Read Karbi LUK 18 Bible Online

LUK 18 - Karbi bible

LUK 18

¹Lapen latum kaiketa ning runhuphedet-ra ardomver nangji pu kethanjisi Jisu lamlir eson thanlo.

²“Erong arongsopi inut kangsai abang dolo; alangli Arnam aphan pherere lapen monit aphanta aman pipe.

³Lapen halabangso arongsopi angbong inut ahemepi alangli long vang versi pulo, ‘Nephan kekosor abang pen nepajoknon.’

⁴Penang ahut an alangli la keklemji aning hanghe det-lo, bonta aphisi alangli amethang aning arlo chepulo, ‘Ne Arnam aphan pherere, lapen monit aphan aman pipe setta

⁵labangso ahemepi nephan pasungver apotsi ne alangliphan kepajokji aphan langpo. Jongsi ne klemklete alangli vangbomsi nephan pasiksak pikji!’”

⁶Lapen Hemphu pulo, “Hala kehingno akangsai abang kepu alam arjutha.

⁷Tangte nonke, Alangli methang amonit atum ajo, anerlota Alangliphan kechoningriver atum aphan Arnam abe dundedetsi ingsaise-detjima? Mate Alangli halatum aphan kerapji pader poma?

⁸Ne nangtum aphan nangpulang, Alangli abe dunsi ingsai dapprangji lapen halatum aphan pajokji. Bonta Monit a-Sopo kevangji ahut alangli pirthe athak kekroi longjima?”

⁹Lapen amethang mamat mesen pu kechematha lapen bang aphan kehijim atum aphan Jisu labangso alamlirta thanlo,

¹⁰“Ahut isi bang hini amonit Kardomhemthepi arlo kardom damjisi damlo: inut ke Pharisi lapen inut ke midu kerung abang.

¹¹“Pharisi achar arjapthersi ame-thang aphan chardom pilo, ‘O Arnam, neke bang atum ason thakthak, bang amar kethi, kechobei, mate beisa keklem abang kali apotsi ne nangphan nangchorolo. Ne nangphan nang-chorolo atheke, neke labangso amidu kerung abang asonta kali.

¹²Ne, erui angbong nini an humbomlo, lapen nemar kelong an angbong phan kep pen ephan nangphan pilo.’

¹³“Bonta midu kerung abang achar arjapsi lapen sining anat langhaihe-detsi aning chetengbomsi pulo, ‘O Arnam, neke papi abang, nephan ingjinsotha!’ ”

¹⁴Jisu puthulo, “Ne nangtum aphan nangpulang, la midu kerung abang aphan helo, lapen Pharisi abang aphan kali, hem kechevoi ahut ke Arnam angno dhoromi pusi lakha det-lo. Pima amethangsi kechepathe abang aphan pabihekji, lapen kechepabihek abangphutin aphan pathedetji.”

¹⁵Jisu kepa-otjisi manene atum osomar alangli long vanlo. Sangho atum halatum aphan thek longsi ingchek-lo,

¹⁶bonta Jisu osomar atum aphan hangsi pulo, “Osomar atum aphan nedung pavang longnon, latum aphan khangri, pima Arnam Arat ke lapuson atum arat-lo.

¹⁷Labangso alam ning chebi non! Oso ason thakthak Arnam Arat kedengde abang aling ke jonghe setta Arnam arat lutdun longledetji.”

¹⁸Inut a-Jihudi keja abang Jisu aphan arjulo. “ O kemesen a-Thanbang, kejut un-e achethe kelongji aphan neli kopi klemvek nangji?”

¹⁹Jisu alangliphan pulo, “Nephan kopisi kemesen abang pule nehang loma? Arnam apar ke baduta kemesen abang ave.

²⁰Nangli hukum an chinipet-lo, ‘Beisa akam klemri; Pran ke-en akam klemri; Chonghuri, kechobei pen badu aphanta adai nep-ri, nangpi nangpo aphan anong pathenon.’”

²¹Halabangso amonit thak-lo, “Neli oso chedap ahut penta la kadokave ahukum kroipetbomlo.”

²²Jisu labangso alam arjulongsi alangliphan pulo, “Nangli eson klem nangjilang. Nangli mar do-an jor-et-ra keduk kelak atum aphan tangka pinon, lapen sining athak nangli khi do-oji; anke vang-ra neli phi phi nangdun non.”

²³Bonta labangso alam arju longsi alangli ning dukparlo, pima alangli keplang-o abang-lo.

²⁴Jisu alangliphan pulo, “Keplang-o atum Arnam Arat kelutji aphan ko-an akesung!

²⁵Pima keplang-o amonit Arnam Arat kelut aparte, ka-ut ingprim arme kelut joimu.”

²⁶Karjulong atum alangliphan pulo, “Mai! Ante matsi jokthekpoma?”

²⁷Jisu thak-lo, “Monit ke-un-e akam Arnam klem un.”

²⁸Lapen ke Pitor pulo, “Lang iktha! Nangli phi phi kedunjisi netum me-thang methang ahem che-o tang-lo.”

²⁹Lapen Jisu halatum aphan pulo, “Ahok-lo, lapen ne nangtum aphan nangpulang, Arnam Arat pen apot ahem, mate apiso mate akortemar, mate api, apo mate asomar aphan che-o det-lo,

³⁰tangte labangso akai kedo ahut long-oji, lapen mo kevangji akai alangli kejut ahut un-e achethe longji.”

³¹Jisu la bang krehini asangho atum aphan cheponsi halatum aphan pulo, “Arjutha! Ili Jerusalem arlu dampo; hadak Monit a-Sopo alamjir montri atum ketok alam an chekokpetji.

³²Alangliphan Jihudi kalidet atum arideng hodai detji lapen halatum alangliphan pinremji, patherakji lapen abang athak ingthokji.

³³Halatum champre abu pen choksi alangliphan pathiji, bonta nithom arni aphi alangli kethi pen thur thuji.”

³⁴Sangho atum lahei hei alam thangta chinine det-lo; labangso alam athe hei hei halatum pen patu det-lo.

³⁵Jisu Jeriko kele ahut amek kave abang inut tovar akung ingnisi chohang-lo.

³⁶Alangli armu ake-ongpi kedam arki arjulongsi, athe kopima pusi arjulo.

³⁷Nazareth a-Jisusi labangso atovar kevang, pusi halatum alangliphan thanlo.

³⁸Alangli hang charbusi pulo, “David a-Sopo! Jisu! Nephan ingjinsotha!”

³⁹Aphrang kedam atum alangliphan ingchek-lo, lapen dojoinon pusi thanlo. Bonta alangli ase pathe muchot pen hang charbulo, “David a-Sopo! Nephan ingjinsotha!”

⁴⁰Lasi Jisu sangkok-lo, lapen amek kave abang alangli dung kevangji aphan hukum pilo. Alangli Jisu adung nanglesi alangli arjulo,

⁴¹“Nangli neliphan kopi kepaklemjisi nangli ning kehangma?” Alangli pulo, “Hemphu, neli kechechar thuji aphan ning hang-lo.”

⁴²Jisu alangliphan pulo, “Tangte, checharnon! Nangli akekroisi nangli-phan pame tang-lo.”

⁴³Halabangso ahut mamat alangli chechar unlo. Armu atum la thekdun longsi Arnam aphan anong pathelo.