Read Karbi LUK 22 Bible Online

LUK 22 - Karbi bible

LUK 22

¹Lapen Thap kave Ahim Amei nang leji dokdok-lo. Bangso amei aphan ke Kejok Amei puta pulo.

²Kurusar akethe atum lapen Aron thekser atum rat aphan pherelo, la apotsi halatum Jisu aphan kepathijoiji abidi rilo.

³Anke bang krehini asangho atum angbong pen inut, Iskariot pu a-Judas, aning arlo Soitan lutchok-lo.

⁴Lasi Judas nangbarlo, lapen halatum arideng Jisu aphan kehodaiji abidi Kurusar lapen Kardom ahem ahemphu atum pen pen chingvailo.

⁵Halatum aning arong-lo lapen alangliphan tangka kepiji aphan chepathik-lo.

⁶Judas halatum kechingvai alam chedondunlo, lapen Jisu aphan kehodaiji aphan, rat atum nang kechini dunde pin ahut keme ribomlo.

⁷Thap kave Ahim Arong aje Amei ahut Kejok Amei a-An kechoji aphan biresak aso kethuji arni nanglelo.

⁸Pitor lapen Jon aphan Jisu toisi pulo, “Damra etum Kejok Amei a-an kechoji aphan sik damnon.”

⁹Halatum arjulo, “Konatsi kesikdam nangjima? Nangli ning kehang kodakma?”

¹⁰Alangli thak-lo, “Nangtum rongsopi kelut pen mamat inut pinso amonit lang atebuk kepon abang pen nangtum chetongji. Alangli phi phi dunra, alangli kelutdam ahemle lut damnon,

¹¹lapen hem ahemphu aphan lapule punon: ‘Thanbang lapusonsi nangliphan pulo, neli lapen neli sangho atum pen Kejok Amei a-an kechoji aphan hem angdeng konatma?’

¹²Lapen nangtum aphan alangli angsong angdeng kangni adim kedotang adim nang paklangji; hadak-le siknon.”

¹³Halatum damsi kadokave Jisu kethan ateng long-lo, lapen halatum Kejok Amei a-an sik-lo.

¹⁴Ahut nang choksi, Jisu ketoitang atum pen an kechojisi ingnilo.

¹⁵Alangli halatum aphan pulo, “Ne kesung kepho aphrang nangtum pen labangso Kejok Amei a-an kechojisi ne ning hang-lo!

¹⁶Pima ne nangtum aphan nangthanlang, Arnam Arat angbong labangso chekok ke tik ke ne bangso a-an chothuthedetji.”

¹⁷Anke Jisu harlung enlo lapen Arnam aphan rosi pulo, “La enra nangtum angbong chebengnon,

¹⁸pima ne nangtum aphan nangthanlang, non pen mo Arnam a-Rat vangvetik-ke ne labangso adrakha ahorlang junjedetji.”

¹⁹Ansi alangli him eplang enlo, Arnam aphan rolo, beng-lo, lapen ha-latum aphan pisi pulo, “La nangtum aphan kepitang ke nebang arpumlo. Nephan kechemathathujile, la klem-non.”

²⁰Lasonthotsi an chodet aphi alangli harlung ehong enlo, lapen la halatum aphan pisi pulo, “Bangso aharlung ke nevi pen sap kethengtang Arnam akechechak kemilo, lake nangtum aphansi dungpitang-lo!

²¹“Bonsetta, langtha! Nephan hotur arideng kehodaiji abang ne pensi an chorap rap-lo!

²²Arnam kepathiktang asonthotsi Monit a-Sopo thinangpo, bonta alangliphan kehodaiji abang ko-an akepherememe aduk pho nangpo!”

²³Anke halatum angbong komat abangsi labangso akam klempoma pusi halatum kecharjuji pangcheng-lo.

²⁴Halatum angbong komat abang theneima, pusi halatum lam kechedanji pangcheng-lo.

²⁵Jisu halatum aphan pulo, “Ajat kaprek kaprek arecho atum ke halatum arat ahemphulo, lapen det keja atum aphan ke ‘Rat ajirpo atum’, pusi pulo.

²⁶Bonta nangtum aphan ke lapuson kali; la alar nangtum angbong kethenei abang ke akebinei ason thakthak nangji, lapen keja abang ke ban ason thakthak nangji.

²⁷Komat abang themu? An kechoji aphan kangni abang helo. Bonta neke nangtum angbong inut keru kethai abang ason thakthak-lo.

²⁸“Nephan asat hei hei kelang ahut nangtum nelong doverlo;

²⁹lapen ne-Po nephan isi a-Rat ne kepi ason thak-thaksi neta nangtum aphan nangpipo,

³⁰atheke, nangtum ne Rat angbong kecholongji lapen kejun longji aphan, lapen Israel kur krehini aphan kangsaijisi nangtum recho anghoi athak ingniji.

³¹“Simon, Simon! arjutha! Nangtum aphan sok ason aphe-e pen asok kepaprekji aphan kangrapji aphan, Soitan hukum long-lo.

³²Bonta Simon, nangtum akekroi ke-ik edetji aphan ne nangphan Arnam nang ardom pilo. Lapen mo nang nangning chiruidet lote nang korte atum ajakong pathevek nangji.”

³³Pitor thak-lo, “hemphu, nanglong phatek kejangdunji lapen kethi dunji aphan anta ne chesik ding-lo!”

³⁴“Ne nangphan nangpulong, Pitor, paningve vo kuke aphrang nang nephan batai kethom chinine pusi pudetji.”

³⁵Anke Jisu amethang asangho atum aphan pulo, “Tangka athia, jarong lapen keng-op pacheponpepin pen ne nangtum aphan nangketoi ahut nangtum kopine akedorde doloma?” Halatum thak-lo, “Thangta akedorde ave.”

³⁶“Bonta nonke tangka athia, jarong kedo abang pachepon nang; lapen nokjir kavedet abang amethang achoi dingpo chejorra nokjir epak pachenam nang,” pusi Jisu halatum aphan pulo.

³⁷“Pima ne nangtum aphan nangpulang, hastro along ketok ason, atheke, ‘Alangli adai kedo atum ason phonang-lo,’ labangso alam nephan chekokvek nangji, pima nelamjir ketoktang an chekokbomlo.”

³⁸Asangho atum pulo, “Langtha! Hemphu! dak nokjir pakni do!” Alangli halatum aphan pulo, “La anta dorpo!”

³⁹Jisu halabangso arongsopi o-kangsi, kai ason ha Oliv anglong damlo; lapen asangho atum alangli long dunlo.

⁴⁰Halabangso adim nanglesi Alangli halatum aphan pulo, “Nangtum asat keklokle detjile Arnam ardomnon.”

⁴¹Arlong pen kevar pale un-chit an akehelo alangli damlo, lapen akengphu patongruisi Arnam ardomlo.

⁴²Alangli pulo, “Nang ning hangte nang labangso aharlung nelong pen pontha po! Bonta ne ning kehang kali, nang ning kehangle papleng nang.”

⁴³Sining angsong pen inut apherangke alangliphan cheklangsi alangliphan ajakong pathe muchot-lo.

⁴⁴Alangli aning dukpiksi ansose Arnam ardomlo, lapen ang-i vi asonthak thaksi longle athak nangklodop dop-lo.

⁴⁵Arnam kardom patangdet aphi alangli thursi asangho atum along chedamlo, lapen halatum aning aduk pen amek kejangklip alangli thek-long-lo.

⁴⁶Alangli halatum aphan pulo, “Nangtum kopisi nangmek kejangklip-loma? Thurnon, lapen nangtum asat keklokledetjile Arnam ardomnon.”

⁴⁷Jisu lam keningjebom ahut armu atum vang-lo. Jisu asangho bangkrehini angbong pen inut, Judas pu abangsi halatum aphan nangjalo. Alangli Jisu aphan kangjupjisi adung an vang-lo.

⁴⁸Bonta Jisu pulo, “Judas, nang kangjup pensi Monit a-Sopo aphan hotur arideng hodaipoma?”

⁴⁹Asangho atum la keplangji dokdok alam chinisi arjulo, “Netum nokjir che-en nonma, Hemphu?”

⁵⁰Halatum angbong inut abang ke Kurusar kethenei aban ano ar-e chorphlak-lo.

⁵¹Bonta Jisu pulo, “La apar klem-rinon!” Alangli ano otsi pamethulo.

⁵²Ansi alangliphan kenepjisi kevang, kurusar kethe atum, kardom ahem keton aron-aso atum ahemphu atum lapen akesar atum aphan Jisu pulo, “Nangtum nephan kenepji aphan dokait aphan asonsi kaibong pen lapen nokjir pen vang nangkok-loma?

⁵³Arni arni neli nanglitum pen Kardomhemthepi along dorap rap-lo setta nanglitum neliphan kenepji mathathedet-lo. Bonta nonke nanglitum aphan aporlo; kangting ajakongsi kehailo.”

⁵⁴Halatum Jisu aphan nepsi Kurusar Kethenei ahem ponlo. Pitorta achar achar pen halatum aphi phi dunlo.

⁵⁵Thekup angbongchit me thorsi halatum me chinghip-lo, lapen Pitorta halatum along chinghipdunlo.

⁵⁶Lapen banpi inut alangli me kechinghip thek longsi Pitor aphan langdingsi labangpi pulo, “Labangso amonit jokta Jisu along dolo!”

⁵⁷Bonta alangli chekrongkre detsi pulo, “Neli alangliphan chinita chinine, pei!”

⁵⁸Malomso aphi inut amonit alangliphan thek longsi pulo, “Nangli jokta halatum angbong pen inut-lo!” Bonta Pitor thak-lo, “Neli kali, koh!”

⁵⁹Lapen porphai isi aphi anut kaprek amonit pu pasodaksi pulo, “Ahok-lo, labangso amonitta Jisu along dolo, pima alangli amatta Galili asorlo!”

⁶⁰Bonta Pitor thak-lo, “Nangli kopi alamthesi keningjema, neli chinine.” Halabangso ahut mamat alangli keningje ahut vo ejon kulo.

⁶¹Lapen Hemphu chetevarlo, lapen Pitor aphan langsap-lo, lapen Pitor, Hemphu alangliphan kepu, “Paningve vo kuke aphrang, nang nephan batai kethom chinine pusi puji” pu alam chemathalo.

⁶²Pitor hong barsi chiru pik-lo.

⁶³Jisu aphan kehon amonit atum alangliphan pinremlo, lapen chok-lo.

⁶⁴Halatum amek phungthipsi alangliphan arjulo, “Matsi nangphan teng-lo? Thantha!”

⁶⁵Lapen halatum penang kepinrem alam pen alangliphan pulo.

⁶⁶Lapen kethe-ang pen mamat akesar atum, Kurusar akethe atum lapen aron thekser atum chingrumpet-lo, lapen Jisu aphan kangsai a-Meipi angno vandet-lo.

⁶⁷Halatum pulo, “Nelitum aphan thannon, nangli heloma Khristo loma?” Alangli thak-lo, “Neli nanglitum aphan thansetta nanglitum kroikre-detji;

⁶⁸lapen neli nanglitum aphan arju setta, nanglitum neliphan thakthedetji.

⁶⁹Bonta non pen apar ke Monit a-Sopo, jakong theparpik a-Arnam ar-esi ingnipo.”

⁷⁰Halatum kadokave pulo, “Tangte, nangli Arnam a-Sopoloma?” Alangli halatum aphan thak-lo, “neli helo pusi nanglitum pulo.”

⁷¹Lapen halatum pulo, “Ansose kopi ahaki nangjilangma! Pima ilitum methang methangsi alangli ingho pen keningje arjulong tang-lo!”