Read Karbi LUK 12 Bible Online

LUK 12 - Karbi bible

LUK 12

¹Suri suri armu kechingprom pen apot monit atum chedong charkanlo. Ansi aphrangsi asangho atum aphan Jisu pulo, “Pharisi atum athap, atheke aning ke-ik aphan cherehurnon!

²Kedipjoi amar anta klang-etji, lapen kepatujoi amarta chinipetji.

³Lasi kangtingkuk angbong nanglitum kepatu alamta anerlo akethe-ang angbong than-pachethangdetji, lapen kut arlo nangtum kepalamsojoi alam anta hem asarnung angsong pen pachethangdetji.

⁴“Ne jirpo atum, ne nangtum aphan nangpulang, bang arpum kepathithek, bonta la apar ke thangta keklem thekthe abang aphan ke thangta phereri.

⁵Komat aphansi phere nangjima, labangso alam ne nangtum aphan nangpaklangpo. Abang arpum pathilot aphi Chom arlo kevarchuiji ajakong kedo abang aphanle pherenon. Ne chenamsi nangtum aphan nangpulang, nanglitum labangso abang aphanle pherenon.

⁶“Sok puru avo jonpho ador poisa hini nat, kalima? Bonsetta sok puru avo ejonnat aphanta Arnam tengnenedet-lo.

⁷Nangtum achu ajeng anta lakhapet-lo. Lasi nangtum phereri; sok puru avo atum apar nangtum ador somu!

⁸“Nangtum aphan nangpulang, monit angno nephan Hemphu pu kechekrong abang phutin aphan Arnam apherangke atum angno Monit a-Sopota ne pusi chekrongji.

⁹Bonta monit angno nephan Hemphu pu kedengde abang aphan ke Arnam apherangke atum angno Monit a-Sopota ne pu chekrongkre-detji.

¹⁰“Badu tame Monit a-Sopo abethursi keningje abang ke diya longji; bonta Karjong Kangthir aphan kepinrem abang aling ke diya longledetji.

¹¹“Halatum mei lapen det ahemphu lapen det keja atum angno nangtum aphan keponji ahut, kopusonsi mate kopi alam pen chethak dun nangjima, mate kopisi kepujima, lake nangtum ning biri.

¹²Pima halabangso ahut mamat nangtum kopisi ningje nangjima, lake Karjong Kangthir nangtum aphan nangthanji.”

¹³Armu angbong pen inut amonit Jisu aphan pulo, “Thanbang, netum kepamo tekang akhi ne pen kepachethakjile ne ik aphan putha.”

¹⁴Jisu alangliphan thak-lo, “O jirpo, nangtum aphuthak kangsai, mate nangtum apo kepamo tekang akhi nangtum angbong kethakji ajakong matsi nephan piloma?”

¹⁵Lapen alangli halatum kadokave aphan pulo, “Langra mek plengple ason an pen chere non. Pima alangli jonghele plang setta monit achethe ke amar atar penle keplang kalidet.”

¹⁶Anke alangli halatum aphan labangso alamlir pen pulo, “Inut akiripo do; alongle asok me-o.

¹⁷Alangli aning arlo chemathasi pulo, ‘Nesok kebiji adim avedet-lo, ne pisi klem poma?

¹⁸Ne lasonsi klempo,’ alangli pulo; ‘Ne nesok puru phri dakpo lapen themuchot kimpo, lapen nesok lapen nemar an hadaksi chebipo.

¹⁹Anke ne methang aphan pupo, kopai keme amonit! Penang aningkan aphan nang kebi amar dolo. Sangra chotha, juntha lapen ning arong chepitha!’

²⁰Bonta Arnam Alangliphan pulo, ‘Nang kelu abang! Paningve mamat nanglong pen nangpran pondetpo; lapen la nang kesiktang amar ke mat aridengsi lepoma?’ ”

²¹Jisu kejutsi pulo, “Amethang aphan akhi kecherim, bonta Arnam anat keplang-o kalidet abang ke lapuson helo.”

²²Anke Jisu amethang asangho atum aphan pulo, “La apotsi ne nangtum aphan nangpulang, nangtum achethe aphan, kalite nangtum abang aphan pisi chojima, mate kopisi che-umjima, la aphan ning biri.

²³Pima an apar echethe themu, lapen pe, ri apar ebang themu.

²⁴Vo-ak atum aphan langtha, latum rikta rik-re, rotta rot-re; latum sok puruta ave, mar kechebiji ahemta ave; tebonta Arnam latum aphan pacho longbom!

²⁵Vo apar nangtum ador somulo; lapen matsi keningbi pen amethang achethe cherso pading muchot unjima?

²⁶Jongsi nangtum la kebinei akam anta klem un-e tangte, kopi athesi la akaprek hei hei aphan ningbiloma?

²⁷Mir tado aphan langtha: latum honta jengje, pe ta thakthe, bonta ne nangtum aphan nangpulang. Solomon kadokave ape, ari chingthang-ra adak atur pen setta la nampi amir ason thakthak alon kedo ave.

²⁸Tangte Arnam jongsi la pini do, penap ave, lapen melikbui along kephrindut ji ahidi abap aphan lapu-an alon padolo tangte, la apar nangtum aphan ko-an alon padojima? Nangtum akekroi ko-an akekom!

²⁹“La apotsi kopisi choji, kopisi junji, lale ning biri.

³⁰Pima pirthe athak Arnam aphan kekroikre atum ke lahei hei aphan mathaver. Lahei hei nangtum nangji puke nangtum a-Po chinilo.

³¹Bonta alangli rat aphanle mathanon, lapen lahei hei nangtum aphan nangpidetji.

³²“Phereri, O bihek asong, pima nangtum aphan Rat kepijisi nangtum a-Po aning dok-olo.

³³Nangtum amar atar jorra keduk kelak atum aphan pinon. Kaiketa kerak-redet athia lapen ke-ik un-e akhi sining athak chebirti non. Hadak ke kanghuta vangve, lapen angkita cho un-e.

³⁴Pima nangtum akhi kedo adimsi nangtum aningta do-eji.

³⁵“Nangtum avam chingtinra kekeitang amelur pen chesik et-le donon.

³⁶Piso kepangri amei pen nangkechevoi ahemphu nanglesi inghap kepacheng pen mamat alangliphan kangpuji aphan kanghong phrong aban atum asonle nangtum donon.

³⁷Ahemphu hem nangkechevoi ahut aban atum ano kechepang-ar pen kedo thek-long lote, halabangso aban atum ko-an akerengme! Ne chenamsi nangtum aphan nangpulang, alangli avam chingtinsi halatum aphan an kepachoji aphan pangniji, lapen adung vangsi halatum aphan ru-thaiji.

³⁸Lapen alangli ancho mekbur ahut, kalite voku ethe ahut-le vang setta halatum aphan lasonle thek-long lote, halabangso atum ko-an akerengme!

³⁹Kanghu komantu vangjima, lale hem ahemphu abang chini asonte alangli hondingsi hem nangpatuk longledetji apot-lo, lake nangtum chinilo.

⁴⁰Nangtumta chesikdingle donon. Pima alangli vangvejibon pu nangtum kematha ahutsi Monit a-Sopo vangji.”

⁴¹Pitor pulo, “Hemphu, labangso alamlir ke netum aphanchotma, mate kadokave atum aphanta loma?”

⁴²Hemphu thakdunsi pulo, “Tangte athikpet lapen athikpetpe aban komatma? Labangso abang ke la helo: hem kepalangji aphan lapen anut kaprek aban atum aphan athikpet apor ahut an kepacholongji aphan alangliphan akam anghor pekji.

⁴³Ahemphu kechevang ahut alangliphan lapuson keklembom nang-thek-long lote, halabangso aban ko-an akerengme!

⁴⁴Ne nangtum aphan nangpulang, ahemphu amar do-an kepalangji aphan halabangso aban aphan akam anghor pidetji.

⁴⁵Bonta halabangso aban jongsi, ‘Ne hemphu kevang pader-oji’ pu mathara akaprek aban atum aphan chok-theng lote, atheke arloso pinso atum aphanta chok-theng lote, lapen kecho-kejun, kangri-kangkrang pangcheng lote,

⁴⁶vangvejibon pu kematha lapen kechinine ahutsi ahemphu abang vangji. Ahemphu abang alangliphan thupetji, lapen alam kekroikre atum aphan asonthotsi alangliphan paphoji.

⁴⁷“Ahemphu aning kehang akam chini setta keklemkle abang ke areng so-oji.

⁴⁸Bonta a-Hemphu aning kehang kechinine abang ke areng someme akam klem setta areng soparpedetji. Komat aphanma kepi ke-ong, labangso abang pen kehangta hang-oji; Komat aphansi ansose kepi ke-ongma, labangso abang pen kehangta ansose kehang pa-ong muchotji.

⁴⁹“Ne pirthe me kekaiji aphansi vang-lo. Lapen non mamat-le ame kar-ang asonte ko-an nening arong doji!

⁵⁰Ne eson abaptisom en nangjilang. La plangpletik ke ko-an nening aduk doloma!

⁵¹Ne pirthe athak ning kangsam kevangjisi vang-lo pusi nangtum mathaloma? Lapu kali, bonta kethak-etji aphansi vang-lo.

⁵²Non pen apar ke hem ehumpet kedo bangpho amonit chethaksi bang kethom abe bang hini lapen bang hini abe bang kethom thurji;

⁵³asopo abe apo, lapen apo abe asopo; asopi abe apei lapen apei abe asopi; amunpi abe anipi; anipi abe amunpi thurji.”

⁵⁴Lapen ke Jisu armu atum aphan pulo, “Nichi anat pen inghun ethan kethur thek long lote nangtum pupo, ‘Arve jangji,’ lapen lapusonsi chekok-lo.

⁵⁵Lapen nirep anat pen tomon kevang thek longsi nangtum pupo, ‘Arni so-oji,’ lapen la chekok-lo.

⁵⁶Angthin ke-ik atum! nangtum sining lapen pirthe a-arje langsi abotor thanmek thek; tangte nangtum kopi apotsi non ahut alam chini thekthedetma?

⁵⁷“Kolo abangsi ahokma, lake nangtum methang mamat kopi apotsi ingsaisedetma?

⁵⁸Jongsi nangphan kekhinde abang nangphan kangsai ahem nangponlo tangte, tovar mamat-le alangli pen jasemetle chingsaira alam kepajutji aphan bor-i-non; lapu kalite alangli nangliphan kangsai abang angno nangsanthorji tahai, lapen kangsai abang ke polis arideng nanghodaiji, lapen polis nangli-phan phatek nangbengthotji.

⁵⁹Ne nangthanlo, kadokave adai an nang tute tik ke nang hadak pen jokje detji.”