Read Karbi LUK 10 Bible Online

LUK 10 - Karbi bible

LUK 10

¹Labangso aphi Hemphu akaprek amonit bang throksi kep atum aphan ingvailo, lapen alangli kedamji arongsopi tin lapen adim an aphrang halatum aphan bang hini-hini pajalangsi toilo.

²Alangli halatum aphan pulo, “Sok kemen do-olo bonta kepangrumji atum ong-e. Tangte, alangli sok kepangrum akam keklem atum aphan nangketoijile ahemphu aphan cho-ardom hurtha.

³Da! Damnon da! Mahar atum angbongle biresak aso atum kedam asonsi ne nangtum aphan nangtoilo.

⁴Tangka athia, kalite kechorek ajamborong, kalite keng-op ponri; tovar kedambom ahut badu aphanta sangkokra kardom chepiri.

⁵Nangtum kelut damji ahem aling aphrangke, ‘Bangso ahem ning kangsam padonang’! pule punon.

⁶Hadak jongsi ning kangsam aning kedok abang dolote nangtum aning kangsam alangli phuthak doji; ave tangte ningkangsam nangtum along chiruiji.

⁷Lapen edonpet-le dora halatum nangkepi alingle chorap rap, jun rap rapnon. Pima kam keklem abang anam kelong nangji a-ot do. Edon pen adon kaprek damri.

⁸Lapen nangtum kelut damji arong alingle, halatum nangtum aphan chak lote, nangtum aphan kepi alingle chonon.

⁹Hadak keso atum aphan pamenon, lapen halatum aphan, ‘Arnam Arat nangtum adung an vangtang-lo,’ pule punon.

¹⁰Nangtum kelut damji arongsopi aling, halatum jongsi nangtum aphan chakche tangte,

¹¹ha tovar damra punon, ‘Nangtum arongsopi alongle aduk netum akeng kebon akengtak anta nangtum abe pathurjisi netum chehotekang-lo. Bonta chematha non, Arnam Arat nangtum adung vangtang-lo!’

¹²Ne chenamsi nangtum aphan nangpulang, halabangso a-Kangsai Arni labangso arongsopi aphan apar Sodom aphan Arnam akangjinso paklang muchotji!

¹³“Chorazin, nang ko-an kephere meme akesung phonangpo! Bethsaida, nang ko-an kephere meme akesung pho nangpo! Pima nangtum angbong keklemtang akemathadam un-edet akam kethe hei hei jongsi Tair lapen Sidon angbong plang asonte, halatum hako ahut penta aning chiruisi pe-thoila che-umsi thek-lo ajo ingniji apot-lo!

¹⁴Mo Kangsai Arni ahut Arnam nangtum aphan apar Tair lapen Sidon aphan akangjinso paklang muchotji.

¹⁵Lapen nang, Kapernaum; nangke sining athak anta kerungkokji aphan nang ning hanglangma? Nangphan kethitang atum adim an nang pahirtukji!”

¹⁶Jisu alangli sangho atum aphan pulo, “Nangtum alam karju abang ke nephansi arjulo; nangtum aphan kechakche abang ke nephansi kechakchelo; lapen nephan kechakche abang aling ke nephan neketoi abang aphanta chakchelo.”

¹⁷Bang throksi kep atum aning arong pen nang chevoisi pulo, “Hemphu, nang men pen hi-i atumta netum alam kroilo!”

¹⁸Jisu halatum aphan thak-lo, “Cheter keklo ason Soitan sining pen nang keklo ne thek long-lo.

¹⁹Arjutha! Pherui lapen chehe langbong apivo athak kedongji lapen hotur an aphan kehaiji ajakong ne nangtum aphan nangpitang-lo, lapen thangta nangtum aphan phangno un-e.

²⁰Bonta hi-i atum nangtum alam kekroi apot-le chehok-ri, bonta sining athak nangtum amen toktang-lo apot-le chehoknon.”

²¹Halabangso ahut Jisu Karjong Kangthir pen plengsetsi chehok-olo, lapen pulo, “Ne nangphan chorolo, Po, Sining lapen pirthe ahemphu! Pima nang lahei hei ke giani lapen thekser atum angno pen patutang-lo, lapen kethek kere kave atum aphan paklangtang-lo. Chenamlo Po, lake nang ning kehang akamlo.

²²“Ne Po nephan kadokave amar nepitang-lo. Baduta, Po apar ke Sopo komatma, lake chinine, lapen Po komatma, lake Sopo lapen Alangli kepaklangji aning kehang atum apar ke baduta chinine.”

²³Lapen sangho atum anat chepangnosi bang kaprek atum kave ahut Jisu pulo, “Nangtum kethek dunlong ason kethek dunlong amek hei hei rengme!

²⁴Pima ne nangtum aphan nangpulang, penang amontri lapen recho atum nangtum kethek long ason kethek longji aning hang-lo, bonta halatum thek longledet-lo, lapen nangtum karjulong alam karjuji aning hang-lo, bonta arju longledet-lo.”

²⁵Inut aron thekser abang Jisu aphan asat kelangjisi vang-lo. Alangli thursi pulo, “Thanbang! Kejut un-e achethe kelongji aphan ne kopi klem nangjima?”

²⁶Ansi Jisu alangliphan pulo, “Aron kopusonsi tok tang-lo? Nangli kopusonsi porhe long loma?”

²⁷Halabangso amonit thaksi pulo, “‘Nang ning ajakong an penle, nang pran ajakong an penle, nang jakong do-an penle lapen nang kematha ajakong an penle Hemphu, nang Arnam aphan chinghon non; lapen nang methang aphan kechinghon asonthotsi tebok abang aphanta chinghon nangji.’ ”

²⁸Jisu alangliphan pulo, “Nang athikpetsi pulo, lasonle klemnon, lapen nang rengpo.”

²⁹Bonta aron thekser abang dhoromi pu kecheklangjisi Jisu aphan arjulo, “Tangte ne aketebok abang komat-lo.?”

³⁰Jisu thak-lo, “Inut amonit Jeru-salem pen Jeriko nanghirlo, lapen alangli dokait atum pen chetong-lo. Latum alangli pe lumsi alangliphan chokpiksi damrup-lo.

³¹Ansi kopai keme asonsi mane akurusar halabangso atovar mamat vang-lo, lapen alangliphan thek longsi tovar suiphaksi damjuilo.

³²Lason thak-thaksi Levi inutta hadak vang-lo; bonta tovar suiphaksi damjuilo.

³³Bonta inut tovar kedam, Samaria amonit alangli dung vang-lo, lapen thek longsi aning arlo alangliphan kangjinso pen plengset-lo.

³⁴Alangli dung an vangsi areng amek along jangthu lapen drakha ahorlang dungsi perhet-lo. Anke amethang kardon api athak pardon ponsi alohi ahem along ponlo, lapen hadak alangliphan lanalo.

³⁵Puthot arni alangli sika isi thiya pen ensi alohi ahem ahemphu aphan pitekangsi pulo, ‘Alangliphan lananon, lapen la apar akhorot an mo neli kechevoiji ahut nanglipi tekangpo.’”

³⁶Lapen Jisu pulo, “La bang kethom angbong pen kolo abangsi dokait arideng kepho abang aphan tebok abang cheplang loma? Nang pisi mathalo?”

³⁷Aron thekser abang thak-lo, “Alangliphan kangjinso abang helo.” Jisu alangliphan thakthulo, “Ante, damra lapusonle klemnon.”

³⁸Jisu lapen asangho atum tovar kedambom ahut alangli elong arong lut damlo. Hadak Martha pu inut arloso dolo. Alangli amethang ahem Jisu aphan chak-lo.

³⁹Alangli korte Meri pu do lapen Meri Hemphu akeng-ri ingnilunsi alangli lam kethan arjudunlo.

⁴⁰Bonta Martha keru kethai akam ong-osi aning chepasiksak-lo lapen vangsi Jisu aphan pulo, “Ne korte ke neliphan inutpetsi keru kethai akam nang-o tekang-lo, nangli lahei mathathema? Kam nangkepacherap dunji aphan Meri aphan putha!”

⁴¹Hemphu alangliphan thak-lo, “Martha, Martha! Nang penang alam pen apot matha chepasiksak-lo, lapen arki dohang-lo,

⁴²bonta akenang ke esonnat. Meri akangvai ke kechok pamelo, lapen lake alangli rideng pen ponpedetji.”