Read Karbi LUK 15 Bible Online

LUK 15 - Karbi bible

LUK 15

¹Arni isi midu kerung lapen papi atum Jisu adung vang-lo.

²Pharisi lapen aron thekser atum pasimuhursi pulo, “Labangso amonit ke papi atum aphan chakbom, lapen chota chorap-rapbom!”

³Lasi Jisu halatum aphan labangso alamjir thanlo:

⁴“Bisar alam, nangtum angbong mane abang jon pharo isi abiresak dolo, lapen ejon abang ingbodet-lo, alangli pisi klempo? Hala jon throksirkep-ra sirkep atum aphan kechopan adim otekangsi longletik ke hala kangbodet abang aphan ridam bomji.

⁵Lapen long-lote aning arong pensi aphang athak chebatsi

⁶hem chevangpo. Anke alangli ajirpo lapen tebok terei atum aphan hangsi lapen pangrumsi halatum aphan pupo, ‘Ne ning arongpik-lo, pima ne kangbodet abiresak longthutang-lo. Toh, ning arong chepilonang!’

⁷Lasonthotsi, ne nangtum aphan nang pulang, bang throksirkep-ra sirkep aning kecherui nangne, dhoromi amonit atum pen apot apar inut aning kecherui apapi pen apot sining athak pherangke atum aning arongmuchotji.

⁸“Kalite, inut arloso aduli kep dolo, lapen aduli isi abang ingbodet-lo, alangli pisi klempo? Alangli, melur keisi hem arkokpo, lapen longletik ke ri pameji.

⁹Alangli long-lok lote ajirpi lapen tebok terei atum aphan hang pangrumsi pupo, ‘Ne ning arongpik-lo, pima ne kepangbotang aduli isi longthulo. Toh, ning arong chepilonang!’

¹⁰Ne nangtum aphan nang pulang, lasonthotsi, inut apapi aning kecherui pen apot Arnam apherangke atum aning arong chepi.”

¹¹Lapen Jisu pulo, “Inut amonit asopo banghini dolo.

¹²Akebi abang apo aphan pulo, ‘Po, ne nang mar kelongvek nangji, nepharman an nonle ne pinon.’ Lasi alangli halatum aphan amar thak-lo.

¹³Malomso arni aphi akebi abang alangphan ketang amar an jordamsi kehelo adet damjuilo. Hadak thangta mathathesi atangka hijikthap-et-lo.

¹⁴Alangli kadokave khorot-et aphi halabangso adet adang jasemet akhim thurlo, lapen alangli long thangnatta avedet-lo.

¹⁵Lasi alangli halabangso adet amonit inut ahem damsi dodun bor-ilo, lapen phak kepaviji aphansi alangliphan ha rit toilo.

¹⁶Alangli phak atum kecho, kharop pu athengpi athe ahu pen apok kechepangkrangji aphan aning hang-lo, bonta baduta alangliphan thangta pipedet-lo.

¹⁷Padu alangli bidi vangthusi pulo, ‘Mai! Ne po aban atum bang ko-anma, latum an kecho dorphlup, bonta neke ladak an ingchirsi thiji dok dok-lo!

¹⁸Ne thursi ne po along damsi pudampo, Po, sining lapen nang abethursi ne pap klemtang-lo.

¹⁹Non pen apara nang sopo puke nephan kehangji ne ot avelo; nang ban inut asonle nebinon.’

²⁰Lapen alangli thursi apo along kechedam pangcheng-lo. “Alangliphan achar pen apo chethek-long-lo; alangli ingjinsosi munduk-lo, lapen katvirsi asopo achethok bamlo, lapen ingjup-lo.

²¹Asopo alangliphan pulo, ‘Po, sining lapen nangbe thursi ne pap klem tang-lo. Non pen apar nang sopo puke nephan kehangji ne-ot avelo.’

²²Bonta apo amethang aban atum aphan pulo, ‘Serak non! Menei ape vanra pindeng non. Ari chimun arnan lapen keng-op nangthon non.

²³Damra, kepangtutang achainong aso thunon, lapen ili chora ning arong chepi lonang!

²⁴Pima la nesopo thilot-lo, bonta nonke rengthulo; alangli ingbodet-lo, bonta non longthu tang-lo.’ Lapen ke halatum aning arong kechepiji pangcheng-lo.

²⁵“Halabangso ahut asopo akleng abang ritsi dolang. Alangli rit pen hem nanglesi kelun kekan arki arju long-lo.

²⁶Lasi alangli ban inut aphan adung chehangsi, ‘Kopi plang loma?’ pusi arjulo.

²⁷Aban thak-lo, ‘Nangli mu vangthutang-lo, lapen nangli po kepangtutang achainong aso thutang-lo; pima alangliphan thang thesi longthulo.’

²⁸“Akleng abang aning thisusi hem kelutji molo. Lasi apo vangsi hem kelutji aphan choningrilo.

²⁹Bonta apo aphan thaksi pulo, ‘Ne lapu-an aningkan ban ason thak-thaksi kam nangklempilo, lapen nang hukum eson natta kekroikre avepinlang. Nang kopisi nephan pilo? Ne jirpo atum pen nening arong kechepiji aphan bi aso ejon anta nang nepipepinlang!

³⁰Bonta la nang sopo, akhat kave arloso atum pen pen nangmar nangtar kechorapdet abang kevang ahut nang alangphan kepangtutang achainong thupitang-lo!’

³¹Apo thak-lo, ‘Po, nangke kaiketa nelong doverlo, lapen ne kedo-an amarta nangmarlo.

³²Bonta ening arong kechepiji, lapen kechehokji lake akenangsot-lo, pima nangmu thilot-lo, bonta rengthulo, lapen alang ingbodet-lo, bonta non longthutang-lo.’”