Read Karbi LUK 1 Bible Online

LUK 1 - Karbi bible

LUK 1

¹Kecheng pen amethang methang kethekdunlong lapen lam pache-thangbang keplangtang atum nelitum aphan kethan asonthotsi,

²nelitum angbong keplangtang ason an ketokjisi penang atum bor-i tang-lo.

³Lahelo, Theophilas akehai, nangliphan kethan alam ke ahok alam, nangli la kechini pameji aphan

⁴nelita kecheng pen kadokave alam lang pamesi nangliphan athikpet aloh tok lote mesenpo pusi neli mathalo.

⁵Judia adet, Herod recho arni Abijah adeng inut akurusar dolo. Alangli menke Jekariah lapen apiso amen ke Elizabeth. Alangli ke Aaron akhei a-arlosolo.

⁶Halatum banghini Arnam angno dhoromi, atheke, Hemphu aron lapen ahukum an kroipetbomlo.

⁷Bonta halatum aso avedet-lo, pima Elizabeth aso manme lapen bang hinita sar ru-ralo.

⁸Bonta arnisi, alangli deng nanglesi, Arnam angno kurusar akam keklem ahut,

⁹kurusar atum ateng pen, alangli Hemphu Kardomhemthepi kangthir lut damsi hijung methek kekaiji apharman long-lo.

¹⁰Lapen hijung methek kekai ahut rat atum ke ingtansi Arnam ardombomlo.

¹¹Lapen hijung methek kekai adovan ar-e anat Hemphu apherangke arjapthersi alangliphan cheklang-lo.

¹²Lapen Jekariah alangliphan thek-longsi kethirik pen pherelo.

¹³Bonta pherangke alangliphan pulo, “Phere ri, Jekariah! Pima, nangli kechoningri alam arju tang-lo, lapen nangli piso Elizabeth asopo pirthe pahacheji lapen nangli amen Jon pusi irnangji,

¹⁴lapen nangli chehoksi ning arong pikji lapen penang atum alangli mahang kethek apot ning arongpikji.

¹⁵Pima alangli Arnam angno inut thedung abang cheplangji lapen alangli drakha ahorlang lapen arak junjedetji lapen amahang kethek pen mamat alangli Karjong Kangthir pen plengsetji

¹⁶lapen alangli Israel atum aphan halatum a-Hemphu, Arnam anat penang atum aning pachiruiji.

¹⁷Lapen apo atum aphan asomar anat aning kepachiruira, kekroi thekthe atum aphan dhoromi atum abidi kepa-enra Hemphu aphan kesikpitang arat kepathikjisi alangli, Elijah ason ajakong kethe pen Hemphu aphrang dampatenoji.”

¹⁸Lapen Jekariah pherangke aphan pulo, “Neli kopusonsi la chini poma? Pima neli ke sar-rulo lapen neli pisota arta dopik-lo.”

¹⁹Lapen pherangke alangliphan thaksi pulo, “Arnam angno karjapther a-Gabriel neli helo. Lapen nangliphan labangso abirta keme kepathanjisi neliphan netoitang-lo.

²⁰Lapen mathanon, labangso alam chekok ketik ke nangli dojoiji lapen thangta ningje thekthedetji, pima athikpet ahut kechekokji alam, la neli kethan alam hei hei nangli kroikredet-lo.”

²¹Lapen rat atum Jekariah aphan inghongbomlo, lapen alangli Kardom ahem thepi arlo kepader apot halatum manghuphrong-lo.

²²Lapen alangli nangkebar ahut halatum aphan thangta pu thekthedet-lo, lapen Kardom ahem thepi arlo alangli ning arjan thek-long-lo pusi halatum chini pamelo. Lapen alangli angthek paklangbomsi lapen alam avedetsi dobomlo.

²³Lapen alangli kardom ahem arlo kangduk akam patangdetsi hem chevoilo.

²⁴Lapen labangso aphi apiso Elizabeth aso pathelo, lapen chiklo jonpho chepatulo.

²⁵Alangli pulo, “Hemphu lapusonsi neliphan klemlo, atheke, monit atum angbong neli ketherakduk alam Alangli kepakakjisi non ahut nemathatang-lo.”

²⁶Lapen Elijabeth chiklo jonthrok oso aphili ahut Galili adet Nazareth arongsopi, David akhei,

²⁷Joseph pu abang pen keraitang a-okarjang along Arnam Gabriel pu apherangke aphan nangtoilo. A-okarjang amen ke Meri.

²⁸Pherangke lut damsi alangliphan pulo, “Kardom, kangjinso kelongtang arloso! Hemphu nangli long do.”

²⁹Bonta alangli labangso alam pen apot thirik o-lo lapen aning arlo manghusi la kardom kepi athe kopiloma pusi chemathalo.

³⁰Lapen pherangke alangliphan pulo, “Phereri Meri! Pima Arnam nangliphan ingjinsolo

³¹lapen nangli so pathepo lapen sopo inut pirthe pahacheji, lapen nangli amen Jisu pusi irnangji.

³²Alangli arleng kethe cheplangji lapen alangliphan Kangtuinei a-Bang a-Sopo pusi pudetji lapen Hemphu Arnam alangliphan aphusar David recho anghoi piji.

³³lapen alangli kai apar kai anta Jakob ahem recho choji lapen alangli rat jutjepinji.”

³⁴Bonta Meri pherangke aphan pulo, “La kopusonsi plangjima? Pima neli ke neli penan avelang.”

³⁵Pherangke thaksi alangliphan pulo, “Karjong Kangthir nangli phuthak vangji lapen Arnam ajakong nangli phuthak sakokpo. La apotsi la kangthir a-oso aphan Arnam a-Sopo pusi pudetji.

³⁶Nangli don Elizabeth aphan chemathadamtha. Bangpi aso avelo pusi bang atum puhurlo, bonta bangpi sarru lo seta non oso chopathe aphili chiklo jonthrok an dotang-lo.

³⁷Pima Arnam keklem un-e ason ave.”

³⁸Meri pulo, “Chini iktha, neli ke Hemphu abanpilo, nangli lam asonle neliphan paplang nang.” Lapen pherangke alangli pen chekak-lo.

³⁹Lapen halabangso ahut Meri thursi Judia adet, inglong athak arongsopi along damseraksi

⁴⁰lapen Jekariah ahem lutdam seraksi Elizabeth aphan kardom pilo.

⁴¹Meri kepi akardom Elizabeth karjulong pen mamat apok arlo kedo a-oso kanlo lapen Elizabeth Karjong Kangthir pen plengsetsi

⁴²hangcharbusi pulo, “Arlosomar atum angbong nangli helo ahirjume atheng-lo. Lapen nangli pok arlo a-osota ahirjume atheng-lo!

⁴³Mai! Hemphu apei neli long vang-lo, labangso aman kopi athesi neliphan piloma?

⁴⁴Pima chini iktha, nangli kardom kepi ase neli no kelut pen mamat osoke neli pok arlo aning arongpiksi kanlo.

⁴⁵Lapen kekroitang abangpi rengme-pima Hemphu alangliphan keputang alam chekokji!”

⁴⁶Lapen Meri pulo, “Neli Hemphu anong pathelo,

⁴⁷Lapen neli karjongta ne-Kepajok a-Bang, Arnam pen apot chehok-olo.

⁴⁸Pima Alangli neliphan, atheke thangta kalidet abanpi aphan nemathalo, pima mathanon, non pen apara kadokave atum neliphan, kerengme abang pusi puji,

⁴⁹pima a-Jakong Kethe Arnam neliphan kam kethe klemtang-lo. Lapen Alangli menke Kangthir.

⁵⁰Alangliphan kephere atum aphuthak a-ove oveta Alangli akangjinso dover.

⁵¹Ari pen Alangli kam kethe klem tang-lo, lapen ane kechepathe atum aphan halatum akemang-heihei pen papratseitang-lo.

⁵²Jakongkethe arecho atum aphan Alangli halatum anghoi pen paklotang-lo, lapen thangta kalidet atum aphan rung pangtuilo.

⁵³Alangli mesen amar pen kangchir atum aphan pangkrang tang-lo, lapen keplang-o atum aphan ari angsesi padamjuilo.

⁵⁴Alangli ephusar atum aphan kechak alam paplengtang-lo, Alangli aban Israel aphan raptang-lo,

⁵⁵Alangli Abraham aphan lapen la aso asu atum an kaike aphan kangjinso kepaklangjisi mathalo.”

⁵⁶Elijabeth along Meri chiklo jonthom anbak dosi amethang ahem chevoilo.

⁵⁷Lapen Elizabeth aso pirthe kepahacheji apor choksi alangli sopo inut pirthe pahachelo.

⁵⁸Lapen alangli tebok terei lapen donrap atum alang-liphan Hemphu kepaklang akangjinso kethe alam arjulongsi alangli long aning arong chepidunlo.

⁵⁹Lapen arta ni nerkep arni oso aphan reng-rot kepijisi halatum vangsi apo amen ason thak-thaksi alangli men Jekariah pu ke-irji mathalo.

⁶⁰Bonta apei thaksi pulo, “Lapu kali, alang menke Jon pusi ir nangji.”

⁶¹Lapen halatum alangliphan pulo, “Nangli kechepho atum angbong lason amen kedo abang avedet ke!”

⁶²Lapen alangli men ke-irjisi apo aning kehang kopi, la kechinijisi halatum alangliphan angthek pen arjulo.

⁶³Lapen lo hangsi alangli la athak tok-lo, “Alangli menke Jon.” Lapen kadokave atum manghuphrong-lo.

⁶⁴Bonta halabangso ahut mamat alangli ingho ingpudet-lo lapen ade athit phridet-lo lapen alangli ningjesi Arnam aphan rolo.

⁶⁵Lapen hala tebok terei atum an pherelo. Lapen Judia anglong adet adang an rat atum labangso alam an chethan o-lo,

⁶⁶lapen karjulong atum an la aning arlo chebisi chepuhurlo, “Labangso a-oso pisi plangjima?” Pima Hemphu ajakong alangli phuthak dotang-lo pu la chinilorlo.

⁶⁷Lapen Jon apo Jekariah Karjong Kangthir pen plengsetsi Arnam alam montrisi pulo:

⁶⁸“Israel a-Arnam, atheke, Hemphu-ke ahirjume kelong atheng pacheplang nang! Pima alangli vangsi arat atum aphan pajoktang-lo.

⁶⁹Lapen alangli amethang aban, David akhei angbong pen etum aphan ajok inut a-Jakongthepik, Kepajok a-Bang paplangtang-lo.

⁷⁰Lake hako ahut alangli amethang amontri kangthir atum pen ajok keputang asonthot-lo, atheke,

⁷¹Ephusar atum aphan kangjinso kepaklangjisi alangli ehotur lapen ekehijim atum arideng pen ilitum aphan epajokji.

⁷²Lapen Alangli amethang Kechechak alam chemathathulo.

⁷³Atheke, Ephusar Abraham aphan seme ketang do.

⁷⁴Atheke, ehotur atum arideng pen epajoksi,

⁷⁵Etum phere-redetsi, kangthir-et lapen dhoromi pen rengtik an alangli ingno dosi Alangliphan ingduk-longji.

⁷⁶Lapen Nang ke nesopo, monit atum nangphanta Kangtuinei a-Bang amontri pusi puji. Pima a-Tovar kesikpijisi nang Hemphu aphrang damji;

⁷⁷Atheke lahelo, halatum apap hei hei kediya pen ajok halatum kejok longji pu alam nangrat atum aphan pachiniji.

⁷⁸Pima e-Arnam ke chingkimesen lapen kangjinsothek a-Bang-lo, alangli pen ajok ephan angsong pen arni turji.

⁷⁹Lake kangting lapen kethi abin kangni atum aphuthak sining angsong pen atur turji, lapen ning kangsam atovar anat ephan ejadunji.”

⁸⁰Halabangso a-oso thelo, lapen karjong anatta ingtangrak-lo, lapen Israel angno cheklangkletik ke alangli kejejangtang ajosi dolo.