Read Karbi MARK 7 Bible Online

MARK 7 - Karbi bible

MARK 7

¹Jerusalem pen kevang manene a-Pharisi lapen aron thekser atum Jisu along vangsi chingrumlo.

²Ansi Jisu asangho atum kangthirthe ari pen, atheke ari charsamsesi an kecho halatum thek-long-lo.

³Pima Pharisi lapen akaprek a-Jihudi atumta aphusar atum a-ove ove pen kevanbon aron kroilo: atheke, ari charsam pamemete choche,

⁴lapen hithi pen kevan amarta cham paphrang det matik ke choche, lapen la aparta halatum hako ahut pen kelong akaprek kaprek aronta kroilo, atheke harlung, langbong lapen bongkati hei hei champame nangji.

⁵Lasi Pharisi lapen aron thekser atum alangliphan arjulo, “Nangli sangho atum ke kopi apotsi ephusar atum kebitekang aron kroikresi keche-pangthirthe ari pen an cho loma?”

⁶Jisu halatum aphan thakdunsi pulo, “Isaiah nangtum alamjir kemontri alam ahok binong-lo. Atheke alangli ketok asonthotsi nangtum ke nangning ke-ik atumlo! Atheke alangli tok-lo, ‘Labangso amonit atum angtur pen nenong pathelo, bonta halatum aning ke ne pen heloving-lo.

⁷Halatum nephan kangduk thang ale avelo, pima halatum monit atum kepinchongchot aronsi Arnam aron asonthak thak thanlo!’

⁸“Nangtum Arnam ahukum osi monit atum a-ove ove pen kevanjir aron kroibomlo.”

⁹Alangli halatum aphan pulo, “Nangtum a-ove ove pen kevanjir aron kekroiji aphan nangtum resakjaksi Arnam ahukum kroikre pamelo.

¹⁰Pima Moses pulo, ‘Nangpi, nangpo aphan aman pinon; lapen apo, kalite apei aphan kangton abang aphan ke pathilot nangji.’

¹¹Bonta inut amonit jongsi apo kalite apei aphan kerapji aphan kopine amar dolo setta ‘Lake Kurbanlo,’ (Labangso alam atheke, Lake Arnam aphan kepanongtang adan, puhelo), pule pulote

¹²alangli ke api-apo atum aphan rap-redet-ta chok-lo pusi nanglitum thanlo.

¹³Lasonsi nangtum a-ove ove pen kevanjir aron bang atum aphan kethan pen ajok Arnam alam thangta kalidet paplang-lo. Lasonthak thak nangtum keklem akam akaprekta do-olo.”

¹⁴Ansi Jisu armu atum aphan amethang adung puthot hangsi halatum aphan pulo, “Nangtum kadokaveta nelam arjura, chinitha.

¹⁵Ingtan pen monit arlo damsi alangliphan kepangthirthedet un amar thangta ave. Bonta monit arlo pen ingtan nangkebar amar hei heisi monit aphan pangthirthelo.

¹⁶Ano kedo abang parjunang.”

¹⁷Jisu armu atum pen chekaksi hem arlo damdet aphi asangho atum labangso alamlir athe kopima pusi alangliphan arjulo.

¹⁸Alangli halatum aphan pulo, “Tangte nangtumta thangta chininelangma? Ingtan pen monit arlo kelutdam amar ke alangliphan pangthirthedet un-e, lake nangtum chininelangma?

¹⁹Pima ingtan pen kelut amar ke aning arlo kali, bonta apok arlosi dampo, lapen la abang pen nangbarthupo.”

²⁰Alangli puthulo, “Monit arlo pen nangkebar amarsi alangliphan pangthirthelo.

²¹Pima arlo pen, atheke monit aning arlo pensi kehingno akematha nangbarlo: lapen lasi beisa, chonghu, pran ke-en, bang apiso kalite apenan pen beisa kecheklem,

²²mek plengple, kehingno akam, kechobei, kechelang un-e, anong kejo, ane kechepathe, kelu hei hei plang-lo.

²³La kehingno ason an monit arlo pensi nangbar lapen la alangliphan pangthirthelo.”

²⁴Ansi Jisu thursi Tair arongsopi adung kedo alongri damlo. Alangli komane ahem lutdamlo, lapen baduta la kechininedetjisi alangli ning hang-lo, bonta alangli chepatujoi un-edet-lo.

²⁵Inut arloso alangli lamjir arjulong-lo. Labangpi asopi hi-i pholok-lo. Lasi alangli la karjulong pen mamat alangli kengri domkhrup-lo.

²⁶Bonta labangpi ke Grik adet kedo Sairophonik asorlo. Labangpi asopi along pen hi-i kepaphlungjisi alangli Jisu aphan choningrilo.

²⁷Ansi Jisu labangpi aphan pulo, “Aphrangke osomar atum aphan pangkrang longtha, pima osomar atum ahim ensi la methan atum aphan kevar ke mesen kali.”

²⁸Bonta labangpi thakdunsi pulo, “Lake ahok-lo, Hemphu; bonta hong-plang arum kedo amethan atum ke osomar atum along pen keklo a-an choresi chobomlo!”

²⁹Lasi Jisu labangpi aphan pulo, “Labangso alam pen apot-le chevoinon; nangsopi pen hi-i nangbartang-lo!”

³⁰Ansi labangpi ahem chedamlo, lapen thek-long-lo, asopi ke kepa-i adimsi ijoilo, lapen alangli long pen hi-i nangbar binong-lo.

³¹Ansi Jisu Tair arongsopi kethe tebok terei alongri pen nangbarlo, lapen Sidon alongri lapen Dekapolis alongri dongponputsi Galili atalo an vang-lo.

³²Penang amonit atum alangli long inut ano kangthong lapen alam kave amonit aphan vanlo, lapen labangso abang athak Jisu ari kepabatji aphansi halatum alangliphan choningrilo.

³³Jisu halabangso amonit aphan armu angbong pen inutpet ponsi ari chimun pen ano hilolo chut-lo, lapen ingthe ingthoksi ade ot-lo.

³⁴Jisu sining anat langdingsi ar-emlo, lapen halabangso amonit aphan pulo, “Ephphatha.” Labangso alam atheke, “Chingpunon,” puhelo.

³⁵Hala mamat labangso amonit ano arjulong-lo, lapen ade kerapta chephridet-lo, lapen alangli lam ningje pamethek-lo.

³⁶Ansi labangso alam badu aphanta thanri pusi Jisu monit atum aphan hukum pilo; bonta alangli thanri pu-ong halatum ansose than pachethang thu-ong-lo.

³⁷Labangso alam karjulong atum anta jasemet manghuphrongsi pulo, “Alangli kadokave klem pamelo; ano kangthong atum aphanta ano parjulong-lo, lapen alam kave atum aphanta alam paning-jethek-lo!”