Read Karbi LUK 14 Bible Online

LUK 14 - Karbi bible

LUK 14

¹Arnisi Sabbath arni Jisu Pharisi amonit keja abang ahem anke-choji aphan damlo; lapen monit atum Jisu aphan lang pamelo.

²Alangli ingno inut ari akeng kekang abang dolo,

³lapen Jisu aron thekser lapen pharisi atum aphan arjulo, “Sabbath arni keso kepameji aron doma avema?”

⁴Bonta halatum doklip-lo. Jisu hala keso amonit abang otsi pamelo, lapen toijuilo.

⁵Anke alangli halatum aphan pulo, “Nangtum angbong mane abang asopo, kalite achainong Sabbath arni lang jangchok lote la aphan Sabbath arni amat ke-en-edetji abang doma?”

⁶Bonta halatum thakdun thek thedet-lo.

⁷Manene alohi atum akemenei adim kechongvai thek-longsi Jisu halatum aphan eson alamlir pen pulo.

⁸“Piso kepangri akecho amei along mane abang nangphan nang kepha ahut akemenei adim ingniri; pima nang par mane the muchot abang aphan phalo tahai,

⁹lapen nangtum banghini aphanta kepha abang vangsi nangpupo, ‘Bangso adim alangliphan pektha.’ Anke nang therak duksi aman kave adim ingni nangkokpo.

¹⁰Bonta nangphan nangkepha ahut aman kavenei adimle ingni damnon. Lasi nangphan kepha abang kevang ahut nangphan ‘Memuchot adim ingnidam iktha’ pusi nangpuji. Ansi nang long kangni rap-rap alohi atum angno nang man doji.

¹¹Pima amethang kechepathe abangphutin aphan pabihekji, lapen amethang kechepabihek abang aphan pathedetji.”

¹²Lapen ke alangliphan kepha abang aphan Jisu pulo, “Anerlo kalite ajo apor kecho kejun amei kepathik ahut, nangjirpo atum, kalite nangkorte atum, kalite nang chepho chero atum, kalite tebok terei akeplang-o atum aphan phari; pima halatum nang-phathupo, lapen nang alar long thupo.

¹³Nang Kecho kejun kepathik ahut keduk, ketekok, kengkok, lapen amek kave atum aphanle phanon;

¹⁴lapen nang ahirjume longpo, pima halatum nangphan nangpithu thekthelo. Arnamsi mo monit keme atum kethi pen kethur ahut nangphan nangpi thudetpo.”

¹⁵Bangso alam arju longsi kangni rap-rap atum angbong pen inut abang Jisu aphan pulo, “Arnam Arat angbong an kecho kangni dunlongji atum ko-an akerengme!”

¹⁶Jisu alangliphan pulo, “Inut amonit kechopi amei pathik-lo, lapen alangli penang amonit aphan phalo.

¹⁷Ansi an kechoji aphan kadokave siktang-etsi alangli kephatang atum along aban aphan toisi papulo, ‘Vang iktha, kadokave nonke siktang-et-lo!’

¹⁸Bonta halatum kadokaveta diya kechohangji pangcheng-lo. Aphrangsi abang ban aphan pulo, ‘Ne longle emo namlo, lapen ne langdamvek nangji; ne kechoningri dengtha.’

¹⁹Anut kaprek abang pulo, ‘Ne chainong haipho namtang-lo, lapen ne la anem endam nangjilang; ne kechoningri dengtha.’

²⁰Akaprek inut abang pulo, ‘Ne nonhetsi piso kechepangrilang; la apotsi ne nangdun thekthelo.’

²¹“Aban hem vangsi kadokave alam ahemphu aphan than-et-lo. Ansi ahemphu aning thihaksi aban aphan pulo, ‘Rongsopi atovarpi lapen atovarso an damserak-ra, keduk kelak, ketekok, amek kave lapen kengkokjok atum an aphan van-etnon.’

²²Malomso aphi aban pulo, ‘Hemphu, nang hukum ateng akam klemtang-lo, bonta adim do-o lang.’

²³Lasi ahemphu abang aban aphan pulo, ‘Nehem kepaplengsetjile rat atovar lapen rit atovar damra monit atum nang kepalutjile bor-i non.’

²⁴Ne nangtum aphan nang pulang, kephatang atum angbong pen inut natta ne kepathik akecho kejun chomat longledetji!”

²⁵Armu ake-ongpi Jisu along kedun bom ahut, alangli chepangnosi halatum aphan pulo.

²⁶“Badutame amethang apo lapen apei, apiso lapen asomar, akorte lapen angjirmar atum, lapen amethang aphan chinghonmunak lote nelong vang setta alangli ne sangho plang un-e.

²⁷Badutame amethang athengparpan cheponra ne phi phi nang dundete, alangli ne sangho plang un-e.

²⁸“Jongsi nangtum angbong mane abang hem chardon kekimji aning hang-lote, alangli aphrangke ingnisi, ko-an atangka nangjima, lapen kepatang-iji apoisa doloma avema, la lakhaji.

²⁹Lapu kalite ahemthur chamdetsi patang thekthedette, kethek dun long atum ingnekchoisi puhurpo,

³⁰‘Labangso amonit kekim pang-cheng-lo, bonta patang thekthedet lohe!’

³¹Jongsi inut arecho akaprek arecho pen ron kechedanjisi damlo, lapen bang surikep amonit ponsi hala bang suri ingkoi kevan abang aphan parem unjima, un-ema, labangso alam aphan alangli aphrangsi ingnisi mathaji.

³²Lapen un-edetji tangte, alangli pherangke atum aphan toisi, heloving kedo ahutsi kechepame thuji aphan choningri damji.”

³³Jisu pajutsi pulo, “Lasonthotsi nangtum angbong badutame amethang amar atar che-o edette nesangho plang-un-e.”

³⁴“Ingti ke mesen, bonta, ingti jongsi lamdak tangte, la kopi pensi padokthumejima.

³⁵Lake longle aphan kalite ho-or aphanta meme; la ingtan varchor chotpo. Tangte, karjuji ano kedo abang parjunang!”