Read Karbi LUK 24 Bible Online

LUK 24 - Karbi bible

LUK 24

¹Bhomkuru arni adapprang arlosomar atum kesiktang kenemprujin amar ponsi tipit along damlo.

²Tipit pen arlong kepakong-longtang halatum thek-long-lo,

³lasi halatum tipit arlo lut damlo; bonta halatum hadak Hemphu Jisu abang arpum thek longledet-lo.

⁴Halatum labangso alam pen apot manghuphrongsi karjapphrongbom ahut men men mamat lir lir lor lor ape kelokkling kechingthang banghini amonit halatum adung arjapphrong-lo.

⁵Arlosomar atum kephere pen amahang longle anat ketongjuibom ahut halabangso amonit atum halatum aphan pulo, “Nanglitum kopi apotsi Kereng-et abang aphanle kethitang atum angbong riloma?

⁶Alangli dak avelo; Alangliphan pathurtang-lo. Galili adet kedo ahut alangli nanglitum along keningje kopi, lale chemathathutha:

⁷‘Monit a-Sopo aphan papi atum arideng hodaidet nangji, thengparpan athak pathi nangji, lapen nithom aphi alangli thurthuji.’”

⁸Ansi halatum alangli lam chema-thathusi tipit pen nangchevoilo,

⁹lapen hala bangkre-isi lapen kedo-an atum aphanta lahei hei alam thanlo.

¹⁰Labangso arlosomar atum ke Megdalene a-Meri, Joanna lapen Jems apei Meri; latum lapen halatum along kedun arlosomar atum ketoitang atum aphan la-hei hei alam thanlo.

¹¹Bonta ketoitang atum lahei hei alam ke lam jong-jong chot pusi mathalo, lapen halatum aphan kroikredet-lo.

¹²Bonta Pitor thurphlutsi thiri anat kat-lo; alangli tipit ardik damlo, lapen keper-i alinen ape pen apar thangta thek longledet-lo. Ansi alangli keplangtang alam pen apot manghuhaksi hem chevoilo.

¹³Halabangso arni mamat halatum angbong pen banghini amonit Jerusalem pen kilomitar kre isi anbak akehelo, Emmaus pu arong anat damlo,

¹⁴lapen halatum keplangtang alamsi chingki ponbomlo.

¹⁵Halatum kechingki, kechingvai ahut Jisu amethang halatum adung patebok-lo, lapen halatum pen dam rappet-lo;

¹⁶halatum alangliphan thek long-lo, bonta kopuson lone alangliphan chinine det-lo.

¹⁷Jisu halatum aphan pulo, “Nangtum tovar kedambom ahut kopi alamsi chingki ponbomloma?” Halatum sangkoksi amahang jang ik-ak-lo.

¹⁸Lapen inut Kleopas pu abang alangliphan arjulo, “Jerusalem kevang alohi atum angbong pen nangli anchot loma non malom keplangtang alam hei hei kechinine abang ke?”

¹⁹Alangli arjulo, “Kopi pi alamlo?” Lapen halatum alangliphan thak-lo, “Najareth a-Jisu aphan keplangtang alamjir hei-hei. Labangso amonit ke inut Arnam amontrilo, lapen alangli Arnam lapen rat atum do-an angnota alam tame, akam tame ajakong kedo abang-lo.

²⁰Nelitum a-Kurusar kethe atum lapen kangsai amei keja atum alangliphan kepathiji aphan hodaidet-lo, lapen alangliphan theng parpan athak pathilot-lo.

²¹Lapen Israel aphan kepajok abang alangli helo pusi nelitum ning thelo! La kadokave apar, nonke halabangso arni pen non an nithom arnilo.

²²Nelitum angbong a-arlosomar atum nelitum aphan pamanghuhak-lo; halatum todap adapprang thiri damlo,

²³bonta alangli bang arpum longledet-lo. Halatum vangthusi pulo, alanglitum amang ben asonsi pherangke atum aphan thek-long-lo, lapen pherangke atum pulo, Jisu ke rengthutang-lo.

²⁴Lapen nelitum angbong pen manene atum thiri along damlo, lapen arlosomar atum kethan asonthotsi halatum thekdam long-lo, bonta halatum alangliphan thek longle det-lo.”

²⁵Anke Jisu halatum aphan pulo, “Nanglitum ko-an akelu! Montri atum keputang alam an kekroiji aphan nanglitum ko-an panglen loma!

²⁶Khristo lahei hei akesung chechakdet aphisi alangli adak atur angbong kelut damji a-ot dolo, kalima?”

²⁷Moses ketok aloh hei hei lapen montri do-an aketok hei hei pen pangchengsi, alangli halatum aphan amethang alamjir Hastro along keputang alam an than-pachinilo.

²⁸Halatum kepaleji arong an nang-lesi, Jisu ke apar kedam pikji ason klemlo;

²⁹bonta halatum alangliphan khangsi pulo, “Nelitum alongle sakok non; keningve aporlo, lapen ingtingta ingting tang-lo.” Lasi halatum along kedoji aphan alangli lutdunlo.

³⁰Alangli halatum pen pen an kechoji aphan ingnilo; him ensi ahirjume hang-lo lapen ke him bengsi halatum aphan pilo.

³¹Anke halatum amek ingpudet-lo lapen halatum alangliphan chininedet-lo, bonta alangli halatum amek angden pen chepavedet-lo.

³²Halatum chepulo, “Alangli etum pen tovar kechingki bom ahut, lapen Hastro alam ekethan-pachini ahut ening arlo kekar-ang ame asonlo, kalima?”

³³Halabangso ahut mamat halatum thursi, aphi thot Jerusalem chevoithu-juilo, lapen hadak bangkre isi asangho lapen halatum along kedodun atum kechingrum thek damlong-lo.

³⁴Lapen pulo, “Ahok-lo, Hemphu thurtang-lo! Alangli Simon aphan cheklang-lo!”

³⁵Anke latum tovar pi cheplang loma, lapen Hemphu him kebeng ahut latum kopusonsi chinidet-loma, lahei hei alam an than-pachinidet-lo.

³⁶Hala banghini halatum aphan lahei alam kethan bom ahut, men men amat Hemphu amethang halatum angbong arjaptherlo, lapen halatum aphan pulo, “Nangtum along ning kangsam padonang!”

³⁷Halatum thiriksi phere-olo; cham-buruksosi thek-long-lo pusi halatum mathalo.

³⁸Bonta alangli halatum aphan pulo, “Kopi apotsi nangtum a-ok klem hur loma? Nangtum aning arlo kopi apotsi lahei hei kekroi athir chepave bomlangma?

³⁹Ne ri lapen nekengta langtha, lapen chini non, lake neli methang amat-lo. Ne otnon, anke nangtum chinipo, pima chamburukso ke angsi lapen arrepi ave, bonta neke dolo, lake nangtum thek long-lo.”

⁴⁰Alangli la pudet pen ari lapen akeng halatum aphan chepaklang-lo.

⁴¹Lapu-an anta halatum kroithekthe det-lo; halatum kemanghu lapen aning arong pen plengset-lo; lasi Jisu halatum aphan arjulo, “Kopine kecho ahormu ladak nangtum along doma?”

⁴²Halatum ketuntang alang a-ok ethan alangliphan pilo,

⁴³alangli la ensi halatum angno cholo.

⁴⁴Anke alangli halatum aphan pulo, “Nangtum along kedo ahut ne nangtum aphan kethantang alam lahei hei helo: Ne lamjir Moses aron angbong, montri atum ketok, lapen Lun along hei hei ketoktang alam an chekokpet nangji.”

⁴⁵Ansi halatum Hastro hei hei kechiniji aphan alangli halatum aning ingpulo,

⁴⁶lapen halatum aphan pulo, “Ketoktang alam lahelo: Khristo kesung chechakvek nangji, lapen nithom arni kethi pen thurvek nangji,

⁴⁷lapen alangli men pen ajok ning kecherui alam lapen pap hei hei kediya alam, Jerusalem pen pangchengsi kadokave adet an pachethangdet nangji.

⁴⁸Nang-tum ke lahei hei alam ahaki atumlo.

⁴⁹Lapen ne-Po kechaktang asonthotsi nemethang amatsi la nangtum aphuthak nangtoipo. Bonta angsong pen nangtum aphuthak jakong vangve tik ke rongsopi angbongle dobomtha.”

⁵⁰Anke alangli halatum aphan Bethani an japonlo, lapen hadaksi alangli ari hongni chirungsi halatum aphuthak ahirjume pilo.

⁵¹Alangli halatum aphan ahirjume kepibom ahut, alangli halatum pen chekak-lo, lapen alangliphan sining angsong pondet-lo.

⁵²Halatum alangliphan ingduk-ardomlo, lapen aning arong-piksi Jerusalem chevoithulo,

⁵³lapen kaiketa Kardom ahem arlo dosi Arnam aphan kero piverlo.