsi ingniphrong-lo, lapen halatum alangliphan pulo. “Langtha, nangli pei, nangli korte atum lapen nangli ingjir atum ingtansi do, lapen halatum nangliphan rilo.”

³³Alangli halatum aphan thakdunsi pulo. “Nepei lapen nekorte atum komatma?”

³⁴Alangliphan komsarsi kangniphrong atum aphan alangli talavir langsi pulo. “Langtha, neli pei lapen neli korte atum ke latumhelo.

³⁵Ne-Po kepaklemtoi ateng keklem abang aling helo neli korte, neli ingjir lapen nelipeilo.”