Read Karbi LUK 13 Bible Online

LUK 13 - Karbi bible

LUK 13

¹Halabangso ahut manene atum vangsi Galili asor Arnam aphan kethok kejir ahut Pilat kepathi atum alamjir Jisu aphan thanlo.

²Jisu halatum aphan thak-lo, “Lapuson kethinang apotsi labangso a-Galili asor ke kadokave a-Galili asor apar hingno muchot apapi pusi nangtum matha loma?

³Chenamsi lapu kali, lapen ne nangpulang, nangtum apap pen ning chiruirete nangtumta lasonthotsi thinangpo.

⁴Hala Siloam apaisong keklijap ahut bang kre nerkep amonit atum thikoilo; latum ke Jerusalem kedo atum an apar hingno muchot pusi nangtum mathaloma?

⁵Chenam, lapu kali, ne nangtum aphan nangpulang, nangtum pap pen ning chiruirete latum ason thak-thaksi kadokaveta thi nangpo.”

⁶Lapen Jisu lamlir pen thanlo: “Inut amonit adrakha apai beri angbong thebo erong dolo. Alangli athe kerijisi vang-lo, bonta longle det-lo.

⁷Lasi alangli beri kehon abang aphan pulo, ‘Langtha, ne ningkan kethom dak vangbomlo, lapen labangso athebo athe ribom setta longledet-lo, la pipetnon!’

⁸Bonta kehon abang alangliphan pulo, ‘Hemphu, paningkan isi ke pado sinang. Ne akung arei tuksi orpo lapen ho-or pipo.

⁹La athe patheji mene. Jongsi pathethe tangte nangli pipet tamelo.’ ”

¹⁰Arni isi Sabbath arni Jisu Sinagog ahem arlo lam thanbomlo.

¹¹Hadak inut arloso hi-i kepho pen ajok ningkan kre nerkep akeso dolo. Alangli ingkupdisi arjap thekthedet-lo.

¹²Jisu alangliphan thek longsi alangliphan hang-lo, “Pei! Nangli keso pen joktang-lo!”

¹³Jisu alangli phuthak ari bat-lo, lapen hala mamat alangli karjap pakengdong-lo, lapen Arnam aphan kero pilo.

¹⁴Bonta Jisu Sabbath arni keso abang aphan keso kepame apotsi Sinagog ahemphu aningthisi rat atum aphan pulo, “Nithrok kam keklemme arni do; labangso angbongle vang-ra keso chepamenon, bonta Sabbath arni kali!”

¹⁵Hemphu alangliphan thak-lo, “Nang angthin ke-ik atum, nangtum abangphutin setta Sabbath arni amethang methang achainong, mate agadha aroi pen losi lang kepajun damjisi ponbom.

¹⁶Tangte, ningkan kre nerkep pen Soitan kekokdong, Abraham asupi Sabbath arni kejok kelongji aron avema?”

¹⁷Alangli kethakdun alam pen apot ahotur atum an therakduk-lo, lapen rat atum do-an alangli keklem akemanghumeme akam pen apot aning arong chepilo.

¹⁸Jisu arjulo, “Arnam arat kopuson? Ne kopi pensi pangbar-i poma?

¹⁹Lake hanjang emu asonlo. Inut amonit hanjang amu ponsi arit rikdamlo. Arong vangsi thengpi cheplang-lo, lapen nampi avo atum aro along atar chepatarlo.”

²⁰Puthot Jisu puthulo, “Ne kopi pensi Arnam Arat pangbar poma?

²¹Lake thap asonlo. Inut arloso thap ensi him tonthom kangpet petik ke patip bomlo.”

²²Ansi Jisu rongsopi rongsopi lapen arong arong damsi monit atum aphan thanponbomsi Jerusalem anat dambomlo.

²³Mane abang alangliphan arjulo, “Hemphu, kejokji atum ong-e ma?” Jisu halatum aphan thak-lo,

²⁴“Nanglitum anghap angho bihek anat kelut damjile jasemet chepaduknon; pima penang atum kelut damjisi bor-iji bonta un-edetji.

²⁵Hem ahemphu thursi inghap inghapdetpo; anke nangtum ingtan arjapthersi inghap pachengpo, ‘Hemphu, nelitum aphan inghap ingpu iktha!’ pusi nangtum pupo, alangli nanglitum aphan thakpo, ‘Nanglitum konat pensi kevangma, neli chinine!’

²⁶Ansi nanglitum thakthupo, ‘Ilitum chorap rap-lo, junrap rap-lo, lapen nangli nelitum arongsopi angbong lam ta thanlo!’

²⁷Bonta alangli puthuji, ‘Nanglitum konat pensi kevang, lake neli chinine! Nedung pen damnon, kehingno keklem atum!’

²⁸Hadak Abraham, Isaak lapen Jakob lapen montri atum do-an Arnam Arat angbong doji, lapen nangtum aphan ke ingtansi varchorji; lason kechethek-long ahut nangtum chiru chernapsi aso chardengji!

²⁹Monit atum nihang, nichi lapen nirep, nitur pen vangsi Arnam arat angbong kechopi amei along ingniji.

³⁰Lapen non kepaphi atum paphrangji, lapen non kepaphrang atum paphiji.”

³¹Halabangso ahut mamat manene a-Pharisi atum Jisu along vangsi pulo, “Nangli dak pen katnon, pima Herod nangliphan kepathiji aning hang-lo.”

³²Jisu halatum aphan thak-lo, “Damra halabangso asirung aphan than non: ‘Neli pini panapta hi-i atum aphan phlungbom, lapen keso atum aphan pamebom jilang, lapen nithom arni anke neli kam plengpo.’

³³Bonsetta neli pini, penap lapen penapdik angbong damnangji, pima Jerusalem along apar ke akaprek adim ke badu amontrita thi nangne.

³⁴“O Jerusalem, Jerusalem! Nang montri atum aphan pathilo, Arnam nang ketoitang atum aphanta nangtum arlong pen arbubop-lo! Vopi avengkong arum amethang asomar kechenom asonthotsi ne batai ko-ansi nang somar atum aphan kepangrumbomjisi nening hang-lo, bonta nang ne paklem longle!

³⁵La apotsi nang a-Kardom ahem aphan ke obup po. Ne nangtum aphan nangpulang, ‘Hemphu amen pen kevang abang ahirjume atheng-lo’ pu nangtum pupetik ke nangtum nephan thekthu longledetji.”