Read Karbi LUK 2 Bible Online

LUK 2 - Karbi bible

LUK 2

¹Halabangso ahut Agastas Recho Roman adet adang monit aphai ke-enji ahukum pilo.

²Siria adet Kuirinias govornor kecho ahut kechengsi aphai-en la helo .

³Lapen amen kepatokjisi kadokave atum amethang methang arong chedamrep-lo.

⁴Lapen Josephta amen kechetok-damjisi Galili adet Najareth arong pen Judia adet Bethlehem pu David amahang kethek arongsopi arlu damlo. Pima alangli ke David ahem asangho lapen akheilo.

⁵Alangli keraitang abangpi, Meri aphanta cheponlo. Halabangso ahut alangli areng-angsesedet-lo.

⁶Lapen halatum hadak kedobom ahut labangpi aso pirthe kehache apor chok-lo.

⁷Ansi asopo akleng abang pirthe hachelo, lapen oso pe pen telomsi longhong arlo pe-i-lo. Pima halatum aphan alohi ahem adim jangjedet-lo.

⁸Lapen halabangso alongri Biresak kevi atum dolo. Halatum ajo mamat arit angbong apai pai biresak ahur honlo.

⁹Lapen Hemphu apherangke inut halatum adung arjaptherlo, lapen Hemphu adak atur halatum bithe bitha turdang-lo. Halatum phere-olo,

¹⁰bonta pherangke halatum aphan pulo, “Phereri, pima mathanon, neli nanglitum aphan ning arong abirta keme vanlo. Lake kadokave arat atum aphanlo,

¹¹pima pini David arongsopi along nanglitum aphan Kepajok a-Bang pirthe hachetang-lo. Hemphu Khristo alangli helo.

¹²Lapen nanglitum aphan angthek lahelo, hala oso thi-i aphan pe pen ketelom lapen la longhong arlo ke-i nanglitum thek dam longpo.”

¹³Lapen tong sekotsi pherangke along sining armu ake-ongpi atum dosi Arnam aphan ro si pulo,

¹⁴“Kangtuinei adim Arnam adak atur lapen Kangtuinei asining athak Arnam adak atur lapen pirthe athak alangli ning kedok amonit atum angbong ning kangsam padonang!”

¹⁵Lapen pherangke atum halatum adung pen sining athak damdetsi kevi atum chepuhurlo, “Hemphu ekethan, la keplangtang alam Bethlehem arongsopi along non mamat-le langdam lonang.”

¹⁶Halatum damserak-lo lapen risi Meri lapen Joseph lapen longhong arlo ke-i a-oso thi-ita long-lo.

¹⁷Lapen langdamsi halatum aphan kethan ateng, labangso a-oso alamjir halatum aphan than phlirlo.

¹⁸Lapen karjulong atum an, kevi atum halatum aphan kethan alam pen apot manghu phrong-lo.

¹⁹Meri labangso alam an aning arlo chebi pamesi mathading bomlo.

²⁰Lapen aphrang pen halatum aphan kepu tekang asonthotsi kevi atum karjulongtang lapen kethek-longtang alam an pen apot Arnam aphan kero lapen anong kepathe pen chevoilo.

²¹Lapen alangliphan reng-rot kepiji aphan arta ni nerkep choksi alangli men Jisu irlo. Apei aso pathethe ako pen pherangke alangliphan labangso amen irlo.

²²Lapen Moses aron ateng pen halatum aphan kepangthirji a-arni choksi, Arnam aphan kepanongjisi halatum alangliphan Jerusalem ponlo.

²³Lake Hemphu aron along ketok asonthot-lo, atheke hadak tok-lo, “Pinso a-oso akleng an aphan ke Hemphu aphan kepanongtang abang-lo pusi pudetji.”

²⁴Lapen Hemphu aron kepu asonsi vothung echor, kalite thungpharlo aso jonni se karkli-iji aphan halatum vanlo.

²⁵Lapen chini iktha halabangso ahut Simeon pu inut amonit dolo. Labangso abang ke dhoromi lapen Arnam aphan kangduk abang-lo. Alangli Israel akejok kethek-longji aphan inghongding-lo lapen Karjong Kangthir alangli phuthak dolo.

²⁶Lapen alangli Hemphu Khristo aphan thek-longletik ke thithedetji pusi Karjong Kangthir alangliphan paklang-lo.

²⁷Karjong japonsi Simeon Kardomhemthepi arlo damlo. Aron kepathik ateng keklemjisi apo a-oso aphan kevan ahut

²⁸alangli oso aphan arbaksi Arnam aphan rosi pulo,

²⁹“Hemphu, Jakong Kethe Parpik a-Bang, nang lam asonsi, nang non nangban aphan aning kangsam pen padam long-lo.

³⁰Pima nemek-hini pen nang akejok thek-longtang-lo,

³¹nangli labangso akejok kadokave amonit angno bitang-lo:

³²Lake kethe-ang, atheke, Jihudi kalidet atum aphan kepaklang alamlo, lapen lake nang rat, Israel atum adak aturlo.”

³³Lapen api apo atum alangli lamjir keningje alam pen apot manghuphrong-lo.

³⁴Lapen Simeon halatum aphan ahirjume pisi apei Meri aphan pulo, “Chini iktha, Israel angbong penang atum kevirji lapen penang atum kethurji aphansi lapen lam kechedan-i angthek aphansi labangso a-oso aphan battang-lo.

³⁵Lapen lapusonsi penang atum aning kematha kepatujoi alam klangdakji, lapen nokjir pen ketok asonsi nangli ning keduk lutchokji.”

³⁶Lapen Anna pu inut amontripi dolo. Alangli ke Asher akhei, Phanuel asopilo. Alangli sarpi-olo, pima apenan pen ningkan throksi an dorap-lo,

³⁷lapen alangli arta ningkan throknerkep ra phli anta pahemebomlo. Alangli ajo anerlota an kehum lapen kechoningri pen Arnam aphan ingduksi Kardom a-Hem thepi pen nangbarbedet-lo.

³⁸Lapen alangli halabangso ahut mamat nangcheklangsi Arnam aphan chorolo, lapen Jerusalem kejokji aphan kanghong atum an aphan alangli halabangso a-oso alamjir pulo.

³⁹Lapen Hemphu aron asonthotsi kadokave klemdet aphi Jisu lapen Meri aphan ha Galili adet amethang arong Najareth chevoithulo.

⁴⁰Lapen oso thelo, lapen ingtangrak-lo, lapen gian pen pleng muchot muchotbomlo lapen Arnam akangjinso alangli long dolo.

⁴¹Lapen api apo atum aningkantinta Kejok Achojun a-Meipi ahut Jerusalem dunbom.

⁴²Lapen Jisu arta ningkan krehini choksi halatum kai atengsi chojun amei along kedunji aphan Jerusalem arlu damlo.

⁴³Lapen kenangji arni an hadak dokoksi hem kechevoi ahut la oso Jerusalemsi dobomlo. Jisu api apo atum laso alam chininedet-lo.

⁴⁴Bonta alangli armu angbongsi do pu mathasi halatum arnisi atovar damlo lapen halatum chepho chero lapen jirpi jirpo atum angbong ri pamelo.

⁴⁵Lapen long thekthedetsi halatum alangliphan ri ponbomsi Jerusalem chevoithu phak-lo.

⁴⁶Lapen nithom arni halatum alangliphan long-lo. Alangli Kardomhemthepi arlosi Jihudi athanbang, atheke kethan atum angbong ingnidunlo, lapen halatum kethan alam arjudunlo lapen halatum aphanta lam arjubomlo.

⁴⁷Lapen alangli kethan alam karjulong atum an alangli bidi lapen kethak alam pen apot abidi jutdet-lo.

⁴⁸Lapen alangliphan thek-longsi api-apo atum manghuhak-lo, lapen apei alangliphan pulo, “Nangli kopi apotsi lapusonle nelitum aphan klemloma, po? Mathanon, nangli po lapen neli ke matha dukpiksi nangliphan rilo.”

⁴⁹Lapen alangli halatum aphan pulo, “Nangtum kopi athesi nephan riloma? Neke nepo ahemsi do nangji pu nangtum chininedetma?”

⁵⁰Bonta alangli halatum aphan kepu alamthe halatum chininedet-lo.

⁵¹Lasi Jisu halatum along hirdunsi ha Najareth chedunlo lapen hadak api-apo alam kroipet-lo. Asarpi la kadokave alam aning arlo chebilo.

⁵²Lapen Jisu agian lapen arta ta plengbomlo lapen Arnam lapen monit atum alangliphan aning dokmuchot muchotbomlo.