Read Karbi LUK 20 Bible Online

LUK 20 - Karbi bible

LUK 20

¹Arni isi Jisu rat atum aphan Kardom a-Hem arlo kethanbom lapen Birta Keme kepachethangbom ahut, kurusar akethe atum lapen Akesar atum pen pen Aron thekser atum vang-lo,

²lapen alangliphan pulo, “Lahei akam keklemji nangli kopi ajakong doma? Matsi labangso ajakong nangliphan pilo? Nelitum aphan thantha.”

³Jisu halatum aphan thak-lo, “Toh! Nonke neli nanglitum aphan eson alam arjulang. Neliphan thantha,

⁴Jon baptisom kepi ajakong Arnam pentong kevangma, mate monit penma?”

⁵Halatum angbong chedanseisi chepulo, “Etum pisi pupoma? Etum jongsi ‘Arnam pen’ pulote alangli ke, ‘Kopi apotsi tangte nanglitum Jon aphan kroikredet loma,’ pusi puji.

⁶Bonta etum jongsi ‘Monit pen’ pulote, labangso arat atum do-an etum aphan arlong pen arbupo, pima, Jon ke inut Arnam amontrilo pusi halatum kroipet-lo.”

⁷Lasi halatum thak-lo, “Alangli konat pensi kevangma, lake nelitum chinine.”

⁸Lapen Jisu halatum aphan pulo, “Neli kopi ajakong pensi lahei akam klem loma, neli jokta nanglitum aphan thanthelo.”

⁹Anke Jisu labangso alamlir rat atum aphan thanlo: “Ahut isi inut amo-nit drakha aberi tikilo. Alangli kehon atum aphan bi tekangsi arni dingklui aphan ahem che-osi damlo.

¹⁰Lapen drakha athe kepangrumji ahut nanglesi, alangli pharman kelongji aphan aban inut aphan beri kehon atum along nangtoilo. Bonta kehon atum ban aphan areng paso-osi areng angse nangtoijuilo.

¹¹Lasi puthot alangli anut kaprek aban aphan toilo; bonta beri kehon atum alangliphanta areng paso-olo, patherak-lo, lapen areng angsesi nangtoijuilo.

¹²Anke alangli kethom aphong ban aphan toilo; beri kehon atum laphanta areng amek padolo, lapen ingtan varchorlo.

¹³Ansi drakha aberi ahemphu pulo, ‘Ne kopisi klempoma? Ne methang kechinghon asopo aphan ne toipo; halatum alangliphan aman pivekji!’

¹⁴Bonta kehon atum alangliphan thek longsi, halatum hijan chepulo, ‘Lake ahemphu asopolo. La aphan pathilot lonang; anke amar atar etum chepahemphu longpo!’

¹⁵Lasi halatum alangliphan beri angtan varchorlo, lapen pathilot-lo. “Tangte, drakha aberi ahemphu hala-tum aphan kopisi klemjima” pusi Jisu arjulo.

¹⁶“Alangli vangsi halabangso amonit atum aphan pathipo, lapen drakha aberi ke akaprek kehon atum aphan pidetpo.” Monit atum labangso alam arju longsi pulo, “Lapuson paplang nang!”

¹⁷Jisu halatum aphan langdingsi pulo, “Tangte, labangso ahastro alamthe kopilo? ‘Thangta me-me pusi kekim atum ke-en-e a-arlongsi Kadokave apar akenangsotnei a-arlong cheplang tang-lo.’

¹⁸Halabangso a-arlong athak keklo abang aling chebengniji; lapen jongsi mane aphu athak bangso a-arlong klo lote, alangliphan padukniji.”

¹⁹Aron thekser atum lapen kurusar atum hadak mamat Jisu aphan kenepji aphan bor-ilo; pima alangli halatum aputhak labangso alamlir thanlo pusi chinilo; bonta halatum rat aphan phereduk-lo.

²⁰Lasi halatum ahut keme rilo. Halatum kelang dunjoiji aphan monit toilo, dhoromi ason cheplangsi damlo, atheke, alangli keningje alam kenepdun thekji aphan lapen labangso pen ajok Jisu aphan Roman detpangri lapen govornor arideng kehodai thekji aphansi halatum lapuson klemlo.

²¹La kelangjoi atum Jisu aphan pulo, “Thanbang, nangli keningje lapen kethan alam ke chok pu nelitum chini. Nangli monit amahang langle, bonta monit aphan Arnam aning kehang kopi, labangso alamjir ahokpet alamsi nangli thanlo pu nelitum chinilo.

²²Nelitum aphan thantha, ili Roman a-Recho aphan midu kepi aron doma, avema?”

²³Bonta halatum akepacherei abidi chinisi halatum aphan pulo,

²⁴“Neliphan rup apoisa isi nepaklangtha. Komat a-arjan lapen amensi la athak kedoma?” “Recho” pusi halatum thak-lo.

²⁵Lasi Jisu pulo, “Toh tangte, Recho amar Recho aphan pinon, lapen Arnam amar Arnam aphan pinon.”

²⁶Hadak halatum rat angno thangta alangli lam akechokche nep thekthedet-lo, lapen alangli kethak alam pen apot manghuphrongsi halatum doklip-lo.

²⁷Ansi manene a-Saduki atum, atheke kethitang atum thurthuthe pu kepu atum, Jisu along vangsi pulo,

²⁸“Thanbang, Moses labangso aron ilitum aphan etokpilo: ‘Jongsi inut amonit aso ave akole thilot-ra apiso pamo tekang-lo tangte, hala kethitang abang apoton kedoji aphan akorte abang la hemepi aphan patengvek nangji.’

²⁹Ahut isi korte bang throksi dolo; aklengsi abang piso ensi aso ave ako thilot-lo.

³⁰Anke halabangpi aphan adakvam abang pateng-lo,

³¹lapen ke adakvam abangta pateng dunlo. Lasonthotsi la kadokave bang throksita cheplang-lo-asomar ave ako thi-et-lo.

³²Kadokave aphi arlosota thilot-lo.

³³Tangte, mo kethitang atum kethur arni, alangli komat apiso cheplangpo? Pima la bang throksita labangpi pen chepangri pet-lo.”

³⁴Jisu halatum aphan thak-lo, “Labangso akai apinso lapen arloso atum chepangri,

³⁵bonta kethi pen kethur dunlongji a-ot kedo atum, lapen mo kevangji akai kedo dunlongji atum ke piso-en-e, penanta dode,

³⁶Halatum ke sining pherangke atum ason thakthakpo lapen thi un-elo. Halatum ke Arnam asomarlo, pima halatum kethi pen thurtang-lo.

³⁷Lapen kethitang atum kethurji pu angthek Moses paklangdak-lo. Thengplum along me ketot-ang ahastro angdeng along alangli Hemphu aphan ‘Abraham a-Arnam, Isaak a-Arnam, lapen Jakob a-Arnam,’ pusi pulo.

³⁸Alangli ke kethitang atum a-Arnam kali, Alangli ke kereng-et atum a-Arnamlo. Pima alangli long kadokave atum rengver.”

³⁹Manene aron thekser atum pulo, “Thanbang, nangli kethak alam mesen!”

⁴⁰Hala pen apar halatum karjuji haihedet-lo.

⁴¹Jisu halatum aphan arjulo, “Khristo ke David asopolo pu monit atum kopusonsi puthekma?

⁴²Pima David amethangsi Lun aloh along tok-lo; ‘Hemphusi ne-Hemphu aphan pulo:

⁴³ne nang hotur atum aphan nang keng kedong-i anghoi ason bibe tik ke nang ne ar-ele ingnitha.’

⁴⁴David alangliphan ‘Hemphu’ pusi hang-lo; tangte, kopusonsi Khristo ke David asopo jilangma?”

⁴⁵Rat atum alangliphan karju phrong ahut, Jisu amethang asangho atum aphan pulo,

⁴⁶“Aron thekser atum aphan cherehurnon! Latum choi keding chingchoisi kephurijisi aning hangpik, lapen hithi borwa along man kepi akardom kelongji aphan aning dokpik; Sinagog along anghoi keme lapen kecho kejun amei ahut akemenei adim kangniji aphan chongvai;

⁴⁷lapen latum hemepi atum akhi cho-et-lo, lapen ke athak kechepaklang aphan Arnam kardom ajir pading pik pik-lo! Latum aphan aduk so muchotji!.”