Read Karbi MARK 5 Bible Online

MARK 5 - Karbi bible

MARK 5

¹Ansi Jisu lapen asangho atum Galili atalo parai lelo. Lake Geresa atum adet-lo.

²Jisu telong pen keche-o pen mamat kangthirthe ahi-i kepho abang thiri ajo pen vangsi alangli pen chetong-lo.

³Labangso abang thiri ajosi dolo, lapen anpar ke alangliphan baduta kok un-edet-lo, ingchin ani pen anta kok un-edet-lo.

⁴Pima alangliphan abatai batai ingchin ani pen ari lapen akeng kok-lo setta alangli ari along kekok angchin arri ke vung prop propdet titi, lapen akeng along kekok angchin arri ke turpong pongdet titilo. Baduta labangso abang aphan kekhangji ajakong avedet-lo.

⁵Labangso abang ajo anerlota thiri ajo lapen inglong ajosi dolo, lapen kaiketa hangkong-lo, lapen arlong pen amethang abang chesirilo.

⁶Labangso abang Jisu aphan achar pen thek-longsi alanglidung katvirlo, lapen Jisu aphan ardomkhrupsi,

⁷lapen hangcharbusi pulo, “Kangtuinei Arnam a-Sopo, Jisu! Nang nelong kopi akam doma? Arnam amen pen ne nangphan choningrilo, nang nephan pasungri.”

⁸Pima Jisu labangso abang aphan pulo. “Kangthirthe ahi-i, nang labangso amonit along pen nangbarnon!”

⁹Jisu alangliphan arjulo. “Nang men kopilo?” Labangso abang chethakdunsi pulo, “Nemen ke Legion puhelo; pima netum do-olo.”

¹⁰Alangli Jisu aphan jasemet choningrisi pulo. “Netum aphan labangso ahavar pen netoiri.”

¹¹Hadak inglong athak ake-ongpi aphak ahur chopanlo.

¹²Hi-i atum alangliphan choningrisi pulo. “Netum hala phak ahur along kelutdamjile netum aphan netoinon.”

¹³Lasi alangli halatum aphan hadak kedamji ahukum tholo. Kangthirthe ahi-i atum halabangso amonit pen nangbarsi phak ahur along lutdamlo. Halabangso aphak ahur ke jon suri hini anbak dolo. Labangso aphak ahur inglong kangcheng anat ingplongphitsi talo along klodamlo lapen latum hadak jangkoilo.

¹⁴Phak kevi atum katvirsi rongsopi lapen rit ajo labangso abirta than pachethang damlo. La keplangtang alam kopima pusi monit atum langdamlo.

¹⁵Halatum Jisu adung vangsi, hala hi-i, atheke Legion kepho abang kangnilun lapen pe chepindengsi aning binong pen kedo thek-long-lo; lapen halatum pherehurlo.

¹⁶La kethekdunlong atum rat atum aphan hala hi-i kepho abang alamjir lapen phak alamjirta than pajirmilo.

¹⁷Lasi halatum Jisu aphan halatum alongri kepa-oji aphan choningrilo.

¹⁸Hala hi-i kepho abang Jisu along kedunjisi, Jisu telong kechethap ahut Jisu aphan choningrilo.

¹⁹Bonta alangli kroikredet-lo. Alangli pulo. “Nangli methang ahem chedamra, Hemphu nangliphan kopi klemtang-loma, lapen alangli nangliphan ko-an ingjinso loma, lale nangli methang adon arap atum aphan thandam non.”

²⁰Lasi alangli damlo, lapen Jisu alangliphan keklemtang akam an alam Dekapolis alongri than pachethang-lo, lapen la karjulong atum an manghuphrong-lo.

²¹Jisu telong pen talo hapu parai chedamthulo, lapen armu ake-ongpi atum alangli long chingrumlo. Alangli talo akungsi dolo.

²²Ansi Jairos pu inut sinagog kechepahemphu abang hadak vang-lo, lapen alangli Jisu aphan thek-longsi alangliphan ardomkhrup-lo,

²³lapen jasemet choningrisi pulo. “Ne sopi bihek abang thiji dok dok-lo. La nesopi kerengjile vang-ra aphu athak nangli ri battha.”

²⁴Ansi Jisu alangli long dunlo, lapen armu ake-ongpi atum alangli phi phi dunsi alangliphan petkling-lo.

²⁵Hadak ningkan krehini pen avi kebuver arloso dolo.

²⁶Sekelang penang atum labangpi aphan se lang-olo, lapen labangpi kedo an atangkata chepi-et-lo setta alangli kemeji kali keso nangtanthu muchot-lo.

²⁷Labangpi Jisu alam arjulongsi alangli phi anat pen armu angbong vangsi ape ade ot-lo.

²⁸Pima alangli pulo, “Ne ape anle ot-long anta ne mepo.”

²⁹Lapen hala mamat alangli vi kebu hamdet-lo, lapen alangli keso metang-lo pu amethang chechinilo.

³⁰Hala mamat Jisu ajakong damtang-lo pu alangli chechinilo. Lasi alangli armu angbong chetevarsi pulo, “Ne pe komatsi nangke-ot-loma?”

³¹Jisu asangho atum alangliphan pulo, “Armu atum nangliphan nangpetkling-lo, lake nangta thek-long-lo. Tangte nangphan matsi ot-loma pu nang kopusi kepulangma?”

³²Bonta la matsi klemloma, la kechinijisi Jisu talavir langbomlo.

³³Bonta labangpi aphan kopi plang-tang-loma, la chechinisi labangpi pherelo, lapen a-ok klemhur pensi vang-lo, lapen alangli ingno domkhrupsi ahok alam an than-et-lo.

³⁴Jisu labangpi aphan pulo, “Nangli akekroi kedo apotsi nangli medet-lo, pei! Damra ningkangsam penle donon. Nangli keso pen me pametang-lo.”

³⁵Jisu la keningje un ahut Jairos ahem pen manene atum vangsi pulo, “Nangli sopi thitang-lo. Kopisi la kuru aphan pasiksak bomlangma?”

³⁶Bonta Jisu halatum keningje alam thangta arjujedetsi Jairos, atheke sinagog kechepahemphu abang aphan pulo, “Phereri, kroile kroinon.”

³⁷Ansi Jisu, Pitor, Jems lapen Jems akorte Jon aphan apar ke badu aphanta alangli long padun longledet-lo.

³⁸Halatum la sinagog kechepahemphu abang ahem nanglesi hadak kehorisei lapen ase kethe pen kechiru keteram Jisu thek-long-lo.

³⁹Alangli hem arlo lutdamsi halatum aphan pulo, “Nangtum kehorisei lapen kechiru athe kopima? Labangso a-osopi ke kethi kali, ameksi kejangchot!”

⁴⁰Halatum Jisu aphan ingnekchoilo. Bonta alangli hala kadokave atum aphan ingtan nangtoi-et-lo, lapen halabangso a-osopi apei, apo lapen amethang asangho atum aphan cheponsi oso kedo angdeng lutdamlo.

⁴¹Alangli halabangso a-osopi ari otsi pulo. “Talitha Kum!” Labangso alam atheke “Ne nangphan pulo, kaso, thurnon!” puhelo.

⁴²Hala mamat halabangso a-osopi thursi kengkam chejorlo. Pima alangli arta ningkan krehini an dolo. Lapen hala mamat halatum kematha abidi jutdet khangjang-lo.

⁴³Lapen badu aphanta labangso alam thanri pusi Jisu halatum aphan hukum pi pasodak-lo. Lapen halabangso a-osopi aphan kopine kecho ahormu pitha pusi alangli halatum aphan pulo.