Read Karbi LUK 21 Bible Online

LUK 21 - Karbi bible

LUK 21

¹Ansi Jisu aphu chingthursi adung arei langsi keplang-o amonit atum kardom ahem apuru along dan kethap thek long-lo,

²lapen alangli inut keboidet ahemepi pai-ni apoisa kethapta thek-long-lo.

³Alangli pulo, “Ne nangtum aphan nangthanlang, kadokave atum apar labangso keboidet ahemepi kethap ongmuchot-lo.

⁴Pima kadokave atum ke kedortang ahin angbong pensi thap-lo; bonta labangpi ke boidet-lo setta kereng-iji aphan kedo-an asonta choche selesi pidet-lo.”

⁵Sangho atum angbong pen manene atum Kardomhemthepi alam chethanseilo. Atheke Kardomhemthepi a-arlong kelang ko-an alon kedo, lapen Arnam aphan kepi adan hei heita ko-an alon kedo pusi halatum chethanseilo.

⁶Jisu pulo, “La nangtum kethek-long an, atheke lahei hei a-arlong isinatta mo arni isi ke non adim bibedetji; kadokave a-arlongta var-etji.”

⁷Halatum alangliphan arjulo, “Thanbang la komantu plangjima? lapen la plangji dokdok ahut pi pi cheplangjima?”

⁸Jisu pulo, “Cherenon, nangtum aphan nangpamanghu longri. Ne men pen penang atum vangsi pupo, ‘Ne helo alanglilo, lapen ahut nangletang-lo!’ Bonta nangtum halatum along dunri.

⁹Nangtum ron kechedan lapen kehorisei alam hei hei karjulong ahut phereri, aphrangke lahei hei plangvek nangjilang. Bonta lahei hei apot-le kejut tebok-het-lo, lapu kali.”

¹⁰Ansi Jisu halatum aphan pulo, “Det ahotur det, lapen rat ahotur rat chethurji.

¹¹Kepherememe achikli hei hei vangji, akhim thurji, lapen adim pen adim mavur doji. Kephere meme lapen angthek kethe hei hei sining angsong pen nangklangji.

¹²La kadokave chekok ke ako halatum nanglitum aphan aling pen setta nangnepji lapen nangchenekji. Nangtum aphan sinagog hei hei along nangkepangsaiji aphan hodaidetji, lapen nangtum aphan phatek nangbengji. Ne pen apot nangtum aphan recho atum angno lapen det keja atum angno nangpondetji.

¹³Nangtum aphan lake Birta Keme kethanji aphan apor keme cheplangji.

¹⁴Nangtum kopusi chethakdun thek-jima pura aphrang pen ning biri; nangtum aning chepathirnon.

¹⁵Pima nangtum keningje alam nangtum ahotur atum baduta khang un-e, lapen nangchethakdun thekthe, lason alamthe lapen agian ne nangtum aphan nangpiji.

¹⁶Nangtum api apo, nangtum akorte atum, chepho chero atum, lapen nangtum ajirpo atum nangtum aphan hotur arideng nanghodaiji: lapen nangtum angbong manene aphan pathiji.

¹⁷Ne pen apot abangphutinta nangtum aphan hijimji.

¹⁸Bonta nangtum achu ejengnatta ingbobedetji.

¹⁹Nangtum dothipnon, lapen nangtum reng-longji.

²⁰“Chedanbang armu atum Jerusalem kekompet nangtum thek-long-lo tangte, bangso arongsopi pavir dapprangpo pu nangtum chiniji.

²¹Anke Judia adet kedo atum inglong kat nangji; Jerusalem arlo kedo atum nangbar vek nangji, lapen ke rit-le kedo atum rongsopi palut-le nang.

²²Pima hastro alam kechekokji aphan halabangso arni hei hei ‘Aduk kepi arni’, plangji.

²³Halabangso arni areng angsesedet a-arlosomar atum lapen oso thi-i kedo apei atum ko-an kepherememe akesung pho nangpo! Pima labangso adet aphan pherememe akesung vangji, lapen labangso arat atum aphuthak Arnam aduk-kepi vangji.

²⁴Penang atum aphan nokjir pen pathi-etji, lapen penang atum aphan phatek kebengji aphan adet kaprek kaprek pondetji; lapen ahut chokche tik ke akaprek atum Jerusalem dongthipji.

²⁵“Arni, chiklo, lapen chiklo longso athak manghumeme angthek klangji. Pirthe athak kadokave adet hei hei aning runhupji, lapen lang thepi arki lapen angsum kethur arki ingreng klung klang apotsi phere-oji.

²⁶Pirthe athak pi cheplangjima pu kephere pen ajok monit atum a-ok ainiruisi kliji, pima sining ajakong hei hei aphan hijukji.

²⁷Anke Monit a-Sopo aphan ajakong kethe pen lapen adak atur akethe pen inghun athak kecheklang halatum thek longji.

²⁸Lapen la hei hei keplang kecheng ahut, nangtum thurra nangphu chingthur non, pima nangtum akejok tebok-het-lo.”

²⁹Ansi Jisu halatum aphan bangso alamlir thanlo: “Thebo arong lapen kadokave athengpi aphan mathatha.

³⁰Arvo kechingjokmi kethek long pen barla apor tebok-het-lo pu nangtum chinilo.

³¹Lasonthotsi lahei hei keplang nangtum thek-long-lote, Arnam Arat tebok-het-lo pusi nangtum chiniji.

³²“La hei hei kadokave chekok ketik ke labangso a-ove dojilang pura ning chebinon.

³³Sining lapen pirthe avedetji, bonta nelam hei hei ke kaiketa doverji.

³⁴“Cherehurnon! Kecho kejun-o lapen pirthe aningbi an pen nangtum aning chepabuiklui hak huk-ri, kalite halabangso arni pham ketot ason thakthak nangtum aphan padan chekji.

³⁵Pima pirthe adang monit an aphuthak la vangji.

³⁶Mo kechekokji alam an pen kejokji ajakong kelongji lapen Monit a-Sopo angno karjapji aphan nangtum chesikding non, lapen kai ahutta Arnam ardomvernon.”

³⁷Halabangso arni ahut Jisu Kardom ahem alongsi lam thanbom, lapen arni ingsam lote, alangli Oliv pu anglong damsi ajojo hadaksi dokok titilo.

³⁸Lapen adapvang rat atum Jisu alam karjuji aphan Kardom ahem damlo.