Read Karbi LUK 17 Bible Online

LUK 17 - Karbi bible

LUK 17

¹Jisu amethang asangho atum aphan pulo, “Pap kepaplang-i amar hei hei dovek-lo, kepaplangji aning kehang abang ko-an akephere-meme akesung pho nangpo!

²Alangli la bihek atum angbong pen inut aphan pap kepaklem long aparte, alangli chethok him kekoi-i a-arlong homdongra langthepi along varchui memu.

³Lasi nangtum kopisi keklem, lale cherenon! “Jongsi nangkorte pap klem lote, alangliphan ingcheknon, lapen aning chirui tangte, alangliphan diya non.

⁴Lapen arni isi angbong nangliphan alangli batai throksi pap klemlo, lapen abataitin nangli long vang-ra ‘Nening chiruilo’, pulote alangliphan nangli diya vek nangji.”

⁵Ketoitang atum Hemphu aphan pulo, “Netum akekroi pathe muchot-tha.”

⁶Hemphu thak-lo, “Nangtum akekroi hanjang emu athek anle do asonte, nangtum la ingle arong aphan, ‘Nangmethangle chephujokra ha lang-thepi angbongle che-e damnon’ pusi puthekji apot-lo, lapen la nangtum alam arjuji apot-lo.

⁷“Bisar alam, nangtum angbong mane aban abang hai bai damlo, kalite biresak vidamlo. Alangli rit pen vang lote, ‘Non amat vang-ra an chonon,’ pusi nangtum pujima?

⁸Lapu pupe! Alar nangtum alangphan pulo, ‘Ne an kechoji aphan sik koinon, lapen nangvam chingtinra ne an kecho ahut nephan ru thai non; la an aphile nangke an chonon,’ pusi puji.

⁹Ban abang hukum kekroi apot akero longle kalima?

¹⁰Lasonthotsi nangtum jokta hukum kelong an klemdet aphita lasonle punon, ‘Netum ke thangta kalidet aban atumchot; netum keklem nangji adengsi keklemlo.’ ”

¹¹Jisu Jerusalem anat kedam ahut alangli Samaria lapen Galili adet ahoi keng keng damlo.

¹²Alangli erong kelut dam ahut bang kep si-i kelong atum alangli pen chetong-lo.

¹³Halatum achar arjapphrongsi alangliphan hangjosi pulo, “O Hemphu, Jisu! Nelitum aphan ingjinsotha!”

¹⁴Jisu halatum aphan thek-longsi pulo, “Damnon, lapen kurusar atum asat nang-palang lonang.” Tovar kedam ahut halatum ingthir-et-lo.

¹⁵Halatum angbong inut ke medet-lo pu chethek-longsi, hang cherbu pen Arnam aphan rosi vangthulo.

¹⁶Alangli Jisu akeng-ri domkhrupsi alangliphan chorolo. Halabangso amonit ke Samaria asorlo.

¹⁷Jisu pulo, “Bangkep atum medet-lo; hala bang sirkep atum konatma?

¹⁸Kopi apotsi la bang adet amonit apar akaprek atum ke nang chiruira Arnam aphan keroji aphan baduta vangvedet loma?”

¹⁹Lapen Jisu alangliphan pulo, “Thurra damnon, nang akekroisi nangphan pametang-lo.”

²⁰Arnam Arat mantu vangjima pusi Pharisi atum Jisu aphan arjulo. Alangli halatum aphan thaksi pulo, “Arnam Arat ke kethek longphrong pen vangve.

²¹‘Langtha, daksi do,’ kalite ‘Hadaksi do!’ pusi baduta pupedetji; pima Arnam Arat nangtum angbongsi do.”

²²Anke alangli asangho atum aphan pulo, “Monit a-Sopo a-arni hei hei angbong pen isi a-arni nangtum kethek longji ingtungji, bonta nangtum thek longledetji, lason ahut vangji.

²³Lapen monit atum lason nangtum aphan puji, ‘Langtha, ladak ho!’ Kalite ‘Langtha, hadak jaho!’ Bonta hong barra ridunri.

²⁴Pima sining kebirlak ahut ihi pen ihi kekhelan asonthotsi Monit a-Sopo amethang kevang arni plangji.

²⁵Bonta aphrangke alangli penang akesung chechak nangjilang, lapen labangso a-ove amonit atum alangliphan chakchedetji.

²⁶Noah arni asonthotsi Monit a-Sopo arnita plangji.

²⁷Noah telongpi kechethap lapen langthepi vangsi monit atum aphan kepavirkoi ahut anta monit atum chobom, junbom, piso enbom, penan dobomlang.

²⁸Lapen Lot arni ason thakthak plangji; abangphutinta chobom, junbom, lapen nambom, jorbom; lapen sok ebom lapen hem kimbomlang.

²⁹Lot Sodom pen nangkebar arni, sining pen cheter lapen me ke-et nangklosi halatum aphan pavir-et-lo.

³⁰Lasonthot helo, Monit a-Sopo keklang arni keplangji.

³¹“Halabangso arni mane abang hem asarnung athaksi do tangte, amar atar ke-enji aphan hir nangnelo; lason thak-thaksi rit kedam abangta hem chevang nangnelo.

³²Lot apiso alam chemathathutha!

³³Baduta amethang achethe kechepajokji aphan bor-i lote la ingbodetji; badutame achethe pangbolote, alangli la chepajokji.

³⁴Ne nangtum aphan nangpulang, halabangso ajo, banghini amonit hongplang isinat irap rapji: inut aphan pondetji, lapen anut kaprek aphan otekangbupji.

³⁵Bang hini arlosomar atum him koi rap-rapji: inut aphan pondetji, lapen anut kaprek aphan otekangbupji.

³⁶Banghini amonit atum ritsi doji: inut aphan pondetji, anut kaprek aphan otekangbupji.”

³⁷Asangho atum alangliphan arjulo, “Konatma, Hemphu?” Jisu halatum aphan thak-lo, “Kethitang arpum kedo aling, hadak takun atumta chingrumji.”