Read Karbi LUK 19 Bible Online

LUK 19 - Karbi bible

LUK 19

¹Jisu Jeriko nanglesi rongsopi angbong dong ponputsi damlo.

²Hadak midu kerung akethe abang dolo. Alangli menke Jakaias puhelo. Alangli inut keplang-o abang-lo.

³Jisu komatma, la kethek longjisi alangli bor-i bomlo, bonta alangli kebi-kethi amonit pinak, lapen armu do-o apotsi alangli Jisu aphan thek long un-e det-lo.

⁴Lasi alangli armu aphrang katvirsi Jisu aphan kethek longji aphan ingle athengpi arong arlu krak-lo, pima alangli halabangso atovarsi vangbomlo.

⁵Halabangso adim nanglesi Jisu angsong anat langsi Jakaias aphan pulo, “Hir serak non, Jakaias, pima pini neli nangli hemsi do nangji.”

⁶Jakaias hir seraksi aning arong pen alangliphan chak-lo.

⁷Lapen kethek dunlong atum an pasimuhursi pulo, “Labangso amonit papi ahemsi alohi cho damlo!”

⁸Malomso aphi Jakaias thursi Hemphu aphan pulo, “Arju iktha, Hemphu! Neli mar do-an achitim neli keduk kelak atum aphan pipo, lapen jongsi neli kechobei pen mane abang pen kopine enlote, halabangso abang aphan neli phan phli pithupo.”

⁹Jisu alangliphan pulo, “Labangso ahem arlo pini kejok vang tang-lo, pima labangso amonitta Abraham asupolo.

¹⁰Monit a-Sopo ke kangbotang aphan keriji lapen kepajokjisi vang-lo.”

¹¹Monit atum labangso alam karjubom ahut Jisu thanbomsi eson alamlir thanlo. Alangli non Jerusalem nang tebok-het-lo, lapen Arnam Arat non amat nang klangpo pusi halatum mathalo.

¹²Lasi alangli pulo, “Ahut isi inut arleng kethe, recho kecho longji aphan heloving adet damlo, la aphi hem kechevoithuji aphan chepathik-lo.

¹³Alangli damde ako amethang aban bang kep atum aphan chehang-lo, lapen anut-tin aphan ser ingkleng isi si pitekangsi halatum aphan pulo, ‘Neli vangve tik ke la pen bepar klem-inon.’

¹⁴Bonta alangli arat aso atum alangliphan hijimpet-lo, lapen alangli phi keng keng pherangke atum toidunsi papulo, ‘Nelitum aphuthak labangso amonit recho kechoji aphan nelitum ning hanghe.’

¹⁵“Halabangso amonit recho akam long-lo lapen hem chevoilo. Lapen alangli ban atum ko-an ale long-lo, labangso kechinijisi amethang adung kevangji ahukum pilo.

¹⁶Aphrang abang vangsi pulo, ‘Hemphu, nangli nekepi ingkleng isi aser pen neli ser ingkleng kep long-lo.’

¹⁷Alangli pulo, ‘Me-ongchot-lo! Nang ke mesen abanlo! Bihek akamta nangli keklem pame apot nangliphan neli long kep arongsopi kechepahemphuji ajakong nangpipo.’

¹⁸Adunthu aban vangsi pulo, ‘Hemphu, nangli ingkleng isi aser nekepi pen neli ser ingkleng pho long-lo.’

¹⁹Labangso abang aphan alangli pulo, ‘Nangli rongsopi longpho kechepahemphuji ajakong longpo.’”

²⁰“Anut kaprek aban vangsi pulo, ‘Hemphu, nangli ser angkleng daksi do; neli piban pen thitsi bikok-lo.

²¹Nangliphan neli pherelo, pima nanglike haijai amonit. Nanglike kebibe amarta humlok lapen kerikre adimsi kerot.’

²²Alangli alangliphan pulo, ‘Nangli kehingno aban! Nangli methang keningje alamthe pen neli nangli dai padopo! Neli ke haijai amonit, kebibe amar humlok lapen kerikre adimsi kerot pu nangli chinilo.

²³Toh, tangte, nangli kopi apotsi neli tangka bank along thap damde det-loma? Anlote neli kechevang thu ahut ale pen chelong thuji apot-lo.’

²⁴“Lapen ke hadak karjapphrong atum aphan alangli pulo, ‘Alang long kedo aser angkleng ponra hala ingkleng kep kedo aban aphan pidamnon.’

²⁵Bonta halatum alangliphan pulo, ‘Hemphu, alangli ke ser ingkleng kep dotang-lo!’

²⁶‘Ne nangtum aphan nang pulang, amar kedo abangphutin aphan pidetji lapen thangta kavedet abang pen asap kedo amar anta ponthudetji.

²⁷Lapen ke neliphan halatum aphuthak recho kepachoji aning kehanghe atum aphan neli long vanpet non, lapen neli ingnole latum aphan pathi-etnon.’”

²⁸Jisu labangso alam pudetsi alangli Jerusalem anat dambomlo.

²⁹Alangli Oliv anglong akung kedo Bethphage lapen Bethani pu arong nangleji dokdok ahut alangli bang hini asangho atum aphan toisi pulo,

³⁰“Nangtum kepangno arongle damnon; hadak kelut pen mamat baduta kardonde pinlang agadha aso kekokdong thekdam longji. Phlok-ra dak-le vannon.

³¹Mane jongsi, nangtum kopi apotsi la phlok-lo pu arjulote. Hemphu nangji pura punon.”

³²Halatum damlo lapen halatum aphan Jisu kethan ateng kadokave long-lo.

³³Halatum gadha aso kephlok-bom ahut ahemphu atum latum aphan arjulo, “Nanglitum kopi apotsi gadha aso phlok-loma?”

³⁴Halatum thak-lo, “Hemphu nangji,”

³⁵lapen halatum gadha aso Jisu along vanlo. Anke latum amethang methang ape gadha athak limsi amoi athak Jisu aphan pardonlo.

³⁶Alangli kedam ahut monit atum amethang methang ape tovar athak limlo.

³⁷Alangli Jerusalem nangleji dokdok adim, Oliv anglong anat kehir kecheng adim along, halatum kethek long akemanghumeme akam an pen apot asangho atum ake-ongpi Arnam aphan rosi ase kethe pen anong pathelo:

³⁸“Hemphu amen pen kevang a-Recho aphan Arnam hirjume papinang! Sining athak ning kangsam padonang, lapen Arnam aphan anong pathe nang!”

³⁹Lapen armu atum angbong pen manene a-Pharisi atum Jisu aphan pulo, “Thanbang, nangli sangho atum aphan kepadojoi jile hukum pinon!”

⁴⁰Jisu thak-lo, “Neli nanglitum aphan nangthan lang, jongsi latum dojoilo tangte, arlong atum amethangsi hangjoji.”

⁴¹Alangli ha rongsopi nanglesi la thek long-lo lapen la pen apot aning duk-lo,

⁴²lapen pulo, “Mai! Pini nang ning kangsam kelongji aphan kopi nangji, lale chini asonte mesenji apot-lo! Bonta nonke nangtum thek longlelo!

⁴³Nang hotur atum nangphan bithe bitha paisong buichenji, nangkompetji, lapen bithe bitha penta nang khang thipji; lason ahut vangji.

⁴⁴Halatum nangphan lapen paisong arlo kedo amonit atum an pavirkoiji; arlong isinatta kangrei-redet avedetji, pima Arnam nangphan kepajokji aphan kevang ahut nang apor chininedet-lo.”

⁴⁵Ansi Jisu Kardomhemthepi lutdamsi mar kejor atum aphan kephlungji pangchengsi,

⁴⁶halatum aphan pulo, “Hastro along toktang-lo, atheke Arnam pulo, ‘Ne hem ke Arnam kardom ahem pusi puji,’ bonta nangtum la kanghu atum kechepatu angthor paman tang-lo!”

⁴⁷Arnivangta Jisu Kardomhemthepi arlo lam thanbomlo. Kurusar akethe atum, Aron thekser atum, lapen rat aphan keja atum alangliphan kepathiji aning hang-lo,

⁴⁸bonta halatum atovar long thekthe det-lo, pima kadokave arat atum mon-e pensi alangli lam arjudunlo.