Read Karbi LUK 11 Bible Online

LUK 11 - Karbi bible

LUK 11

¹Arni isi Jisu elong adim Arnam kardom dam ahut, alangli kardom pajut det aphi sangho angbong inut abang alangliphan pulo, “Hemphu, Jonle asangho atum aphan kardom kechethan ason thakthak netum aphanta kardom nethantha.”

²Jisu halatum aphan pulo, “Nangtum kardom ahut lasonle punon: ‘O Po, nangmen pangthir nang; Nang rat pavangnang.

³Netum arnivang kenangji a-an, netum aphan nepitha.

⁴Netum apap hei hei nediyatha, pima netumta netum aphan kehingno keklem atum aphan diyalo. Lapen sat kelangjile netum aphan neponri non.’”

⁵Lapen Jisu amethang asangho atum aphan pulo, “Bisar alam, nangtum angbong inut abang ajirpo dolo, lapen jirlo apor alangli ajirpo along damsi pulo, ‘Oh ko! nephan him plangthom ne paramtha.

⁶Pima nejirpo nelong vang-lo, lapen alangliphan keru kethaiji aphan nelong thangnatta ave!’

⁷Lapen bisar alam, halabangso abang hem arlo pen thaksi pulo, ‘Nephan nepasungri! Nonke inghap ingkir tang-lo lapen nesomar nelong amek jangtang-lo. Ne thursi nangphan thangta nangpi thekthe.’

⁸Ne nangtum aphan nangpulang, ajirpo aphan langledetsi thurthedetji apot-lo setta alangli hang varet apotsi alangli thursi kenangji an ason pidunji.

⁹“Lasi ne nangtum aphan nangpu-lang, hang bom non lapen nangtum aphan nangpidetji; ri bom non lapen nangtum longji; pacheng bom non lapen nangtum aphan nang ingpudetji.

¹⁰Pima kehang abangphutin longrep, lapen keri abang aling long, lapen kepacheng abang aphan inghap ingpudetji.

¹¹Nangtum angbong mane abang po plangsi asopo lang a-ok hang-lote pherui pirongji,

¹²kalite voti hang-lote chehe langbong apivo pithu-rongji, lason abang dojima?

¹³Lahelo nangtum hingno setta nangtum asomar aphan akeme amar kepiji chinilo, tangte, la apar sining athak kedo a-Po ke Alangli long kehang atum aphan Karjong Kangthir piji!”

¹⁴Jisu alam kave abang along pen hi-i phlung-lo; lapen hi-i bardet aphi alam kave abang ningjelo. Armu atum manghuphrong-lo,

¹⁵bonta manene atum pulo, “Lake hi-i atum ahemphu, Beelzebul pen ajoksi hi-i kephlungji ajakong long-lo.”

¹⁶Akaprek atum ke asat langsi sining pen angthek hang bomlo.

¹⁷Bonta Jisu halatum aning kematha alam chinisi halatum aphan pulo, “Badu adet tame, amethang kechethak-et arat ke kedo ajir dingde; lapen kechethakdak ahem ke kedo chepaprekjampo.

¹⁸Lasi Soitanta amethang jongsi chethakdak lote arat kopusonsi dothekjima? Nangtum nephan pulo, neke Beelzebul ajakong pensi hi-i atum aphan phlung-lo.

¹⁹Ne jongsi Beelzebul pen ajoksi hi-i atum aphan phlung-lo tangte, nangtum aphi phi kedun atum ke komat ajakong pensi halatum aphan phlung-loma? Nangtum aphi phi kedun atumsi nangtum akechokche aporman paklangdak-lo!

²⁰Bonta neke Arnam ajakong pensi hi-i atum aphan phlungbom, lapen lake Arnam Arat nangtum angbong vangtang-lo pu angthek-lo.

²¹“Kangtangrak abang chir, nok pen ahem kechehon ahut ke amar thangta virve.

²²Bonta alangli par ingtang muchot abang vang-ra alangliphan haidet lote alangli aning kechethe anokjir ponpo lapen kethi pon amar an thak-etpo.

²³“Ne be kalidet abang ke ne bethurlo; nelong nang kepangrum dunde abang ke hijikverlo.

²⁴“Kangthirthe ahi-i monit pen nangkebar aling, la lang kavedet adim kesangji adim ribom. Jongsi long athai avete la pupo, ‘Chu ne nangkebartang ahem along ne chelut damthupo.’

²⁵Lapen hi-i chevangsi ahem arkok-et lapen sai-et thek-longpo.

²⁶Ansi hi-i chedamsi amethang apar kehingno muchot bang throksi ahi-i chevansi lutdampo lapen hadaksi dopo. Lapen kejutsi halabangso abang aphrang apar hingnomuchotpo.”

²⁷Jisu la kepubom ahut armu angbong pen inut arloso ase pathesi alangliphan pulo, “Nangliphan pirthe kepahache, lapen mok nangkepachu abang ko-an rengme!”

²⁸Bonta Jisu thak-lo, “La putame, tebonta Arnam alam karju lapen kekroi atumsi rengme!”

²⁹Armu atum kechingprompik ahut Jisu lam ningjebomsi pulo, “Labangso a-ove atum ko-an adur kave! Latum angthek ribom, bonta Jonah angthek apar ke isinat angthekta pipedetji.

³⁰Nineveh asor aphanle Jonah angthek kecheplang asonthot, lason thak-thaksi labangso a-ove aphan ke Monit a-Sopo helo angthek kecheplangji.

³¹Mo Kangsai Arni Sheba arechopi labangso a-ove amonit atum aphan adai nepji, pima alangli Solomon agian pen kethan alam karjujisi ha amethang adet pen vang-lo; lapen chini iktha, Solomon apar kopine kethe muchot ladak do.

³²Mo Kangsai Arni Nineveh asor thursi labangso a-ove amonit atum aphan adai nepji, pima halatum Jonah kepachethang pen ajok aning chiruilo; lapen chini iktha, Jonah apar kopine kethe muchot ladak do!

³³“Baduta melur keira patute, mate phule arlo bibe; bonta hem nangkelut atum akekhelan kethek longji aphan melur ke archok athaksi batpo.

³⁴Nangbang arpum amelur ke nang mek helo. Nang mek mesen ahut nang bang arpumta the-angdangpo; bonta nangmek jongsi hingno lote nangbangta ingtingkukpo.

³⁵Tangte chelang pametha, nang ning arlo akethe-ang ingtingkuk mene.

³⁶Nang bang arpum jongsi the-ang dang tangte, lapen thang akangting ave lepute, melur atur pen nangphan kepathe-ang dang ason thakthak, lake the-ang dang saidepo.”

³⁷Jisu lam keningje jutdetsi, inut a-Pharisi alangli long an kecho rap-rapji aphan phalo; lasi alangli ahem lut dunsi an kechoji aphan ingnilo.

³⁸Pharisi abang langdingsi manghuhak-lo, pima Jisu an choche ako ari chersamsedet-lo.

³⁹Lasi Hemphu alangliphan pulo, “Toh nonke, nanglitum Pharisi atum ke harlung lapen kasuta angtan anatsi ingthichot, bonta nangtum arlo ke kar-i lapen kehingno pen plengset-lo.

⁴⁰Kelu atum! Angtan anat kethip abang, Arnam arlo ke thipthedetma?

⁴¹Bonta nangtum aharlung lapen akasu arlo kedo amar an keduk atum aphan pinon, lapen kadokave asonta nangtum aphan ingthirpo.

⁴²“Pharisi atum! Nangtum ko-an akepherememe phonangpo! Pima nangtum Podina, arud lapen han aphan ke-en abap an phan kep pen ephan Arnam aphan pilo, bonta nanglitum ahok akangsai lapen Arnam aphan akanghon matha pamemedet-lo. Ason kaprek hei heita varvera lahei heita klempon masi.

⁴³Pharisi atum! Nangtum ko-an akepherememe phonangpo! Pima Sinagog along anghoi kethe lapen hithi borwa angbong aman pen akardom kepi kelongji aphan nanglitum aning dokpik-lo.

⁴⁴Nangtum ko-an akepherememe pho nangpo! Pima nanglitum ke angthek kebibe atipit ason thakthak-lo. Monit atum chininedetsi la athak dongponsi damlo.”

⁴⁵Halatum angbong pen inut aron thekser abang Jisu aphan pulo, “Thanbang! Lahei hei alam kepuke nelitum aphan kepatherak-lo.”

⁴⁶Alangli thak-lo, “Aron thekser atum! Nangtum ko-an akepherememe pho nangpo! Pima nanglitum kepon kesungkrung anghor nangtum monit aphan panghorlo, bonta nanglitum methang ke ri chimun ehong pen anta labangso anghor rap dundelo.

⁴⁷Nanglitum ko-an akepherememe pho nangpo! Pima nanglitum montri atum atipit hei hei selamlo, latum aphan nanglitum aphusar atumsi pathilo.

⁴⁸Tangte nanglitum chekrong non, atheke nanglitum aphusar atum keklem akam nanglitumta nang ning dok-lo; halatum Arnam amontri atum aphan pathilo, lapen nanglitum ke halatum atipit selampilo.

⁴⁹Lasi Arnam agian pulo, ‘Ne halatum angbong Montri lapen Pherangke nangtoiji. Halatum manene atum aphan pathiji, lapen manene atum aphan chenekji.’

⁵⁰Lasi pirthe kepinchong ahut pen Arnam amontri atum aphan avi kepabutang an pen apot, atheke

⁵¹Abel avi kepabu a-arni pen hala dovan lapen Kardomhemthepi kangthir angdeng angbong Jekariah aphan avi kepabu a-arni an kepabutang avi an pen apot labangso a-ove aphan aduk piji. Ne athikpetsi nanglitum aphan nangpulang, la kadokave pen apot labangso a-ove atum aduk pho nang-po.

⁵²“Aron thekser atum! Nanglitum ko-an akepherememe akesung pho nangpo! Nanglitum kechini-i aphlok chebikok-lo. Nanglitum methangta lut damde, lapen kelutdamji aning kehang atum aphanta palutdam longlelo!”

⁵³Jisu hadak pen nangbardet aphi aron thekser atum lapen Pharisi atum jasemet aning thi-lo.

⁵⁴Alangliphan kopine akechokche alam pen adai kenepjisi halatum alangliphan ajat jat alam karjuji pangcheng-lo.